Read Yucateco Génesis 21 Bible Online

Génesis 21 - Yucateco bible

Génesis 21

¹Je'el bix úuchic u séeb chi'itique', Yuumtzile' tu dzaj yóol u táan óoltic x Sara ca tu dzo'ocbesaj le ba'ax u ya'almaj ti'e',

²bey túuno' leti'e' x yo'omchaj ca tu dzaj jun túul paal ti' Abraham tu jach ch'ija'anil. Le chan paalo' síij jach tu kiinil je'el bix u ya'almaj ca'ach Kue'.

³Abrahame', Isaac tu dzajilac u kaaba'int le paal dza'ab ti' tumen x Sarae';

⁴Ca tu súut kuptaj tu ocho kiino'ob síijic, je'el bix a'ala'abic ti' tumen Ku ca u beete'.

⁵Abrahame' yaan ca'ach cien ja'abo'ob ti' ca j síij Isaac.

⁶X Sara túune' tu tucultaj: Kue' tu beetaj in che'ej, tuláacal le máaxo'ob cu bin u yojéeltajo'ob dzo'oc u yantal jun túul in paale', yaan u che'ejo'ob tin wéetel.

⁷¿Máax ca'ach bíin u ya'al ti' Abraham wa tene' yaan u kuchul u kiinil in dzáic paalal ti'e'? Ba'ale' tene' dzo'oc in dzáic ti'e' jun túul paal quex tumen dzo'oc u ch'íijil.

⁸Le ca j nojochchaj le chan paalo' j luksa'ab u chu'uch. Le kiin j luksa'ab u chu'uche' Abrahame' tu noj kiinbesaj.

⁹Ba'ale' Sarae' tu yilaj bix ca'ach u p'a'asta'al Isaac tumen le paal dza'ab ti' Abraham tumen Agar le x egipciae'.

¹⁰Ca túun j bin u ya'al ti' Abraham: Xi'ico'ob, le x koos yéetel u yaalo', tumen Isaac in j xibil paale' mina'an ba'ax o'olal u jatzic ba'al u ti'al yéetel u yaal le x kooso'.

¹¹Lelo' yaachaj tu yóol Abraham, tumen le ba'axa' j beeta'ab ti' jun túul u paal

¹²Ba'ale' Kue' tu ya'alaj ti': Ma' a sen tuucul tu yo'olal le j xi'ipalo' mix tu yo'olal a x palitzilo'. Beet tuláacal ba'ax cu ya'alic teech x Sara, tumen a ch'i'ibale' ti' Isaac bíin taalac.

¹³Tu yo'olal u yaal le x palitzilo', bey xan teen bíin in beet u jóokol ti'e' jun p'éel nojoch caaj tumen leti'e' a paal.

¹⁴Tu jach ja'atzcabil u láak kiine', tu dzaj Abraham u cuch Agar waaj yéetel jun p'éel chúuj chuup yéetel ja', ca xan tu kubaj ti', chan j Ismael, ca tu ya'alaj ti' ca xi'ic, leti'e' j bini, x ma' nu'uc xíimbalnajic tu x tocoy lu'umil Berseba.

¹⁵Le ca j xu'up le ja' yaan ca'ach te j chúujo', tu p'ataj le chan j xi'ipal yáanal u bo'oy jun cúul caabal che'

¹⁶ca j bin cutal chan náach ti' tumen ma' u káat ca'ach u yila'a' u quíimili'. Chéen p'elac culaque' ca jo'op' u yokol le paalo'.

¹⁷Kue' tu yu'ubaj u yokol le chan j xi'ipalo'; te j ca'ano' j t'aanaj jun túul u ángel Ku ca tu ya'alaj ti' Agar: ¿Ba'ax cu yúuchul teech Agar? Ma' a ch'a'ic sajaquil, tumen Kue' dzo'oc u yu'ubic u yokol le j xi'ipal tu'ux yano'.

¹⁸Xeen, mach u kab, ma' a cha'akabtic, tumen bíin in beet u jóokol ti'e' jun p'éel sen nojoch caaj.

¹⁹Bey túuno' Kue' tu beetaj u yilic Agar jun p'éel u sayabil ja'. X leti'e' j bine' ca tu chupaj le chúuwo', tu dzaj xan ja' u yuk Ismael.

²⁰Kue' tu yáantaj le j xi'ipalo', leti'e' j nojochchaji, ti' cajlaj xan tu x tocoyil Paran, tu ma'alob canaj j dzoon yéetel p'unche'. J kuch u kiinil u dzo'ocsa'al u beel tumen u maama yéetel jun túul x egipcia.

²²Óoli' ti' le kiino'obo', Abimeleque' j bin t'aan yéetel Abraham, j láakinta'ab tumen Ficol u nojchil u aj ba'atelo'ob. Abimelec tu ya'alaj ti' Abraham: C ilic bix u yáantiquech Ku ti' tuláacal ba'ax ca beetic.

²³Let o'olale', jalach t'ant teen tu kaaba' Junab Ku, ti'ilie' cúuchila' ma' bíin a beet teen kaas mix xan ti' in paalal, mix ti' in ch'i'ibali'. Jalach t'ant teen bíin a wáant teen yéetel utz je'el bix tin wáantilaquech yéetel utzile', bey xan bíin a beet yéetel in wéet caajalo'ob way ti' le lu'um tu'ux cajacbalecha'.

²⁴Ca tu núucaj Abraham: Quin jalach t'antic teech.

²⁵Ba'ale' Abrahame' tu ka'ajsaj ti' Abimelec le ch'e'en to'oc ti' tumen u palitzilo'obe'.

²⁶Abimeleque' tu núucaj ti' Abraham: Le ba'ala' ma' in wojel ca'achi', teche' mix jun téen ta wa'alaj teen. Ma' in wojel máax beet lelo'.

²⁷Abraham túune' tu ch'a'aj j tamano'ob yéetel wacaxo'obe', ca tu dzaj ti' Abimelec; ti'ilie' kiino' tu ca'a túulalo'ob tu beetajo'ob jun p'éel nup t'aan.

²⁸Ba'ale' Abrahame' tu jun páaycuntaj siete j tamano'ob ichil u múuch'ul u j tamano'ob,

²⁹tu yo'olal lelo' Abimeleque' tu káat chi'itaj ti': ¿Ba'ax o'olal ta jun páaycuntaj le siete j tamano'obo'?

³⁰Abrahame' tu núucaj ti': U ti'al ca meyajnac le siete j tamano'oba' bey u chíicul teen tin ja'adzaj le ch'e'ena'.

³¹Let o'olalo' Berseba[21] cu kaaba'intic le cúuchilo', tumen te'elo' tu ca'a túulalo'ob tu beetajo'ob jun p'éel nup t'aan.

³²Cu dzo'ocol le nup t'aan te Bersebao', Abimelec yéetel Ficole, suunajo'ob tu lu'umil j filisteob.

³³Te j Bersebao', Abrahame' tu pakaj jun cúul che' cu kaaba'intic Tamarisco[22] te xano' tu ch'a'a chi'itaj u kaaba' Yuumtzil, le Ku mina'an u xuul u cuxtalo'.

³⁴Ya'ab ja'abo'ob cajlaj Abraham tu lu'umo'ob le j filisteobo'.