Read Yucateco Génesis 31 Bible Online

Génesis 31 - Yucateco bible

Génesis 31

¹Ba'ale' Jacobe' tu yojéeltaje', u paalal bin Labane' táan u máan u tzicbalto'ob: Jacobe' dzo'oc u ch'i'ic tuláacal ba'ax ca'ach u ti'al c taata, let o'olal dzo'oc u ayikaltal.

²Tu yilaj xan Jacob ma' ma'alob u pacta'al tumen Labán je'el bix ca'ache'.

³Yuumtzile' tu ya'alaj túun ti' Jacob: Suunen tu lu'umil a taata, tu'ux caja'an a láaktzilo'ob, teen quin in láakintech.

⁴Jacobe' tu túuxtaj t'anbil x Raquel yéetel x Lea, u ti'al ca xi'ico'ob ich cool tu'ux caja'an ca'ach yéetel u j tamano'ob,

⁵ca tu ya'alaj ti'ob: Dzo'oc in wilic, a taataexe' ma' tu t'aaniquen je'el bix ca'ache'; ba'ale' u Ku in taatae' mantadz cu láakintiquen.

⁶Te'exe' a sen ojele'ex, tene' in meyajtmaj a taataex je'el bix quin páajtale',

⁷leti' xane' dzo'oc u tusiquen, ya'ab u téenel cu kexic u bo'olal in meyaj. Quex beyo' Kue' ma' tu cha'ic u beetic teen mix jun p'éel kaas;

⁸ba'ale' jela'an u jóokol ti', le ca tu ya'alaj: In ca'aj in bo'ot teech yéetel j tamano'ob jóomjom boox', tuláacal u x ch'uupilo'obe' cu síijsico'ob u mejenilo'ob jóomjom booxo'ob; le ca tu ya'alaj: In ca'aj in bo'ot teech yéetel t'óot'ol booxo'obe', tuláacal u mejenilo'ob túune' t'óot'ol boox u síijilo'ob.

⁹Bey úuchic u luksa'al ti' tumen Ku tuláacal u j tamano'ob ca tu dzáa ti' teen.

¹⁰Jun p'éel u kiinil u báaxalo'ob le aalako'obo', yanchaj teen jun p'éel náay, ichil in wayake' tin wilaj bix u x yo'omta'al le x ch'uupo'ob tumen le u j xiibilo'ob t'óot'ol booxo'ob yéetel le t'úunt'un booxo'obo'.

¹¹Ichil le in náayo' u ángel Ku tu t'anajen tin kaaba', teen xane' tin núucaj ti' Je'elena'.

¹²Ca túun tu ya'alaj teen le ángelo': Jach pact ma'alob, yaan a wilique' tuláacal le j tamano'ob yo'omquintico'ob u x ch'uupilobo' t'óot'ol booxo'ob, wáawayo'ob yéetel t'úunt'un booxo'ob, tumen dzo'oc in sen ilic tuláacal le ba'axo'ob u beetmaj teech Labano'.

¹³Teen le Ku chíicpaj teech Betelo', te tu'ux ta jun páaycuntaj le tuunich, ca xan ta beetaj teen jun p'éel séeb chi'e'. Co'ox, tzelabáa ti' le cúuchila', suunen te j lu'um tu'ux síijecho'.

¹⁴X Raquel yéetel x Lea túune' tu núucajo'ob ti': Mina'an mix jun p'éel ba'al c ti'al tu yotoch c taata,

¹⁵jela'an c ilic, bey mix máaco'on ti'e'. Ma' chéen lelo', tu conajo'on, tu ayikalcuntubáa yéetel le bo'ol ta beetaj ti' iquil dzo'oquic a beel t éetelo'.

¹⁶Tu jaajile', tuláacal le ayikalil tu luksaj Ku ti' c taatae' c ti'al yéetel ba'al u ti'al c paalal. Bey túuno' beet tuláacal ba'ax dzo'oc u ya'alic teech Ku.

¹⁷Jacobe' tu líiksajubáa u ti'al u suutbal Canaán, tu'ux caja'an ca'ach u taata. Ca tu beetaj u na'at'al le camello'ob tumen u paalal yéetel tumen u yatano'ob, tu ch'a'aj tuláacal ba'axo'ob yaan ti'e', ca j bin yéetel tuláacal le ba'alche'ob tu náajaltaj Padan-aram.

¹⁸

¹⁹Ca'aliquile' Labane' j bin táanxel tu'ux u kos u j tamano'ob, x Raquele' tu yoclaj le beetbil kuob cu ti'alintico'ob bey láaktzilil.

²⁰Bey úuchic u tu'usul Labán le arameo tumen Jacob iquil tu baljilac u binbal.

