Read Yucateco Génesis 16 Bible Online

Génesis 16 - Yucateco bible

Génesis 16

¹Sarai ma' tu páajtal u dzáic ca'ach paalal ti' Abram u yíicham, ba'ale' yaan ca'ach jun túul u x palitzil u kaaba'e' Agar x egipciao'.

²Sarai túune' tu ya'alaj ti' Abram: Dzo'oc a wilic bix Yuumtzile' ma' u cha'a' yantal teen paalali', let o'olale' quin káat óoltic teech ca a nupabáa ti' Agar in x palitzil, ma' xan ca yanac in paal ti'i'. Abrame' tu éejemtaj ba'ax a'ala'ab ti' tumen Sarai,

³Leti'e' tu machaj Agare' le x egipciao' ca tu kubaj ti' Abram u ti'al u yatante, yaan ca'ach diez ja'abo'ob cajlac tu lu'umil Canaán.

⁴Ca tu nupajubáa Abram ti' Agar, ca j p'áat x yo'omil; ba'ale' le ca tu yilaj dzo'oc u x yo'omtale' jo'op' u méemechi'itic u xunáan.

⁵Sarai túune' tu ya'alaj ti' Abram: Ta wo'olale' Agare' cu méeme'echi'itiquen, teen j kub teech u ti'al a watante, tu yo'olal bin u ca j yantal u yaale' cu yu'ubicubáa asab nojoch ti' teen. Yuumtzil ca u yila'a' máax sipa'an, teech wa teen.

⁶Abrame' tu núucaj ti': A ca'aca'aj, ta kab yaan, a x palitzil; cu páajtal a beetic je'el ba'axac a káat x yéetele'. Sarai jo'op' túun u loobiltic, tu yo'olal lelo' Agare' yanchaj u púudzul.

⁷Ba'ale' nactáanta'ab tumen jun túul u ángel[16] Yuumtzil te x tocoy lu'um tu yicnal le sayab yaan tu jáal u bejil Shur,

⁸ca tu káatchi'itaj ti': Agar u x palitzil Sarai, ¿tu'ux a taal, tu'ux túun ca bin? x leti'e' tu núucaj: Táan in wáalcab ti' Sarai in xunáan.

⁹U ángel Yuumtzil túune' tu ya'alaj ti': Suunen tu yotoch a xunáanil, dzo'ocbes tuláacal ba'ax cu bin u ya'al teech.

¹⁰Tu ya'alaj xan u ángel Yuumtzil ti' Bíin in ya'abcunt a ch'i'ilancab mix máac bíin páatac u xoquic jay túul.

¹¹X yo'om yanilech, yaan u yantal jun túul a paal, dzáa u kaaba'int Ismael tumen Yuumtzile' tu yu'ubaj a wokon óolal;

¹²bíin ko'ox óolchajac bey jun túul u káaxil tzíimine'; bíin u ba'atelt tuláacal, wíinic, bíin ba'atelta'ac xan tumen tuláacal máac ba'ale' bíin u wa'acunt ma'alob u yotoch quex ma' u káat u láako'obi'.

¹³Tu yo'olal j t'aanaj Agar yéetel Yuumtzile', tu dzaj u kaaba'int le sayabo': Le Ku cu paacato' tumen tu ya'alaj tu báil: Kue' tu yilajen quex beyo' cuxa'anen.

¹⁴Let o'olalo' u kaaba' le ch'e'eno': U ch'e'enil le máax cuxa'an cu pactiquen xan. Le ch'e'ena' ti' cu yantal chúumuc bej ti' Cades yéetel Bered.

¹⁵Bey úuchic u dzáic Agar jun túul paal ti' Abram, leti' xane' Ismael tu t'anjilac.

¹⁶Ochenta yéetel seis u ja'abilo'ob Abram ca j síij Ismael.