Read Yucateco Génesis 30 Bible Online

Génesis 30 - Yucateco bible

Génesis 30

¹Le ca tu yilaj x Raquel ma' tu páajtal u dzáic paalal ti' Jacobe' tu yu'ubaj sawinajil tu yo'olal x Lea u quiic ca tu ya'alaj ti' u yíicham: Dzáa teen paali', tumen wa ma' ta dzáic tene' quin quíimil.

²Ba'ale' Jacobe' j p'u'uj x yéetel, ca tu ya'alaj ti': ¿Kuen wa ca tuclic? Máax ma' tu cha'ic u yantal a paalale', Ku.

³Leti' túune' tu ya'alaj ti': Je'el túun Bilha in x koosa', nupabáa x yéetel; le quéen yanac u paalale', cu béeytal óoli' bey[36] teen cu yantal in chanpale'. Beyo' cu páajtal yantal in paalal.

⁴Bey úuchic u dzáic x Raquel, x Bilha u x koos u ti'al u x keechint Jacob. Jacobe' tu nupajubáa yéetel x Bilha,

⁵leti'e' tu dzaj jun túul paal ti' Jacob.

⁶X Raquel túune' tu ya'alaj: Le chanpaala' yaan u kaaba'intic Dan, tumen Kue' tu yu'ubaj in payalchi', tu beetaj ba'ax tu beel tin wo'olal iquil tu dzajilac ti' teen jun túul paal.

⁷Cu dzo'ocole' x Bilhae' tu dzaj ti' Jacob u láak paal,

⁸ca tu ya'alaj x Raquel: Le chanpaala' yaan u kaaba'intic Neftalí tumen dzo'oc in mukul muuk yéetel in quiic dzo'oc xan in t'oonquintic.

⁹Le ca tu yilaj x Lea dzo'oc u ch'éenel u yantal u paalale', tu ch'a'aj x Zilpa u x koos ca tu dzaj ti' Jacob u ti'al u x keechinte.

¹⁰Le ca j dzaab ti' Jacob jun túul paal tumen x Zilpae',

¹¹x Leae' tu ya'alaj túun: ¡Buca'aj utzil! let o'olale' le chanpaala' yaan u kaaba'intic Gad.

¹²Cu dzo'ocole' x Zilpae' tu dzaj u láak paal ti' Jacob,

¹³ca tu ya'alaj x Lea: Buca'aj qui'imac óolal, bejela'e' le x co'olelo'obo' yaan u ya'alico'ob qui' in wóol. Let o'olalo' le chanpaala' yaan u kaaba'intic Aser.

¹⁴Jun p'éel kiine' j bin Rubén ich cool tu kiinilo'ob u jo'ochol trigo, te'elo' tu nactáantaj u yich jun cúul xíiw cu kaaba'intic mandrágora[37] tu ch'a'aje' ca tu bisaj ti' x Lea u maama. Le ca tu yilaj x Raquel u yich le xíiwo' tu ya'alaj ti' x Lea: Beet utz a dzáic teen dze'edze'ec le mandrágora, le tu taasaj a waalo'.

¹⁵Ba'ale' x Leae' tu núucaj ti': ¿Ca tuclic jun p'íit ba'al iquil ta toquilac teen in wíicham? Bejela'e' a káat xan a lukes teen u mandrágoraob in waal. X Raquele' tu ya'alaj ti': Wa ca wóolte', tene' quin ch'a'ic u mandrágoraob a waal, teche' ca wenel yéetel Jacob ti' le áakaab'a.

¹⁶Tu ye'esame'enil ca j suunaj Jacob ich coole', x Leae' jóok u ch'a'aj u beel ca tu ya'alaj ti': Bejela'e' yaan a wenel tin wéetel, tumen dzo'oc in majan maniquech yéetel u mandrágoraob in waal. Ti' le áakabo' Jacobe' j ween yéetel x Lea,

¹⁷leti' túune' tu dzaj ti' Jacob u cinco túul paal, tumen Kue' tu yu'ubaj u payalchi'.

¹⁸Ca túun tu ya'alaj x Lea: Le chanpaala' yaan u kaaba'intic Isacar, tumen Kue' tu siibal bo'otajen iquil tin dzajilac in x koos ti' in wíicham.

¹⁹Cu dzo'ocole' x Leae' tu dzaj ti' Jacob u seis túul paal,

²⁰ca tu ya'alaj: Kue' tu dzaj teen jun p'éel ma'alob siibal. Bejela'e' in wíichame' yaan u yiliquen yéetel sen utzil, tumen dzo'oc in síijsic seis u túulul paalal ti', let o'olalo' le chanpaala' Zabulón cu bin u kaaba'inte.

²¹Tu pachale' x Leae' yanchaj jun túul x ch'upul paal, ca tu dzaj u kaaba'int x Dina.

²²Ba'ale' Kue' j ka'aj x Raquel ti'; tu yu'ubaj u payal chi' ca tu cha'aj yantal u yaal.

²³Le ca j yanchaj u yáax paale', tu ya'alaj: Kue' dzo'oc u lukesic teen u subtzilil le x ma' paalilo'.

