Read Yucateco Génesis 32 Bible Online

Génesis 32 - Yucateco bible

Génesis 32

¹Jacobe' tu ch'a'aj u beel, dze'edze'ec u ángelo'ob Ku túune' jóoko'ob u nactáanto'ob.

²Le ca j ila'abo'ob tumen Jacobe', leti'e' tu ya'alaj: Lela' u tzúucul u aj ba'atelo'ob Ku. Let o'olal tu dzaj u kaaba'int le cúuchilo' Mahanaim.[39]

³Jacobe' tu túuchi'itaj wa jay túul aj bisaj t'aano'ob tu caajil Seir, lela' u lu'umil Edom, u ti'al u dzáa u yojéelt Esaú u sucu'une' ba'ax kiin u kuchul,

⁴ca tu kuben t'antaj ti'ob le péectzila': A'ale'ex ti' Esaú in sucu'une': A wíidzin Jacobe' cu dzáicubáa tu ni' a wooc, cu túuxtic xan a'albil teech: Ti' buca'aj kiino' j cajlajen tu yotoch Labán,

⁵yaan teen wacaxo'ob, burro'ob, j tamano'ob, j palitzilo'ob yéetel x palitzilo'ob. Leti' le péectzil quin túuxtic ti' in dzuulila', quin dzíiboltic teech a wutzil óolal.

⁶Le ca j suunajo'ob le aj bisaj t'aano'obo' tu ya'alajo'ob ti' Jacob: Bino'on c il Esaú a sucu'un, táan u t aal u kamech jach tu yoquil, yéet taal cuatro cientos máaco'ob.

⁷Le ca tu yu'ubaj Jacob le t'aana', tu sen ch'a'aj sajaquil ca tu sen tucultaj. Ca túun tu jóokesaj ca'a jaatz ti' le máaco'ob u yéet binelo', tu jatzláantaj xan le j tamano'ob, le wacaxo'ob bey le camello'obo'.

⁸Tumen tu tuclaj: wa cu taal Esaú u beet loob ti' jun jaatze', le u láak jun jaatzo' je'el u páajtal u yáalcabe'.

⁹Cu dzo'ocole', jo'op' u payalchi': Yuumtzil, u Kuech in nool Abraham yéetel u Kuech in taata Isaac, teech a'al teen ca suunaquen tin lu'umil yéetel ti' in láaktzilo'ob, ta wa'alaj xan teen; yaan u bin teen utzil:

¹⁰Ma' tin najmatic a wutzil mix a chuca'an óolal iquil ta wáantilaquen. Tene' tin ch'actaj u yáalcab ja'il le Jordano', mix jun láak ba'al tin bisaj chéen in xóolte', bejela'e' dzo'oc u kuchul yantal teen ca'a múuch' cajtalilo'ob.

¹¹Beet teen utz, ma' a cha'ic in quíimil tu kab in sucu'un Esaú. Sajaquen ca taalac u beet teen loob yéetel ca u quíimes in watano'ob yéetel in paalal.

¹²Teche' jach sáasil a wa'almail yaan u bin teen utzil, in ch'i'ibal xane' yaan u sen ya'abtal je'el bix u p'ayachil u sa'am lu'umil le ka'anabo', ma' tu páajtal u xo'ocol.

¹³Ti' le áakabo' jacobe' j ween te'elo', ti' tuláacal ba'axo'ob yaan ti'e' tu yéeyaj siibalo'ob u ti'al Esaú u sucu'un:

¹⁴docientos x yuuco'ob, veinte j yuuco'ob, dos cientos x tamano'ob, veinte j tamano'ob,

¹⁵treinta x camello'ob táantic u síijsajo'obe' pa'ate' yéetel u mejenilo'ob, cuarenta x wacaxo'ob, diez j wacaxo'ob veinte x burraob, diez burro'ob.

¹⁶Cu dzo'ocole' tu kubaj ti' u palitzilo'ob jujun páayil u múuch'ulo'ob, ca tu ya'alaj ti'ob: Máanene'ex táanil, ile'ex ma' u náadzal jun múuch' ti' u láak.

