Read Yucateco Génesis 18 Bible Online

Génesis 18 - Yucateco bible

Génesis 18

¹Yuumtzile' j chíicpaj ti' Abraham tu káaxil u béequilo'ob Mamre, ca'aliquil culucbal Abraham tu jool u pasel, míin chúumuc kiin.

²Abrahame' tu líiksaj u yich ca tu yilaj wa'alacbalo'ob actáan ti'e' óox túul j xiibo'ob. Le ca tu yilajo'obe', j líik tu séeblaquil u kamo'ob, ca j noclaj lu'um,

³ca tu ya'alaj: In Taata, quin káat óoltic teech ma' a bin tu séeblaquil.

⁴Wa ca tucultic utze', in ca'aj in káat jun p'íit ja' u ti'al a p'o'ic a woque'ex, cu dzo'ocole' ca je'elele'ex jun súutuc tu yáanal u bo'oy le che'o'.

⁵Bey tumen dzo'oc a kuchule'ex tu'ux cajacbal le a palitzile'exa' bin in ca'aj in taas te'ex wa ba'ax a jaante'ex u ti'al a ca ch'a'ique'ex muuk ma'ili' u líikbal a bine'ex tu ca'a tene'. Leti'obe' tu núucajo'ob: Ma'alob túun.

⁶Abrahame' j ooc tu pasele', ca tu ya'alaj ti' Sara: Séeba'an, ch'a'a' óox p'éel u p'iisil ma'alob harinae' ca beet wa jay p'éel waajo'ob.

⁷Cu dzo'ocole' Abrahame' j bin áalcabil tu'ux yaan u wacaxo'obe', ca tu yéeyaj jun túul u asab ma'alobil ichil u mejenil u wacaxe' ca tu dzaj ti' jun túul u palitzilo'ob, máax j nu'uct tu séeblaquil u ti'al jaantbil.

⁸Pa'ate' yéetel le chan wacaxo' Abrahame' tu dzaj ti'ob mantequilla[18] yéetel leche, tu dzaj yóol u táanlico'ob ca'aliquil leti'obe' táan u janalo'ob yáanal le che'o'.

⁹Le ca j dzo'oc u janalo'obe' le u'ula'obo' tu káatchi'itajo'ob ti' Abraham: ¿Tu'ux yaan Sara a watan? ca tu núucaj Abraham: Te'elo', ichil le paselo'.

¹⁰Jun túul ti'obe' tu ya'alaj túun: Le ja'ab cu taalo' yaan in suut in xíimbal teech, ti' túun le ja'abo' Sara a watane' yaan u yantal jun túul u chan paal. Sarae' táan ca'ach yu'ubic tuláacal, ca'aliquil ti' yaan tu paach Abraham tu jool le paselo'.

¹¹Abraham yéetel Sarae' dzo'oc ca'ach u sen ch'íijilo'ob, Sarae' dzo'oc ca'ach u xu'ulul u yilic u nook.

¹²Tu yo'olal lelo' Sarae' ma' j páatji u muclic u che'eji', ca tu tucultaj: ¿Bix cu bin j antal teen le qui' óolala' wa sen ch'ija'anen bey xan in wíicham?

¹³Ba'ale' Yuumtzile' tu ya'alaj ti' Abraham: ¿Ba'ax teen che'ejnaj x Sara? ¿Ma' wa tu yocsic tu yóol je'el u páajtal u yantal jun túul u chan paal quex tumen dzo'oc u ch'íijile'?

¹⁴¿Yaan wa ba'ax sen talam ma' tu páajtal u beetic Yuumtzil? Le ja'ab cu taalo' bíin suunaquen in xíimbal teech u ti'al túun lelo' x Sarae' bin yanac u chan paal.

¹⁵Le ca tu yu'ubaj x Sara lela' tu ch'a'aj sajaquil, tu yo'olal lelo' tu ya'alaj: Tene' ma' che'ejnaqueni' Ba'ale' Yuumtzile' tu núucaj ti': Tene' in wojel che'ejnajech.

¹⁶Cu dzo'ocole' le u'ula'obo' j wa'alajo'ob, ca jo'op' u binbalo'ob tu tojil u noj caajil Sodoma. Abrahame' jóok u yil u bino'ob.

¹⁷Ca túun tu tucultaj Yuumtzil: U najmal in wa'alic ti' Abraham ba'ax quin in beete.

¹⁸Tumen leti'e' bíin taatainta'ac tumen jun p'éel nojoch mu'uka'an caaj. Dzo'oc in séeb chi'itic ti'e', tu yo'olale' bíin in qui' t'ant tuláacal u caajilo'ob yóokolcaab.

