Read Yucateco Génesis 26 Bible Online

Génesis 26 - Yucateco bible

Génesis 26

¹Ti' le kiino'obo' jach mina'anchaj ba'ax jaanta'al ti' tuláacal le lu'umo', je'el bix le yanchaj ti' le kiino'ob cuxa'an ca'ach Abrahame'. Let o'olalo' Isaaque' j yanchaj u bin Gerar tu'ux caja'an ca'ach Abimelec u ajawil u caajil filistia.

²Te'elo' Yuumtzile' j chíicpaje' ca tu ya'alaj ti': Ma' a bin Egipto, p'áaten le tu'ux quin in wa'al teche',

³tene' ti' yanen ta wéetel, yaan xan in qui' t'antiquech, tumen ti' teech yéetel ti' a ch'i'ilancab bíin in dzáa tuláacal le lu'umo'oba'. Beyo' quin dzo'ocbesic in séeb chi' ti' Abraham a taata.

⁴Bíin in beet u ya'abtal a ch'i'ilancab je'el bix ya'abil le eeko'ob te j ca'ano', yaan xan in dzáic ti'ob tuláacal le lu'umo'oba'. U láak ba'ale', ti' a ch'i'ibal bíin in qui' t'ant tuláacal u múuch' caajilo'ob le lu'uma',

⁵tu yo'olal tu táan óoltaj Abraham ba'ax tin wa'alaj ti'e', in tzolbe'en t'aano'ob, in túuchi' t'aano'ob, in wa'almaj t'aano'ob yéetel in ca'anbesajo'ob.

⁶Isaac túune' j p'áat Gerar,

⁷Le ca j káat chi'ita'ab ti' tumen u j cajnáalilo'ob le cúuchil tu yo'olal x Rebecae', Isaaque' tu ya'alaj u yíidzin. Tu yo'olal u sen qui'ichpamile', Isaaque' tu tuclaj je'el u quíimsa'al tu yo'olal leti'e' tumen u j xiibilo'ob le cúuchilo'.

⁸Cu dzo'ocol u máan kiino'ob p'áatac te'elo'. Abimeleque' wa'alacbal ca'ach tu yicnal u calom iikil u yotoche', tu yilaj Isaaque', táan báaytic x Rebeca u yatan.

⁹Ca tu túuchi'itaj t'anbil ca tu ya'alaj ti': A watan bacáan, ¿bey wa ma'? ¿Ba'ax teen ta wa'alaj a wíidzin? Isaaque' tu núucaj: tumen tin tuuculaj je'el in quiimnsa'al tu yo'olale'.

¹⁰Ba'ale' Abimeleque' tu ya'alaj ti': ¿Ba'ax teen ta beetaj le ba'ala'? Wa máax ichil le caaj ca táabac j chiltal ca'ach x yéetel a watane', dzo'oc ca'ach a beetic c si'ipile'.

¹¹Abimelec túune' tu kuben t'antaj ti' tuláacal le caajo': je'el máaxac ca u chi'ichnaccunt le máac wa ca u chi'ichnaccunt u yatane' cu xot kinta'al u cuxtal.

¹²Ti' le ja'abo' Isaaque' pakalnaj te j cúuchilo', tu yo'olal qui' t'antabic tumen Yuumtzile' jach ma'alobchaj u jooch.

¹³Sen ayikalchaji, j kuch xan yantal ya'ab ba'alo'ob ti'.

¹⁴Tu yo'olal sen ya'abchajic u j tamano'ob, u wacaxo'ob yéetel u palitzilo'obe' le filisteobo' j chu'upo'ob yéetel sawinajil.

¹⁵Le ca'ach cuxa'anili' Abraham u taatae', u palitzilo'ob Abrahame' tu potajo'ob ch'e'eno'ob; ba'ale' le j filisteobo' tu but' lu'umtajo'ob.

¹⁶Cu dzo'ocole' Abimeleque' tu ya'alaj ti' Isaac: Tzelabáa waye' tumen dzo'oc a asab ayikaltal ti' to'on.

¹⁷Isaaque' j bin tu táax kóom lu'umilo'ob Gerar, j p'áat cajtal te'elo'.

¹⁸Ca tu ja'adzaj le ch'e'eno'ob jola'ano'ob tumen u taata ca'aliquil cuxa'ane', leti'e' j bu'ut'o'ob ca'ach tumen le j filisteob cu dzo'ocol u quíimile', le kaaba'ob dzaab ti' tumen u taatae' le ca j dzaab ti'ob.