²¹J púudz yéetel tuláacal le ba'ax yaan ti'o'. Séeba'an tu ch'actilac u yáalcab ja'il Éufrates, bin tu beetaj tac tu káaxilo'ob Galaad.

²²Cu dzo'ocol óox p'éel kiine', Labane' tu yojéeltaj u púudzul Jacob.

²³Láakinta'an túun tumen u láaktzilo'obe' ca j jóok u ch'a'apachte, cu dzo'ocol u máan siete kiino'obe' tu chucpachtaj tu káaxilo'ob Galaad.

²⁴Ba'ale' ti' le áakabo' Kue' j chíicpaj ti' Labán le j arameoil ichil jun p'éel náay, ca tu ya'alaj ti': Ch'e'en xiquinte, ma' a dzíidzic t'anic Jacob.

²⁵Labane' tu chuc pachtaj Jacob tu káaxilo'ob Galaad, le tu'ux je'el ca'ach Jacob. Ti' xan je'el Labán yéetel u láaktzilo'obi',

²⁶ca tu tzaj t'antaj ti' Jacob: ¿Ba'ax teen ta tusajen? ¡Ta taasaj in x ch'upul paalal beyo'ob wíinico'ob j ma'acho'ob ti' ba'atele'!

²⁷Ba'ax teen ta tusajen iquil báalam púudziquech, mix ta wa'alaj teni'. Wa ca in wojéelte', dzo'oc ca'ach in láakintic a jóokbal yéetel qui'imac óolale', yéetel boboj paax, bey yéetel arpae'.

²⁸Mix ta p'ataj in dzu'udzic in x ch'upul paalal, mix in dzu'udzic in wáabilo'obi'. Péecnajech beyech jun túul j ma' na'ate'.

²⁹Tene' dzo'oc ca'ach in beetic te'ex loob ti' tuláacale'ex wa ma' tu yo'olal tu t'anajen oknejiac u Ku a taata, ca tu ya'alaj teen: U'uy ma'alob, ma' a dzíidzic t'antic Jacob.

³⁰Ba'ale', wa jach a káat suut tu yotoch a taatae', let o'olal xan jóok a binbale', ¿ba'axten ta woclaj in kuob?

³¹Jacob túune' tu núucaj ti' Labán: Tu yo'olal sajacchajen; tene' tin tuclaj je'el a toquic teen a x ch'upul paalal quex ma' in káate'.

³²Ba'ale' wa ti' wa máax yaan a kuobe'. ¡Ca quíimic! C láaktzilo'obe' je'el u jaajcuntico'obe'. A'al teen, wa yaan teen ba'al a ti'ale' bise. Ba'ale' Jacobe' ma' u yojel ca'ach wa x Raquel tu yoclaj u beetbil kuobo'.

³³Labane' j ooc tu pasel Jacob, cu dzo'ocole' ti' u ti'al x Leae' bey xan ti' le u ti'alo'ob le ca'a túul x koso'obo', ba'ale' ma' tu nactáantaj le beetbil kuobo'. Le ca j jóok tu pasel x Leae', j ooc ti' le u ti'al x Raquelo',

³⁴leti'e' tu ch'a'aj le beetbil kuobo' ca tu dzaj ichil u xéequil le camello, cu dzo'ocole' ca j culaj yóokol. Labane' tu bojlaj tuláacal le paselo', ba'ale' ma' tu nactáantaji'.

³⁵X Raquel túune' tu ya'alaj ti': Taat, ma' a p'u'ujul wa ma' tin líikil tumen táan u in wilic in nook. Tu yo'olal máanic Labán u caxant le beetbil kuobo' cu dzo'ocole' ma' tu nactáantaji'

³⁶Jacobe' j p'u'uji ca tu tzaj t'antaj ti' Labán beya': ¿Ba'ax si'ipilil tin beetaj, ba'ax in keban iquil ta ch'a'a paachtilaquen yéetel jaaj óolal?

³⁷Dzo'oc a bojlic tuláacal ba'ax in ti'al, ¿ba'ax ta nactáantaj ti' ba'alo'ob ta wotoch u taal? ¡Dzáa way tu táan a láaktzilo'ob yéetel tu táan in ti'alo'oba', u ti'al ca u ya'alo'ob máax ti' to'on ca'a túulo'on a'alic u jaajil!

³⁸Buul veinte ja'abo'ob meyajnajen ta wéetel, mix jun téen j p'áat ma' u chuquic u kiinil u síijsaj a x tamano'ob mix a x yuuco'obo'; mix jun téen tin ch'a'aj in jaant quexi' jun túul u mejenilo'ob a j tamano'ob;

³⁹mix jun téen tin taasaj teech le aalako'ob cu quíimsa'alo'ob tumen le j chi'ibalo'obo', wa ma' yanchaj in bo'otic leti'e' loobo'; yéetel kiin wa yéetel áakab ca ocla'ac a waalake', teche' ca beetic in bo'otic.