¹⁷Ti' le yáax tu túuxtajo', tu ya'alaj ti': Le quéen u nactáan teech in sucu'un Esaue', le quéen u káatchi'it ti' teech máax a dzuulile', tu'ux ca bine'ex yéetel máax ti'altic le áalako'ob ca bisico',

¹⁸ca núuquic ti': Jun p'éel siibal a ti'al, in dzuulil Esaú, cu túuxtic teech Jacob a palitzil. U ti'al a wojéeltic, leti'e' tzay paach u taal ti' to'on.

¹⁹Bey xan tu ya'alajilac ti' le u ca'a túul tu túuxtajo', bey ti' u yóox túulo', ti' tuláacal máaxo'ob bisico'ob u múuch'ulo'ob le aalako'obo' tu ya'alaj ti'ob: Le quéen a nactáante'ex Esaue' láaili' bey ca bin a wa'alique'ex ti'o',

²⁰bey xan a'ale'ex ti': Jacob a aj meeyjule' tzaylan paach u taal ti' to'on. Lela' tu beetaj Jacob tu yo'olal tu tucultilac: In ca'aj in jóoms u yóol u p'u'ujul yéetel le siibalo'ob quin yáax túuxtic ti'a', cu dzo'ocole' quin wilic tin wichil. Je'elajqui u yutzil kamiquene'.

²¹Bey túuno' le siibalo'obo' bisa'abo'ob táanil, leti'e' j p'áat u máans áakab tu'ux jelecbalo'.

²²Ti'li'e' áakabo' Jacobe' j líiki', tu cha'aj tu ca'a túulal u yatano'obe', tu ca'a túulal u x kooso'obe', yéetel u once paalale', ca tu beetaj u ch'actico'ob u beel u yáalcab ja'il Jaboc,

²³pa'ate' yéetel tuláacal ba'ax yaan ca'ach ti'.

²⁴Le ca j p'áat Jacob chéen tu juune', jun túul máac mukul muuknaj yéetel tac ca j sáaschaji';

²⁵ba'ale' le máaco' tu yilaj ma' tu páajtal u pa'ic u muuk Jacobe', ca tu loxaj tu'ux cu nupcubáa u baaquel u muuk yooc, ca j júuk le baac ti' Jacob ca'aliquil táan u mukul muuk yéetelo'.

²⁶Le máac túuno' tu ya'alaj ti': Cha'akabteni', tumen táan u bin u sáastal. Ca tu núucaj Jacob: Wa ma' ta qui' t'antiquene' ma' tin cha'akabtiquech.

²⁷Le máaco' tu káat chi'itaj: ¿Bix a kaaba'? Leti'e' tu núucaj: In kaaba'e' Jacob.

²⁸Le máac túuno' tu ya'alaj ti': Ma' bíin a ca'a kaaba'int Jacobi'. Bejela'e' a kaaba'e' Israel,[40] tumen teche' dzo'oc a mukul muuk yéetel Ku, yéetel wíinico'obe' dzo'oc a pa'a' muuk.

²⁹Jacobe' káatchi'inaj ti': Bejela'e' a'al teen bix a kaaba'. Ba'ale' le máaco' tu núucaj ti': ¿Ba'ax u ti'al ca káatchi'itic in kaaba'? Cu dzo'ocole' le máaco' tu qui' t'antaj te j cúuchilo'.

³⁰Jacob túune' tu dzaj u kaaba'int le cúuchilo' Penuel,[41] tumen tu ya'alaj: Tin wilaj Ku queetlan ich; quex beyo' cuxa'anen tac walquila'.

³¹Táan ca'ach u ch'actic Penuel ca j tíip' kiin; ba'ale' tu yo'olal u baaquel u muuk yooque' istiquia' u xíimbal.

³²Let o'olalo' tac bejela'e' u paalal Israele' ma' tu jaantico'ob le xiich' nupic u baaquel le u muuk ooco', tumen ti' j lo'ox Jacobi'.