Read Yucateco Génesis 14 Bible Online

Génesis 14 - Yucateco bible

Génesis 14

¹Ti' le kiino'obo' Amrafel u ajawil Sinar, Arioc u ajawil Elasar, Quedorlaomer u ajawil Elam, Tidal u ajawil Goim.

²Tuláacal lelo'oba' líiko'ob u ba'atelto'ob Bera u ajawil Sodoma, u ba'atelto'ob Birsa u ajawil Gomorra, u ba'atelto'ob Sinab u ajawil Adma, u ba'atelto'ob Semeber u ajawil Zeboim, u ti'al xan u ba'atelto'ob u ajaw u caajil Bela, le caaja' cu kaaba'intic xan Zoar.

³Le cinco ajawo'oba' tu much'quinto'ob u aj ba'atelo'ob tu táax lu'umil Sidim tu'ux yaan le quimen ka'anabo'.

⁴Doce ja'abo'ob palitzilta'ano'ob tumen Quedorlaomer, ba'ale' tu trece ja'abe' le cinco ajawo'oba' tu tucultajo'ob u ba'ateltico'ob Quedorlaomer.

⁵Cu dzo'ocol u máan jun ja'abe', Quedorlaomer yéetel le ajawo'ob yano'ob tu tzéele' j bino'ob tu caajil Astarot Karnaim, te'elo' tu pa'ajo'ob u muuk le j refaitaobo' cu dzo'ocole' ca tu pa'ajo'ob le j zuzitaobo' tu lu'umil Ham, le j emitaobo' j pa'ab u muuko'ob te j Save-quiriataimo',

⁶le j horeobo' pa'ab u muuko'ob tu káaxilo'ob Seir ca j ch'a'apachta'abo'ob tac tu táax lu'umil Paran le yaan taakal ti' le x tocoyo'.

⁷Le ca j suunaj Quedorlaomer yéetel le máaxo'ob yano'ob tu yéetele' j kucho'ob En-mispat, le xan cu kaaba'intic Cades; tu kascuntajo'ob tuláacal ba'al tu nactáantajo'ob tu beelo'ob te tu lu'um le j amalequilo'obo' bey xan tu beetilaco'ob ti' le j amorreob cajacbalo'ob tu lu'umil Hazezon-tamaro'.

⁸U ajawo'ob túun Sodoma, Gomorra, Adma, zeboim yéetel Belae' j bino'ob tu táax lu'umil Sidim, te'elo' le cinco ajawo'obo' tu ba'ateltajo'ob Quedorlaomer, Tildal, Amrafel yéetel Elasar.

¹⁰Ti' tuláacal u táax lu'umil Sidime' yaan ya'abcach u ch'e'enilo'ob asfalto; u ajawo'ob Sodoma yéetel Gomorrae' le ca tu yóoltajo'ob púudzul ti' le ba'atelo' lúubo'ob ichil le ch'e'eno'obo'. Le u láak ajawo'obo' j púudzo'ob ca j bino'ob te j ca'anal lu'umo'obo'.

¹¹Le máaxo'ob j pa'ob u muuko'ob j luko'ob te'elo' tu bisajo'ob túun tuláacal ba'axo'ob janalbe'en yéetel ba'alo'ob co'oj u tojolo'ob yano'ob ca'ach Sodoma yéetel Gomorra.

¹²Lot u paal u yíidzin Abrame' tu yo'olal ti' caja'an ca'ach Sodomae' j ma'ach ca j bisa'ab yéetel tuláacal ba'ax u ti'al.

¹³Ba'ale' jun túul máac j púudz ti' le quíimilo' j taale' ca tu láaj tzicbaltaj ti' Abram le j hebreo' máax cajacbal ca'ach tu káax u béequilo'ob Mamre le j amorreoe'. Mamre' sucu'untzil ti' Escol yéetel Aner, le máaco'oba' ti' yano'ob ca'ach tu tzéel Abrame'.

¹⁴Le ca tu yojéeltaj Abram j ma'ach bisbil u paal u yíidzine' tu much'quintaj le palitzilo'ob sijnalo'ob tu yotoche', tu pa'ate'ilo'obe' tres cientos diez yéetel ocho wíinico'ob ca jóok yéetelo'ob u ch'a'apacht le ajawo'ob tac tu caajil Dan.

¹⁵Tu áakabile' Abram yéetel le máaco'ob téec líiko'ob u ba'atelto'ob le ajawo'obo' ca tu ch'a'apachtajo'ob tac Hoba, le caaj yaan tu xaman u noj caajil Damascoe',

¹⁶Ca tu tocajo'ob ti'ob tuláacal ba'axo'ob cu bisico'ob ca'achi. Bey úuchic u toquic Abram u paal u yíidzino', ca tu láaj ch'a'aj le ba'ax ca'ach u ti'al Loto'. Tu tocaj xan le co'olelo'obo' bey le u láak máaco'obo'.

¹⁷Le ca j suunaj Abram cu dzo'ocol u pa'ic u muuk Quedorlaomer yéetel le ajawo'ob yano'ob tu tzéele', u ajawil Sodomae' jóok u kam Abram tu táax lu'umil Save, lela' u táax lu'um le ajawo'obo'.

¹⁸Bey xan Melquisedec u ajawil Salem, u aj kiin sen ca'anal Junab Ku; tu jóokesaj waaj yéetel vino[14]

¹⁹ca tu qui' t'antaj Abram yéetel le t'aano'oba': U qui' t'aan teech le sen ca'anal Ku máax beet ca'an yéetel lu'um;

²⁰Qui'iqui' t'antbil xan le sen ca'anal Ku máax beet a dzáanche'etic a aj p'eeco'obo'. Abram túune' tu dzaj ti' Méelquisedec u diezmoil[15] ti' le ba'axo'ob tu tocaj ti' le u aj p'eeco'obo'.

²¹Cu dzo'ocole' u ajawil Sodomae' tu ya'alaj ti' Abram: Dzáa teen le máaco'obo', p'áatac teech le ba'alo'obo'.

²²Ba'ale' Abrame' tu núucaj ti': In jalach t'antmaj ti' Yuumtzil, le sen ca'anal Junab Ku, máax beet ca'an yéetel lu'um,

²³ma' bíin in ch'a'a' mix ba'al ti' le ba'ax a ti'alo' mix jun chan tíich' u káanil in kaxic in xanab, u ti'al mix bikin ca wa'ale' teech ayikalcunt teen.

²⁴Tene' ma' in káat mix ba'al in ti'alti', wa ma' chéen le ba'ax dzo'oc u jaantico'ob in palitzilo'ob. Wa tu yo'olal le máaxo'ob j láakinteno', in káat in wa'ale': Aner, Escol yéetel Mamree', leti'obe' yaan u ch'a'ico'ob u jaatzul le unaj u ti'altico'obo'.