Read Yucateco Génesis 23 Bible Online

Génesis 23 - Yucateco bible

Génesis 23

¹X Sarae' j cuxlaj ciento veinte yéetel siete ja'abo'ob,

²j quíim Quiriat-arba, lela' u nojoch caajil Hebrón tu lu'umil Canaán. Abrahame' okolnaj tu yo'olal quíimic x Sara ca tu búuquintaj u nookil okom búuquil tu yo'olal.

³Cu dzo'ocole' jóok te tu'ux tudzquinta'an u wíinclil x Sara ca j bin u ya'al ti' u hititailo'ob le cúuchilo':

⁴Quex táanxel lu'umilen ichile'exe', co'one'ex teen jun p'éel mucnal u ti'al in muquic in watan.

⁵Le j hititaobo' tu núucajo'ob ti':

⁶Nojoch máac, beet utz a wu'uyico'oni'. C ti'al to'one' teche' jun túulech u aj yéeyaj Ku. Muc a watan ti' le ma'alob mucnal ca tuclique', mix máac ichilo'on bíin u ya'al teech ma'il, u ti'al lelo'.

⁷Abraham túune' j wa'alaje', ca j chíin poolnaj tu táan le j hititaobo'.

⁸Ca tu ya'alaj: Wa jach tu jaajil a káate'ex ca in muc in watan waye', beete'ex utz a t'ane'ex tin wo'olal yéetel Efrón u paal Zohar,

⁹u ti'al u conic teen u áactuunil Macpela, le yaan tu jáal u lu'umilo'obo'. Tene' je'el in bo'otic ti'e' tuláacal u tojol le áactuno', beyo' je'el u páajtal in ti'alintic jun p'éel mucnal way ti' le cúuchila'.

¹⁰Tu yo'olal ti' yan ichilo'ob Efrón hititae', tu ka'am núucaj ti' Abraham u ti'al ca páatac u yu'uba'al tumen tuláacal u yéet cajnáalilo'ob, bey xan tu yo'olal tuláacal le máaxo'ob cu máano'ob tu jool le caajo':

¹¹Ma' in taataen le xéet' lu'umo' quin síic teech, tac xan le áactun yaan te j lu'umo'. Le in wéet caajalo'oba' je'el u páajtal u jaajcuntico'ob[25] teen tin síaj teech. Muc a watan te'elo'.

¹²Ba'ale' Abrahame' tu ca chíin pooltaj u cajnáalilo'ob le cúuchilo'

¹³ca tu núucaj ti' Efrón tu táan tuláacalo'ob: U beet utz u yu'ubiquen a tzicbe'enil. Quin káat óoltic teech ca a kam le taakina', u bo'olal le lu'umo' cu dzo'ocole' quin muquic in watan te'elo'.

¹⁴Efrón túune' tu núucaj ti':

¹⁵Ma' in taataen, u'uy ba'ax quin in wa'alej; le lu'umo' u tojole' cuatro cientos sac taakino'ob. Tu yo'olal le buca'aj u tojolo' ma' t bin ba'atel, bey túuno' muc a watani'.

¹⁶Abrahame' tu éejemtaj u bo'otic le buca'aj taakin tu káataj Efrón tu táan le hititaobo', ca tu níic bo'otaj yéetel sac taakin.

¹⁷Bey túuno' u lu'um Efrón yaan ca'ach tu lu'umil Macpela, tu lakin Mamre; tuláacal ba'ax yaan ca'ach te j lu'umo', le áactun yéetel tuláacal le pakalbi che'obo'

¹⁸j máan u ti'alint Abraham. Tuláacal lela' jaajcunta'ab tumen le j hititaob yéetel tumen le máaxo'ob j máano'ob tu jool u beel le caajo'.

¹⁹Cu dzo'ocol lela' Abrahame' tu mucaj x Sara tu áactunil u lu'umil Macpela tu lakin Mamre, le cúuchila' kaj óola'an xan bey Hebrone', ti' yaan tu lu'umil Canaane'.

²⁰Bey p'áatic ti' le lu'um yéetel le áactun yaan ca'ach te'elo', le j co'on ti' tumen le j hititaob u ti'al mucnal.