Read Yucateco Génesis 29 Bible Online

Génesis 29 - Yucateco bible

Génesis 29

¹Jacobe' j bin u xíimbale' ca j kuch tac tu lu'umil le j lakinilo'obo'.

²Te j káaxo' tu yilaj jun p'éel ch'e'en yaan óox p'éel u múuch'ul j tamano'ob táan u je'elelo'ob naadz ti'e' tumen ti' cu yukico'ob ja'i'. Tu chi' le ch'e'eno' yaan ca'ach jun p'éel nojoch tuunichi',

³le quéen múuch'uc tuláacal le j tamano'ob te'elo', le aj canano'obo' cu lukesico'ob le tuunich tu yóokol le ch'e'eno' u ti'al ca u dza'ob ja' ti' u j tamano'ob, cu dzo'ocole' cu ca'a maquico'ob le ch'e'en tu ca'a téeno'.

⁴Jacobe' tu káat chi'itaj ti' le aj canan j tamano'obo': ¿In láake'ex tu'ux a taale'ex? Leti'obe' tu núucajo'ob J haranilo'on.

⁵Jacobe' tu káat chi'itaj ti'ob: ¿A kaj óole'ex wa Labán u paal Nacor? ca tu núucajo'ob: c kaj óol.

⁶Ca tu káat chi'itaj Jacob: ¿Toj wa u yóol? Leti'obe' tu núucajo'ob: Bey Labane' toj u yóol; Ile, je'el cu taal Raquel u x ch'upul paal yéetel u j tamano'obo'.

⁷Jacob túune' tu ya'alaj: Láili' yéetel kiin yanilo'one' jach séeba'an u ti'al ca ka'alac le j tamano'obo'. ¿Ba'ax teen ma' ta dzáique'ex ja' ti'ob u ti'ala' ca a bise'exo'ob janal?

⁸Ba'ale' leti'obe' tu núucajo'ob ti': Ma' tu páajtal, yaan c pa'atic u láaj kuchul le j tamano'ob u ti'al ca lukesa'ac le tuunich tu jool le ch'e'en tumen le aj canano'obo', u ti'al c dzáic ja' ti' le j tamano'obo'.

⁹Ca'aliquil táan u t'aan Jacob tu yéetelo'obe', Raquele' j kuch yéetel u j tamano'ob u taata, tumen leti' canantico'ob ca'achi.

¹⁰Jacobe' tu séeblaquil le ca tu yilaj u j tamano'ob u dzeyuume', j bine' ca tu luksaj le tuunich tu jool le ch'e'eno' ca tu dzaj ja' ti' le j tamano'obo';

¹¹cu dzo'ocole' tu te'escuntaj Raquel yéetel jun p'éel dzu'udze' ca jo'op' u yokol.

¹²Le ca tu tzicbaltaj Jacob ti' Raquel u paal Rebeca u yíidzin Labán leti'e', Raquele' j bin áalcabil u tzicbalte ti' u taata.

¹³Labane' le ca tu yu'ubaj u yúuchul t'aan tu yo'olal Jacob u paal u yíidzine', ca jóok áalcabil u kamej, tu méekaje' ca tu dzu'udzaj, ca tu bisaj tu yotoch. Cu dzo'ocole' Jacobe' tu tzicbaltaj tuláacal ba'axo'ob úuch ti'.

¹⁴Labane' ca tu ya'alaj ti': Jach tu jaajile' teche' in wéet ki'ikelech. Jacobe' j p'áat tu yicnal Labán jun p'éel winal.

¹⁵Cu dzo'ocol u máan le kiino'obo' Labane' tu ya'alaj ti' Jacob: Ma' unaj a meyajtiquen x ma' bo'olil chéen tumen in láakechi'. A'al teen bajux a káat a náajalte.

¹⁶Labane' yaan ca'ach ca'a túul u x ch'upul paalal; le nojocho' cu kaaba'intic ca'ach Lea, le chichano' Raquel.

¹⁷Leae' muun u paacat, ba'ale' Raquele' sen qui'ichpam

¹⁸Bey tumen Jacob dzo'oc cach u yutztal tu yich Raquelo'; tu núucaj: Je'el in meyajtiquech siete ja'abo'ob tu yo'olal Raquel u chichanil a x ch'upul paale'.

