Read Yucateco Génesis 25 Bible Online

Génesis 25 - Yucateco bible

Génesis 25

¹Abraham yanchaj u láak u yatan máax tu kaaba'intaj Cetura.

²U paalal yanchaj x yéetele' lelo'oba': Zimram, jocsán, Medán, Madián, Isbac yéetel Suá.

³Jocsane' u taataob Seba yéetel Dedán. U ch'i'ibalo'ob Dedane' lelo'oba': asureob, letuseob yéetel le j leumeobo'.

⁴U paalal Madiane' lelo'oba': Efa, Efer, Hanoc, Abida yéetel Elda. Tuláacal lelo'oba' u yo'omelo'ob Cetura.

⁵Isaaque' tu ti'alintaj tuláacal ba'ax yaan ca'ach ti' Abraham.

⁶Ti' u paalal yanchaj yéetel u láak co'olelo'obe', Abrahame' chéen tu beetaj siibalo'ob ti'ob, ca'aliquil cuxa'ane' tu jun páaycuntaj ti'ob Isaac u paal, tu láaj túuchi'itajo'ob tu.

⁷Abrahame' cuxlaj ciento setenta yéetel cinco ja'abo'ob tu pa'ate'il,

⁸j quíim tu yo'olal dzo'oc ca'ach u sen nuxibtal. Ca j bin u nupubáa yéetel u yúuchben ch'i'ibalo'ob.

⁹J mu'uc tumen Isaac yéetel Ismael u paalal tu áactunil Macpela, le yaan tu lakin Mamre tu lu'um Efrón u paal Zohar le j hititae'.

¹⁰Le lu'uma' leti'e' tu manaj ca'ach Abraham ti' le hititaobe'. Ti' j mu'uc Abraham tu tzéel Sara u yatan.

¹¹Cu dzo'ocol u quíimil Abrahame', Kue' tu pulaj u qui' t'aan tu yóokol Isaac, máax j p'áat cajtal tu yicnal le ch'e'en cu kaaba'intic: Le máax cuxa'ane' cu yiliquen.

¹²Lelo'oba' u paalal Ismael, u paal Abraham yéetel Agar le x egipciae', u x palitzil x Sara,

¹³tu tzoolol bix síijico'ob: Nebaiot le u nojochil u paalal, cu dzo'ocole' Cedar, Adbeel Mibsán,

¹⁴Misma, Duma, Massa,

¹⁵Hadar, Tema, Jetur, Nafis, yéetel Cedema.

¹⁶Lelo'oba' u kaaba'ob u doce paalal Ismael, yéetel xan u kaaba'obe' j kaj óolta'ab u kaaba'ob u lu'umo'ob yéetel u cajtalilo'ob. Tu jujun túulilo'obe cu méektáantico'ob ca'ach u láaktzilo'ob.

¹⁷Ismaele' yaan ca'ach ti' ciento treinta yéetel siete ja'abo'ob ca j quíimi ca j bin u nupubáa yéetel u yúuchben ch'i'ibalo'ob.

¹⁸U ch'i'ibalo'obe' j p'áato'ob cajtal te j lu'um yaan chúumuc u lu'umilo'ob Havila yéetel Shur, actáan ti' Egipto, tu beel Asiria, ti' j p'áato'ob cajtali' quex tumen tu ma' u káato'ob ca'ach u láaktzilo'ob.

¹⁹Lela' u tzicbalil Isaac, u paal Abraham.

²⁰Isaaque' yaan ca'ach cuarenta ja'abo'ob ti' ca j dzo'oc u beel yéetel x Rebeca, u yíidzin Labán u paalalo'ob Betuel, le j arameob cajacbalo'ob ca'ach Padan-aram.

²¹X Rebecae' ma' páatji u yantal u paalalo'obi', bey túuno' Isaaque' j káat óolnaj ti' Yuumtzil tu yo'olal leti'. Yuumtzile' tu yu'ubaj u payalchi' ca túun x yo'omchaj x Rebeca ti' iicho'ob.

²²Ba'ale' tu yo'olal táan u ba'atelo'ob ca'ach le mejen iicho'ob tu jobnele', leti'e' tu tuclaj: Wa bey u yúuchul le ba'ala', ¿ba'ax u biilal le cuxtala'? Ca túun j bin u ya'al ti' Yuumtzil ba'ax cu yúuchul ti'.

²³Leti'e' tu núucaj ti': Yaan ichil a jobnel ca'a p'éel múuch' caajo'ob, ca'a p'éel caajo'ob táan u ba'atelo'ob ma'ili' síijco'obe'. Jun túule' yaan u sen yantal u muuk asab ti' le u láako', le sucu'untzilo' yaan u meyatic le íidzintzilo'.

²⁴Kuch u kiinil u síijsaj Rebecae', ca tu síijsaj mejen iicho'ob.

²⁵Le j yáax síijo' jun túul chacxique'en paal, piim u tzo'otzel tuláacal u wíinclil. Ca j dzaab u kaaba'int Esaú.

²⁶Cu dzo'ocole' ca j síij u yíidzin u machmubáa tu tuuncuy Esaú.[27] Let o'olale' dzaab u kaaba'int Jacob.[28] Ca j síisa'abo'ob tumen x Rebecae', yaan ca'ach setenta ja'abo'ob ti' Isaac.

²⁷Le paalalo'obo' j nuucchajo'ob. Esaue' j kuch u beeticubáa jun túul j káaxil máac jach ma'alob j dzoon. Ba'ale' Jacobe' jun túul máac jedzecnac, utz tu yóol u p'áatal tu yotoch.

²⁸Isaaque' u yaabiltmaj ca'ach Esaú tumen qui' tu chi' u jaantic le ba'ax cu dzonic ca'achi; ba'ale' x Rebecae' u yaabiltmaj ca'ach Jacob.

²⁹Jun p'éel kiine', Jacobe' táan ca'ach u chaquic janal; Esaue' suunaj jach ca'ana'an ti' le káaxo',

³⁰Ca tu ya'alaj ti' Jacob: Beet utz a dzáic teen jun p'íit le chachac janal yaan teech te'elo', tumen táan u quíimsiquen wi'ij. (Let o'olale' Esaue' cu kaaba'intic xan Edon).

³¹Ca j a'ala'ab ti' tumen Jacob: Yáax táanile' dzáa teen tu kexile' u tojol a yáax paalil.

³²Ca túun tu ya'alaj Esaú: Je'el bix cu páajtal a wilico' táan u quíimsiquen le wi'ija'. Let o'olale' mix ba'al u biilal teen u tojol le in yáax paalilo'.

³³Ca tu ya'alaj Jacob: Jalach t'ant teen bejela'e' je'el a dzo'ocbesic ba'ax ca wa'alico'. Esaue' tu jalach t'antaj ti'; bey úuchic u conic ti' Jacob le u tojol u yáax paalilo'.

³⁴Bey túuno' Jacobe' tu dzaj ti' Esaú waaj yéetel u janalil lenteja. Esaue' le ca j dzo'oc u janal yéetel u yukule', j líike' ca j bini. Bey úuchic u cúulpachcuntic le u bo'olal u j yáax paalilo'.[29]