¹⁹Teen tin yéeyaj u ti'al u ya'al ti' u paalal bey ti' u ch'i'ilancab ca u dzo'ocbeso'ob in ca'anbesajo'ob, ca u beetajo'ob xan tuláacal ba'ax utz yéetel ba'ax tu beel, u ti'al ca in dzo'ocbes beyo' tuláacal ba'ax in séeb chi'itmaj.

²⁰Bey tuno' Yuumtzile' tu ya'alaj ti': U cajnáalilo'ob sodoma yéetel Gomorrae' sen kaas ba'ax cu ya'ala'al tu yo'olalo'ob, u kebano'obe sen talam.

²¹Tu yo'olal lelo' táan in bin te'elo' u ti'al in wil wa jaaj sen talam kebano'ob je'el bix dzo'oc in wu'uyico', beyo' je'el in dzáic jaaj ti' in wiche'.

²²Ca'a túul ti' le u'ula'obo' likul te'elo' j bino'ob Sodoma, ba'ale' Abrahame' j p'áat tu táan Yuumtzil.

²³Tu nadzajubáa u láak jun p'íit tu yicnale' ca tu káatchi'itaj ti': ¿Bíin wa a xu'uls le máaxo'ob ma' sipa'ano'ob yéetel le aj kebano'obo'?

²⁴Cux túun wa yaan cincuenta ma' j loolob máaco'ob te j caajo', ¿je'el wa túun a xu'ulsic le caajo'? ¿Ma' bíin a sa'atso'ob tu yo'olal le cincuentao'?

²⁵¡Ma' tu páajtal a beetic jun p'éel ba'al beyo', le a quíimsic máax mina'an u si'ipil pa'ate' yéetel le sipa'ano'; óoli' bey láajquet sipa'ano'obe'! ¡Ma' a beetic lelo'! Teech u nojoch Aj xot kiinil tuláacal le yóokolcaabo' ¿Ma' bíin a beet ba'ax tu beel?

²⁶Yuumtzil túune' tu núucaj ti': Wa ca in nuptáant cincuenta ma' j loolob wíinico'ob tu caajil Sodomae', tu yo'olalo'obe' je'el in sa'atsic tuláacal le caja'ano'ob te'elo'.

²⁷Ba'ale' Abrahame' tu ca'a a'alaj ti': Sa'ates teen in táabal j t'aan ta wéetel beya', tumen teche' Kuech tene' chéen jun túulen j ma' óol wíinic,

²⁸ba'ale', ma' xan ca u binet cinco j ma' loobil máaco'ob u ti'al ca chúucpajac le cincuentao'. ¿Chéen wa túun tu yo'olal le cinco cu bineltico' je'el a xu'ulsic tuláacal le caajo'? Ca tu núucaj Yuumtzil: Wa ca in nuptáant cuarenta yéetel cinco ma' j loolob máaco'obe', ma' bíin in xu'ulsi'.

²⁹Tu ya'alaj Abraham: Ma' xan wa yaan chéen cuarenta ma' loolob máaco'obi'. Yuumtzile' tu ya'alaj: Tu yo'olal le cuarenta máaco'obo' ma' bíin in xu'uls le caajo'.

³⁰Ba'ale' Abrahame' j t'aanaj tu ca'a téen: Quin káat óoltic teech ma' a p'u'ujul tin wéetel iquil in sen káat óoltic jun p'éelili' ba'al, ba'ale' ma' xan ca a nuptáant chéen treinta ma' j loolob máaco'obi'. Yuumtzile' tu ca'a a'alaj: Tac tu yo'olal le treintao', je'el in sa'atsic u si'ipil le caajo'.

³¹Abrahame' tu ca'a a'alaj: In Yuumtzil, dzo'oc in táabal j t'aan ta wéetel beyo', ba'ale' ¿Ba'ax je'el u yúuchul wa ca a nuptáant chéen veinte ma' j loolob máaco'obi'? Yuumtzile' tu núucaj: Tu yo'olal le veinteo' ma' bíin in xu'uls le caajo'.

³²Ba'ale' Abrahame' tu ya'alaj tu ca'a téen: In Yuumtzil beet utz ma' a p'u'ujul tin wéetel, ba'ale' bin in ca'aj t'aan ta wéetel u dzooc u téenel, ma' tin in ca'a a'al teech mix ba'al: ¿Ba'ax je'el a beetic wa ca nuptáant chéen dieci'? Yuumtzile' tu núucaj: Tac tu yo'olal le diezo', ma' bíin in xu'uls le caajo'.

³³Le ca j dzo'oc u t'aan Yuumtzil yéetel Abrahame' j luk te'elo'; Abrahame' j suunaj tu pasel.