Read Yucateco Génesis 28 Bible Online

Génesis 28 - Yucateco bible

Génesis 28

¹Isaac túune' tu t'anaj Jacob, ca tu qui' t'antaj, ca tu kuben t'antaj ti': Ma' u dzo'ocol a beel yéetel mix jun túul u co'olelil u lu'umil le Canaana'.

²Xeen Padan-aram tu yotoch Betuel u taata a maama.

³Le Ku yaan tuláacal páajtalil ti'o' u qui' t'antech yéetel ca u ya'abcunt a ch'i'ibalo'ob u ti'ala' ca jóokoc teech ya'abcach múuch' caajo'ob.

⁴Ca u dzáa ti' teech, bey xan ti' a ch'i'ibalo'ob, le qui' t'aan tu séeb chi'itaj ti' Abrahame', u ti'al a ca u ti'alintajo'ob le lu'um tu'ux cajacbalo'on beyo'on táanxel lu'umile', tumen bey tu séeb chi'itilac ti' Abraham.

⁵Bey úuchic u túuxta'al Jacob Padan-aram tumen isaac. Jacobe' j kuch tu yotoch Labán leti'e' u paal ca'ach Betuel le j aramile', u sucu'un x Rebeca, leti'e' u maama ca'ach Jacob yéetel Esaú.

⁶Esaue' tu yilaj bix úuchic u qui' t'anta'al Jacob tumen Isaac yéetel bix úuchic túuxta'abic Padan-aram u ti'al ca dzo'ococ u beel te'elo'. Bey xan tu qui' u'uyaj u t'aan u taata, le ca j dzo'oc u qui' t'anta'al Jacobe', bix úuchic u kuben t'anta'al ti' ma' u dzo'ocol u beel yéetel mix jun túul u x co'olelilo'ob Canaán.

⁷Bix úuchic u bin Jacob Padanaram bey je'el bix a'ala'abic ti' tumen u taata yéetel tumen u maamae'.

⁸Bey úuchic u yojéeltic ma' tu yóol u taata u x co'olelilo'ob Canaani';

⁹Let o'olal bin u yila'a Ismael u paal Abrahame', ca tu ch'a'a u yatan u x ch'upul paalal Mahalat, íidzintzil ti' Nabaiot, u núupul u chuucáan atano'ob x Canaanilo'ob yaan ca'ach ti'e'.

¹⁰Jacobe' jóok Bersebae' ca tu ch'a'a u bejil Haran.

¹¹J kuch ti' jun p'éel cúuchile' ca p'áat u máans áakab te'elo', tumen le kiino' dzo'oc ca'ach u t'úubul. Tu cha'aj u ti'al u káanjo'olt jun p'éel u tuunichilo'ob le cúuchilo', ca j chilaj wenel.

¹²Te'elo' tu wayaktaj jun p'éel náay, ichil u wayake' tu yilaj jun p'éel eeb t'alacbal u yooco'ob j lu'um, cu kuchul tac ca'an, yóokole' cu na'acalo'ob yéetel cu yéemelo'ob u ángelo'ob Ku.

¹³Tu yilaj xan wa'alacbal Yuumtzil tu yicnal ca j a'ala'ab ti': Teen Yuumtzil u Ku Abraham a nool, u Ku Isaac a taata. Ti' teech yéetel ti' a ch'i'ilancabo'ob bíin in dzáa le lu'um tu'ux chilicbalecha'.

¹⁴Leti'obe' bíin sen ya'abaco'ob bey je'el bix u ma'ay le sa'am lu'umo'; yaan u ki'itpajalo'ob j xaman, j noojol, j lakin tac j chikin; tuláacal xan le láaktzilo'ob ki'itpaja'ano'ob yóokolcaabe', ti' teech yéetel ti' a ch'i'ibalo'ob bíin qui' t'anta'aco'ob.

¹⁵Tene' ti' yanen ta wéetele'; bíin in canantech je'el tu'ux ca xi'iqueche', bíin xan in sut teech way te j lu'uma'. Ma' bíin in p'at teech tumen bíin in dzo'ocbes le ba'ax quin séeb chi'itic techa'.

¹⁶Le ca j aaj Jacob tu wayake', tu ya'alaj: Jach tu jaajile' Yuumtzile' ti' yaan ti' le cúuchila', ba'ale' tene' ma' in wojel ca'achi'.

¹⁷Tu sen ch'a'a sajaquil, ca tu tuclaj: Le cúuchila' sen quili'ich way yaan u yotoch Kue'. U jool u yoocbalil ca'an.

¹⁸Jacobe' líik jach ja'atzcabil u láak kiin, tu ch'a'aj le tuunich meyajnaj ti' u ti'al u káan jo'ol ca tu wa'acunsaj bey jun p'éel ocom pake', tu wecaj aceite yóokol bey úuchic u jun páaycuntico'.

¹⁹Te j cúuchilo' yaan ca'ach jun p'éel caaj cu kaaba'intic Luz, ba'ale' Jacobe' tu kexaj u kaaaba' ca tu dzaj u kaaba'int Betel.[32]

²⁰Te'elo' tu séeb chi'itaj Jacob: Wa Ku cu láakintiquen yéetel cu canantiquen iquil in binbala', wa cu dzáic ba'al in jaant bey xan ba'al in búucbese',

²¹ca suunaquen toj in wóol tu yotoch in taatae', le Yuumtzil túuno' bíin in Kuintej.

²²Le tuunich dzo'oc in dzáiic bey ocom pakila' Bíin otochquinta'ac tumen Ku; tuláacal u kiinilo'ob in cuxtal bíin in dzáa teech in Ku jun jaatz ti' u diez jaatzal ti' tuláacal ba'ax ca bin a dzáa ti' teen.