Read Yucateco Génesis 17 Bible Online

Génesis 17 - Yucateco bible

Génesis 17

¹Le ca tu chucaj noventa yéetel nueve u ja'abo'ob Abrame', chíicpaj Yuumtzil ti'e', ca tu ya'alaj ti': Tene', u Junab Kuilen sen nojoch páajtalil; cuxlen x ma' si'ipil tin táan,

²bin in ca'aj in beet jun p'éel nup t'aan ta wéetel: bíin in beet ca sen ya'abac a ch'i'ibalo'ob.

³Abram túune' j noclaj j lu'um ca'aliquil Kue' táan u bin u ya'alic ti':

⁴Bey le nup t'aan quin in beet ta wéetela': Teche' yaan a taatainta'al tumen ya'abcach nucuch caajo'ob.

⁵Bejela'e' ma' bíin a kaaba'int Abrami'. Ba'ale' bejela'e' a kaaba'e' Abraham, tumen in ca'aj in beet ca taatainta'aquech tumen ya'abcach múuch' caajo'ob.

⁶Bíin in beet ca sen ya'abac a ch'i'ibalo'ob: ti' teech bíin jóokoc ajawo'ob yéetel múuch' caajo'ob.

⁷Le nup t'aan quin beetic ta wéetela', bey xan bíin in beet yéetel tuláacal a ch'i'ibalo'ob, u káat u ya'ale', tene' a Junab Kuen, leti'obe' u Kueno'ob xan.

⁸Ti' teech yéetel ti' leti'ob bíin in dzáa te'ex u lu'umil Canaán, le tu'ux caja'anech bejela'e', ba'al a ti'ale'ex u ti'al mina'an u xuul kiino'ob, teen xane' a Junab Kuene'ex.

⁹Tu ya'alaj xan Ku ti' Abraham: Ba'ale' teche' béeycunt in nup t'aan, teech yéetel tuláacal a ch'i'ibalo'ob.

¹⁰Lela' leti'e' nup t'aan quin beetic ta wéetele'exa' u najmal u béeycuntico'ob tuláacal a ch'i'ibalo'ob: tuláacal le j xiibo'ob yaan ichile'ex u najmal u súut kupta'alo'ob.[17]

¹¹U najmal a kupique'ex u yoot'el a j xiibile'ex, lela' bíin p'áatac bey u chíiculal le nup t'aan c beetica' te'ex tin wéetel, teen ta wéetele'ex.

¹²Bejela'a' cu bin j chúunule', tuláacal j xiib ichile'ex u najmal u súut kupta'al tu ocho kiino'ob síijic, je'el máaxac paalil ca síijic ich najil bey le palitzil mana'an yéetel taakin ti' je'el máaxac j táanxel lu'umile'.

¹³Bic p'áatac wa máax ma' u súut kupta'al bey le jun túulo' bey u láako'. Beyo' in nup t'aane' bíin p'áatac chica'an ta bakele'ex bey jun p'éel u nup t'aanil tuláacal u kiinil le cuxtalo'.

¹⁴Ba'ale' le máax ma' tu súut kupta'ale' u najmal u tze'elel ichile'ex, tu yo'olal ma' tu béeycunsaj in nup t'aani'.

¹⁵Kue' tu ya'alaj xan ti' Abraham: Sarai a watane' ma' táan u suut u kaaba'int beyo'. Líikbal bejela'e' u kaaba'e' Sara.

¹⁶Bíin in qui' t'ante, yaan in dzáic teech jun túul paal tu yéetel. Bey, in ca'aj in qui' t'ante. Leti'e' yaan u maamainta'al tumen ya'abcach múuch' caajo'ob u ch'i'ilancabe' yaan u beeticuba'ob u ajawo'ob caajo'ob.

¹⁷Abrahame' j noclaj lu'um, ca j che'ejnaj ca'aliquil táan u tucultic: ¿Jun túul máac yaan cien ja'abo'ob ti'e' je'el wa u páajtal yantal u paale'? ¿Sarae' bin u ca'aj wa yantal u paal tu noventa ja'abo'ob?

¹⁸Ca túun tu ya'alaj ti' Ku: Quexi' ca páatac u cuxtal Ismaele' yéetel a qui' t'aane'.

¹⁹Ca j núuca'ab ti' tumen Ku: Ba'ax tin wa'alaje': a watan Sarae' yaan u dzáic teech jun túul paal, teche' yaan a dzáic u kaaba'int Isaac yéetel leti'e' yaan in jedzcuntic in nup t'aan, yaan xan in t'ilcuunsic yéetel u ch'i'ilancab u ti'al ja'abo'ob mina'an u xuul.

²⁰Tu yo'olal Ismaele', dzo'oc xan in wu'uyiquech, bin in ca'aj in qui' t'ante; yaan in beetic u ya'abtal u paalal ca ya'abchajac xan u ch'i'ibal. Ismaele' yaan u taatainta'al tumen doce nucuch máaco'ob, yaan in beetic yéetel jun p'éel nojoch múuch' caaj.

²¹Ba'ale' in nup t'aan yaan in t'ilcuunsic yéetel Isaac, le paal cu bin u dzáa teech Sara ichil jun ja'ab, bey je'el bix le kiino'oba'.

²²Le ca j dzo'oc u t'aan Ku yéetel Abrahame' j luk te'elo'.

²³Ti' le kiin je'elo' Abrahame' tu súut kuptaj Ismael u paal, tu súut kuptaj xan tuláacal le palitzilo'ob sijnalo'ob tu yotoch, bey le u manmaj yéetel u taakine'. Tuláacal le máaco'ob cajacbalo'ob tu yotoch, bey le meyajtique', súut kuptajo'ob je'el bix u ya'almajil Kue'.

²⁴Abrahame' yaan ca'ach noventa yéetel nueve ja'abo'ob ti', Ismael u paale' yaan ca'ach trece ja'abo'ob ti' ca j súut kupta'abi.

²⁶Abraham yéetel Ismael u paale' tu kamajo'ob u meeyjul le súut kuptajil ti' jun p'éelili' kiin,

²⁷pa'ate' yéetel le máaco'ob caja'ano'ob tu yotocho', bey xan le palitzilo'ob sijnalo'ob tu najilo', bey le mana'ano'ob yéetel taakin ti' le táanxel caajilo'obo'.