Read Yucateco Génesis 33 Bible Online

Génesis 33 - Yucateco bible

Génesis 33

¹Le ca tu yilaj Jacob láakinta'an Esaú tumen cuatro cientos máaco'obe', tu t'oxla'antaj le paalalo'ob ichil x Lea, x Raquel yéetel le ca'a túul x palitzilo'ob.

²Tu dzaj táanil le x palitzilo'ob yéetel u yaalo'obo', cu dzo'ocole' x Lea yéetel u yaalo'ob, tu pachale' x Raquel yéetel José.

³Cu dzo'ocole' ca j máan táanil ti'ob; ca j noclaj tac cóojic siete u téenel u táan jo'olal j lu'um, bey tu beetilaco' tac ca j náadz tu yicnal u sucu'un.

⁴Ba'ale' Esaue' áalcabnaj u nactáante, tu méekaj, tu súut dzaj u kab tu caal, tu méekaj ca xan tu dzu'udzaj. Tu ca'a túulalo'ob okolnajo'ob.

⁵Cu dzo'ocole' Esaue' tu sen pactaj le co'olelo'ob yéetel le paalalo'obo', ca tu káatchi'itaj: Le lo'oba' ¿máaxo'obi? Ca tu núucaj Jacob: Lelo'oba' in paalal u dzaamaj Ku ti' le a palitzila'.

⁶Le x palitzilo'ob túuno' j náadzo'ob yéetel u paalalo'obe' ca j noclajo'ob lu'um;

⁷cu dzo'ocole' j náadzo'ob x Lea yéetel u paalal ca j noclajo'ob xan, tu dzoocbalaque' j náadzo'ob José yéetel x Raquel, bey xan noclajo'ob.

⁸Esaue' tu téec káatchi'itaj: ¿Ba'ax ca tucultic a beetic yéetel tuláacal le much'lan múuch' aalako'ob tin sen nactáantajo'? Ca tu núucaj Jacob: U ti'al in najmatic a wutzil óolal.

⁹Ca tu núucaj Esaú: Ma' tzai' in láak; tene' sen yaan teni', p'áaten yéetel ba'ax a ti'al.

¹⁰Ba'ale' Jacobe' tu sen a'alaj ti': Ma', wa dzo'oc in najmatic a wutzil óolale', beet utz a kamic le siibala', tumen iquil in wiliqueche' o'oli' bey táan in wilic Kue', u jaajile' teche' dzo'oc a kamiquen sen utz.

¹¹Quin káat óoltic ca a kam le siibal tin taasaj techa', tumen Kue' tu ayikalcuntajen, mix ba'al cu bineltic teen. Tu yo'olal sen káat óolnajic Jacobe', Esaue' yanchaj u kamic le siibalo';

¹²ba'ale' tu ya'alaj: Ma'alob, co'one'ex, lukco'on waye'. Teen quin bin táanil ti' teech.

¹³Jacobe' tu ya'alaj ti' xan: In nojoch suuc'uun, teche' táan a wilic, le paalalo'oba' ma' jach mu'uka'ano'obi', cu dzo'ocole' yaan xan in canantic le j tamano'ob yéetel le wacaxo'ob yaan u mejenilo'obo'; wa cu sen ca'analo'obe' je'el u láaj quíimilo'ob le j tamano'ob ti' jun p'éelili' kiine'.

¹⁴Ma'alob wa ca xi'iquech táanil ti' teen; tene' cháanbelil quin j bin, je'el bix cu bin u xíimbalo'ob le aalako'ob cu bino'ob táanil ti' teno', je'el bix xan chaanbéelil u xíimbalo'ob le paalala', tac quéen kuchuco'on Seir u ti'al c nupicbáa ta wéetel.

¹⁵Esaue' tu ya'alaj: Ma'alob cha' in p'atic teech dze'edze'ec le máaco'ob cu taalo'ob tin wéetela'. Ba'ale' Jacobe' tu núucaj ti': ¿Ba'ax o'olal ca chéen chi'ichnactal, utz tin wóol ca xi'ico'ob ta wéetel?

¹⁶Ti'ili'e' kiino' Esaue' j suunaj tu caajil Seir.

¹⁷Ba'ale' Jacobe' j p'áat Sucot, te'elo' tu beetaj jun p'éel naj u ti'alinte, tu beetaj xan máacano'ob u ti'al u yaalako'ob. Let o'olal tu dzaj u kaaba'int le cúuchilo' Sucot.[42]

¹⁸Le ca j luk Padan-arame', tooj u yóol yéetel ma'alob kuchic Canaán ca j cajlaj actáan ti' u nojoch caajil Siquem.

¹⁹Yéetel cien taakine' tu manaj jun xéet' lu'um ti' u paalal Hamor, u taata Siquem, te tu dzaj u cajtali'.

²⁰Cu dzo'ocole' tu beetaj jun p'éel u multuunil kultaj, ca tu dzaj u kaaba'int El-Elohe-Israel.[43]