Read Yucateco Génesis 15 Bible Online

Génesis 15 - Yucateco bible

Génesis 15

¹Cu dzo'ocol lela' Yuumtzile' tu t'anaj Abram ichil jun p'éel náay ca tu ya'alaj ti': Abram, ma' a ch'i'ic sajaquil tumen teen a aj canan. Bíin a kam nojoch utzil.

²Ba'ale' Abrame' tu núucaj ti': Ku Yuumtzil, ¿ba'ax u biilal teen ca a dzáa teen bo'olal, wa jach a wojel mina'an in paalal? Tu yo'olal ma' a dzáa teen mix jun túul in paali', Eliezer le j damascoil, jun túul ti' in palitzilo'ob leti' bíin ti'altic tuláacal ba'ax yaan teen.

⁴Yuumtzile' tu núucaj ti': Le máax bíin ti'altic ba'ax yaan teche' jach a paal ma' yanal máaqui'.

⁵Yuumtzil túune' tu bisaj Abram táancab ca tu ya'alaj ti': Pact ma'alob le ca'ano', xoc le eeko'ob, wa cu páajtal a xoquico'ob. U'uye, bey bíin ya'abac a ch'i'ilancabilo'.

⁶Abrame' tu yocsaj óoltaj u t'aan Yuumtzil, tu yo'olal lelo' j ka'am Abram tumen Yuumtzil bey aj ti'ibil beel wíinique'

⁷Ca j a'ala'ab ti': Teen le Yuumtzilo'; teen jóokesech Ur u caajal le j caldeoilo'obo' u ti'al in dzáic teech le lu'uma' ca a ti'alinte.

⁸Ba'ale' Ku Yuumtzil, ¿bix je'el u páajtal in wojéeltic wa teen bíin in ti'alint le lu'uma'? Bey tu núuquilac Abram.

⁹Ca j a'ala'ab ti' tumen Ku: Taas teen jun túul chan wacax, jun túul x yuuc yéetel jun túul j taman, ca yanac ti'ob óox ja'ab tu jujun túulil, bey xan jun túul mucuy yéetel jun túul chan sacpacal.

¹⁰Abrame' tu taasaj ti' Ku tuláacal le aalako'obo', tu kupaj táan chúumuc tu jujun túulil ca tu dzaj jun búuj actáan ti' u láak, ba'ale' ma' tu kupaj le ch'íich'o'obo'.

¹¹Le j ch'oomo'obo' cu yéemelo'ob ca'ach yóokol u wíinclil le j quimen ba'alche'obo', ba'ale' Abrame' cu p'u'ujsico'ob ca'achi.

¹²Le ca j áakabchaje' Abrame' j t'úub u wenel. Ich jun súutuquile' téec bakpachta'ab tumen jun p'éel sen eekjo'och'e'enil, ca tu sen ch'a'aj sajaquil.

¹³Ca túun j a'ala'ab ti' tumen Yuumtzil: Unaj a wojéeltic, a ch'i'ilancabilo'obe' bíin cajlaco'ob táanxel lu'umil, te'elo' bíin palitzilta'aco'ob, bíin loobilta'aco'ob xan cuatro cientos ja'abo'ob.

¹⁴Ba'ale' tene', bíin xan in jadz le múuch' caajo'ob cu bin palitziltico'obo', cu dzo'ocole' a ch'i'ilancabe' bíin jáalkabta'aco'ob, bíin xan u ti'alintajo'ob nucuch ayikalilo'ob.

¹⁵Teche', le quéen sen nuxibaqueche' bíin quíimiquech ichil jéedzel óolal, bey bíin a much'abáa yéetel a máanja'an ch'i'ibalo'ob.

¹⁶Cu dzo'ocol u máan can yáal ch'i'ibale', a ch'i'ibalo'obe' bíin suunaco'ob ti' le cúuchila', tumen ma' u chuc u máan tip'a'anil u loobilo'ob le j amorreobo'.

¹⁷Le ca j áakabchaje' tuláacal j p'áat sen eekjo'och'e'enil, chíicpaj jun p'éel chujcab cu buudzilanquil yéetel jun p'éel tajche' t'aba'an cu káatbal chúumuc le ba'alche'ob buja'antaco'obo'.

¹⁸Ti'ili'e' kiino' Yuumtzile' tu beetaj nup t'aan yéetel Abram, ca tu ya'alaj ti': Le lu'uma' bíin in dzáa ti' a ch'i'ilancab, líikbal tu yáalcab ja'il Egiptoe' tac tu nojoch áalcab ja'il Éufrautes.

¹⁹U káat u ya'ale' u lu'umo'ob le j ceneob, j cadmoneob,

²⁰j hititaob, j ferezeob, j refaitaob,

²¹j amorreob, j cananeob j gergeseob yéetel le j jebuseob.