¹⁹Jun p'éel kiine' u palitzilo'ob Isaaque' táan ca'ach u jolico'ob jun p'éel ch'e'en te j táax kóom lu'umo' ca tu nactáantajo'ob jun p'éel sayab.

²⁰Ba'ale' le j cananeob cu canatico'ob ca'ach le j tamano'ob tu táax kóom lu'umil Geraro', ba'atelnajo'ob yéetel le j cananeob cu táan óoltico'ob u j tamano'ob ca'ach Isaac tu yo'olal cu ya'alico'ob ca'ache' le ja'o' u ti'alo'ob. Tu yo'olal lelo' Isaaque' tu dzaj u kaaba'int le ch'e'eno' Ba'atel, Tumen ba'atelnajo'ob tu yo'olal.

²¹Cu dzo'ocole' u palitzilo'obe' tu jolajo'ob u láak ch'e'en, tu yo'olal lelo' suunajo'ob j ba'atel, Isaaque' tu dzaj u kaaba'int le ch'e'eno' P'eclantáanbal.

²²Isaaque' tu náachcuntubáa te'elo', ca tu jolaj u láak ch'e'en, tu yo'olal ma' j ba'atelnajo'ob tu ca tene' tu dzaj u kaaba'int: cóochquinajil tumen tu ya'alaj: Bejela'e', Yuumtzile' dzo'oc u cóochquintic u cúuchil tu'ux bíin in caxant in cuxtal, dzo'oc xan u ayikalcuntiquen.

²³Isaaque' j luk te'elo' ca j bin Berseba.[30]

²⁴Ti' le áakabo' chíicpaj Yuumtzil ca tu ya'alaj ti': Teen u Junab Ku Abraham a taata. Ta wéetel yanen ma' ch'a'ic sajaquil. Tu yo'olal Abraham in palitzile' yaan in qui' t'antiquech, yaan xan in ya'abcuntic a ch'i'ibal.

²⁵Isaac túune' tu beetaj jun p'éel u multuunil kultaj te'elo', ca tu ch'a'a chi'itaj u kaaba' Yuumtzil. J p'áat cajtal te j cúuchilo', u palitzilo'obe' tu jolajo'ob jun p'éel ch'e'en.

²⁶Jun p'éel kiine' j kuch Abimelec ti' u taalbal Gerare' u ti'al ca t'aanac yéetel Isaac. J láakinta'ab tumen Ahuzat u aj bisajbáa, yéetel Ficol u náacomil u aj ba'atelo'ob.

²⁷Isaaque' tu ya'alaj ti'ob: Bey te'ex ta tojol ch'iintajene'ex tumen ta p'ectajene'exo' ¿Ba'ax u biilal ca taale'ex a wilene'ex?

²⁸Leti'obe' tu núucajo'ob ti': Dzo'oc ilic ti' yaan Yuumtzil ta wéetele', let o'olale' dzo'oc c tucultic c a'alic teech ca a beet jun p'éel nup t'aan t éetel. Je'el bix le nup t'aana':

²⁹teche' ma' bíin a beet to'on mix jun p'éel kaasi', tumen u jaajile' to'one' ma' c chi'ichnaccunt techi'. Ba'ale' to'one' c iliquech yéetel utzil, cu dzo'ocole' t a'alaj teech ca lukquech t icnal yéetel qui'imac óolal, bejela'a' túune' Yuumtzile' táan u qui' t'antiquech.

³⁰Isaac tuune' tu beetaj ti'ob jun p'éel nojoch kiinbesaj, leti'ob xane' jaano'ob yéetel ukulnajo'ob.

³¹Tu ja'atzcabil u láak kiine' j líiko'obe' ca jalach t'aanajo'ob tu baatzilo'ob. Cu dzo'ocole' ca j luko'ob tu yicnal bey aj bisajba'obe', Isaaque' tu ya'alaj ca xi'ic utzil ti'ob.

³²Láili' ti' le kiino', u palitzilo'ob Isaaque' tu taasajo'ob u péectzilil dzo'oc u kuchulo'ob tac tu ja'il le ch'e'en cu jolico'obo'.

³³Isaaque' tu dzaj u kaaba'int le ch'e'eno' Seba.[31] Tu yo'olal lelo' le caajo' cu kaaba'intic Berseba tac bejla'e'.

³⁴Le ca tu chucaj cuarenta u ja'abilo'ob Esaue' j dzo'oc u beel yéetel Judit u x ch'upul paal Beeri j hititail. Dzo'oc xan u beel yéetel Basemat u x ch'upul paal Elón u láak j ititail.

³⁵Le ca'a túul co'olelo'oba' tu beetajo'ob u káajtal u kuuxtalo'ob Isaac yéetel x Rebeca.