⁴⁰Yéetel kiine' quin mukyajtic ooxow; yéetel áakabe' quin mukyajtic que'el, tac in wenel ca'ach cu bin.

⁴¹Veinte ja'abo'ob tin beetaj ta wotoch, je'el le ba'ax dzaab tena': Tu yo'olal a ca'a túul x ch'upul paalale' tin meyaj teech catorce ja'abo'ob; tu yo'olal a waalako'obe' seis ja'abo'ob; jun tiich' ca kexic ca'ach u tojol in náajal.

⁴²Wa ma' tu yo'olal ti'anchajic tin wéetel u Ku Abrahame', le Ku cu kultic ca'ach Isaac in taatae', jach in wojel, chéen x pikib kabil ca bin a wa'al teen ca'ach ca xi'iquen. Ba'ale' Ku tu yilaj in óotzil óolal yéetel u yich in meyaj, oknejiac túune' tu ya'alaj teech u nu'uc.

⁴³Labán túune' tu núucaj ti' Jacob: Le x ch'upul paalala', in x ch'upul paalal, le áabiltzilo'obo' in wáabilo'ob; le j tamano'obo', in j tamano'ob; ¡tuláacal le ba'alo'ob ca wilic weya' láaj in ti'al! Quex beyo', ¿ba'ax je'el u páajtal in beetic bejela'a' tu yo'olal in x ch'upul paalal, tu yo'olal le paalal yanchaj ti'obo'?

⁴⁴Let o'olale' co'oten, teech tin wéetele' co'ox beetic jun p'éel nup t'aan, u ti'al ca meyajnac bey jun p'éel jaajcunajil ichil tu ca'a túulalo'on.

⁴⁵Jacob túune' tu ch'a'aj jun p'éel tuunich ca tu dzaj bey u chuun jun p'éel ocome',

⁴⁶ca tu ya'alaj ti' u láaktzilo'ob: ¡Much'quint te'ex tuunicho'ob! Tuláacalo'obe' tu much'quintajo'ob tuunicho'ob u ti'al u beetico'ob jun p'éel multuun, ti' jano'ob tu yicnal le multuuno'.

⁴⁷Labane' ichil u t'aane' tu dzaj u kaaba'int le cúuchilo' Jegar Sahaduta, Jacobe' ichil xan u t'aane' leti'e' tu dzaj u kaaba'inte' Galaad.[38]

⁴⁸Labán túune' tu ya'alaj: Bejela'e' le multuuna' u jaajcunajil ichil tu ca'a túulalo'on. Le t o'olal Galaad u kaaba' le cúuchilo',

⁴⁹bey xan tu kaba'intaj Mizpa, tu yo'olal tu ya'alaj Labán: Yuumtzil ca u pact to'on le quéen ch'éenec c ilicbae'.

⁵⁰Wa ca loobiltic in x ch'upul paalale', wa xan cu dzo'ocol a beel yéetel u láak co'olelo'ob u nuupinto'obe', quex ca mina'anac mix máac bey aj jaajcunaj ichil to'one' Ku ca u beetajubáa aj jaajcunajil.

⁵¹Labane' tu ca'a a'alaj ti' Jacob: Pacte, je'el le multuunicho'obo' yéetel le ocom tin dzaj ichil to'on ca'a túulo'ona'.

⁵²Tu ca'a p'éelal beyo'ob aj jaajcunajilo'obe', lelo' u káat u ya'ale': mix teech, mix teen bíin c ch'act u ti'al c loobilticbáa.

⁵³U Ku a nool Abraham yéetel in nool Nacor ca u ya'alo'ob u jaajil ichil to'on tu ca'a túulalo'on. Jacob túune' jalach t'aanaj tu kaaba' Junab ku, le Ku cu kulta'al ca'ach tumen Isaac u taatae'.

⁵⁴Cu dzo'ocole', Jacobe' tu táanbesaj quíimsbil ba'alche'ob te j jo'ol lu'umo', ca tu t'anaj janal u láaktzilo'ob u ti'al u kax t'antico'ob ba'ax dzo'oc u beetico'ob; jaano'ob tuláacalo'ob, ti' xan tu máansajo'ob áakab te jo'ol lu'umo'.

⁵⁵Tu ja'atzcabil u láak kiine', j líik Labane' ca tu dzu'udzaj u yáabilo'ob bey xan u x ch'upul paalal; cu dzo'ocol u qui' t'antico'obe' suunaj tu lu'umil.