¹⁹Ca túun tu núucaj Labán: Asab ma'alob ca in dzáa ti' teche' ma' ca in dzáa ti' yanal máaqui'. P'áaten tin wéetel.

²⁰Bey túuno' Jacobe' meyajnaj tu yo'olal Raquel siete ja'abo'ob, u ti'al leti'e' chéen jun p'íit kiin tu yiljilac, tumen u sen yaacuntmaj.

²¹Le ca j máan siete ja'abo'obe' Jacobe' tu ya'alaj ti' Labán: Dzáa teen a x ch'upul paal u ti'al ca dzo'ococ in beel tu x yéetel, tumen dzo'oc u núup'ul le kiin in wa'almaj in meyaj tu yo'olale'.

²²Labán túune' ca tu páay t'antaj u kaj óolalo'ob u ti'al u kiinbesajil le dzo'ocol beelo'.

²³Ba'ale' ti' le áakabo' Labane' tu ch'a'a x Leae' ca tu bisaj ti' Jacob, Jacobe' ca j ween x yéetel.

²⁴Labane' tu síaj ti' x Lea jun túul u x palitzilo'ob cu kaaba'intic Zilpa u ti'al táan óoltic.

²⁵Tu ja'atzcabil u láak kiine' jacobe' tu yilaj yéetel Lea j weeni, ca tu ba'ateltaj ti' Labán: ¿Ba'ax le dzo'oc a beetic ti' tena'? ¿Ma' wa meyajnajen ta wéetel tu yo'olal Raqueli'? ¿Ba'ax teen túun dzo'oc a tusiquen?

²⁶Labane' tu núucaj ti': Waye' ma' suuc to'on u dzo'ocol u beel le chichan paal táanil ti' x quictzilo'.

²⁷Dzo'ocbes u semanail dzo'oquic a beel yéetel x Leao', ca in dzáa teech xan x Raquel wa tumen teech ca meyaj tin wéetel u láak siete ja'abo'ob.

²⁸Jacobe' tu yóoltaj; Le ca j máan le semana dzo'oquic u beel yéetel Leao', Labane' ca tu dzaj Raquel ti' Jacob u ti'al u yatante.

²⁹Labane' tu dzaj xan ti' Raquel jun túul ti' u x palitzilo'ob u kaaba'e' Bilha, u ti'al ca táanla'ac x tumen.

³⁰Jacobe' tu nupubáa ti' Raquel ca tu asab yaabiltaj ti' Lea, quex tumen yanchaj u meyajtic Labán u láak siete ja'abo'ob.

³¹Le ca j ila'ab tumen Yuumtzil bix u p'ecta'al Lea tumen Jacobe', ca tu beetaj u yantal u paalal, ba'ale' Raquele' ma' tu beetaj u yantal u ti'ali'.

³²Leae' yo'onchaje' ca yanji jun túul u yaal tu dzaj u kaaba'inte' Rubén,[33] tumen tu ya'alaj: Yuumtzile' tu yila okom in wóol. Let o'olalo' bejela'e' in wíichame' yaan u yaabiltiquen.

³³Cu dzo'ocole' Leae' yanchaj u láak u yaal ti' máax tu dzaj u kaaba'int Simeón[34] ca tu ya'alaj: Yuumtzile' tu yu'ubaj bix in kéex óolta'al, let o'olalo' dzo'oc u dzáic ti' teen xan u láak paal.

³⁴Yanchaj tu ca'a téen u láak u yaale', ca tu dzaj u kaaba'int Leví[35] tumen tu ya'alaj: Bejela'e' in wíicham yaan u nupicubáa ti' teen, tumen dzo'oc in dzáic óox túul u paalal.

³⁵Leae', páatchaj u yantal u láak u yaal, ti' máax tu dzaj u kaaba'int Judá, tumen tu ya'alaj: Bejela'e' yaan in qui' t'antic Yuumtzil. Cu dzo'ocol lela' ch'éej u yantal u paalal.