²⁴U yóolt u Yuumtzil ca yanac u láak in paal. Let o'olale' tu kaaba'intaj, José.

²⁵Cu dzo'ocol u síijsa'al José tumen x Raquele', Jacobe' tu ya'alaj ti' Labán: Cha' in suut ti' in lu'umil.

²⁶Dzáa teen in paalal yéetel in watano'ob, tumen tu yo'olalo'ob j meyajnajen ta wéetel, cha'a in binel. Teche' a sen ojel bix tin meyajtilaquech.

²⁷Ba'ale' Labane' tu núucaj ti': Beet utz a p'áatal tin wéetel. Dzo'oc in na'at ojéeltique', Ku tu qui' t'aan teen ta wo'olal.

²⁸A'al teen bajux a káat a náajalte, teen bíin in bo'ol ti' teech.

²⁹Jacob túune' tu núucaj ti': Teche' a sen oojel bix meyajnajiquen ta wo'olal, bix xan tin canantilac a wacaxo'ob;

³⁰ti' le jun p'íit yaan teech ca'ach ma'ili' in taalbale'; dzo'oc u máan ya'abtal, ti' le kiin kuchiquen tac bejela'e', Yuumtzile' dzo'oc u qui' t'antiquech; a'al teen: ¿Ba'ax kiin quéen chúunuc in meyaj tu yo'olal in paalal?

³¹Ca j ca'a a'ala'ab ti' tumen Labán: ¿Bajux a káat a náajalte? Jacobe' tu núucaj ti': Ma' a bo'otic teen mix ba'al, je'el in suut in meyaj teche' wa ca wóoltic le ba'ax quin in wa'al techa':

³²cha'a in máan ichil a j tamano'ob, u ti'al in jun páaycuntic tuláacal le mejen j boox tamano'obo', bey le mejen j yuuco'ob jóomjom booxo'ob wa le t'úunt'un booxo'obo', leti'ob in bo'olalo'ob.

³³Beyo' le quéen taalaquech a wila'a' buca'aj dzo'oc in náajaltique', je'el a wilic ma' j oocoleni'; tumen wa yaan ichilo'ob ma' jóojom booxo'ob, wa t'úunt'un booxo'ob wa j tamano'ob ma' booxtaque', lelo'obo' tin wocoltaj teech.

³⁴Ca tu núucaj Labán: Ma'alob beyo', quin éejemtic le ba'ax ca wa'alico'.

³⁵Ti'ili'e' kiino' Labane' tu jun páaycuntaj tuláacal le j yuuco'ob t'óot'ol bey le t'úunt'un booxo'obo', wa yaan ca'ach, wa buca'aj sajaquil u tzo'otzelo'obe, bey le mejen j boox tamano'obo', tu dzaj ti' u paalal u cananto'ob.

³⁶Cu dzo'ocole', j luk te j cúuchil yéetel tuláacal u j tamano'ob, ca j náachchajco'ob ti' Jacob ti' jun p'éel cúuchil óox p'éel kiin u xíimbalil. Jacobe' j p'áat u canant u láak u j tamano'ob Labán,

³⁷ca tu ch'acaj u ya'ax kab cóopo', u ya'ax kab almendro yéetel u ya'ax kab castaño, ca tu t'óol dzíilaj u ti'al ca ila'ac u t'óol sajaquilo'ob tumen le j tamanobo';

³⁸cu dzo'ocole' tu dzaj le che'ob u dzíilma actáan ti' le j tamano'ob tu cúuchil tu'ux cu yukico'ob ja'. Te'elo' ti' cu nupicuba'ob le j tamano'ob yéetel u x ch'uupilo'obi', ti' xan cu báaxalo'obi'; u mejenelo'obe' cu síijilo'ob t'óot'ol booxo'ob, jóomjom booxo'ob yéetel t'úunt'un booxo'ob.

⁴⁰Jacob túune' cu jun páaycuntic le aalako'ob t'óol booxo'ob, wa booxo'ob u ti'al cu dzáic actáan ti' u j tamano'ob Labán, bey úuchic u ya'abcuntic u j tamano'ob Jacobo'

⁴¹Je'el jay téen cu nupicuba'ob le poloc aalako'ob u ti'al yantal u mejenilo'obe', Jacobe' cu dzáic le che'ob te tu'ux cu yukico'ob ja'o', ti' jun p'éel cúuchil ca páatac u yilico'ob le che'ob ca'aliquil táan u báaxalo'ob;

⁴²ba'ale' le quéen taalaco'ob ca'ach le jach dzoya'ano'obo' ma' tu dzáic ca'ach le che'obo'. Let o'olalo' le aalako'ob sen dzoya'ano'obo' u ti'al ca'ach Labán, le u jach poloquilo'obo' u ti'al Jacob.

⁴³Bey úuchic u sen ayikaltal Jacobo', kuch yantal ya'abcach u j tamano'ob, palitzilo'ob, x palitzilo'ob, camello'ob yéetel burro'ob.