Read Yucateco Génesis 34 Bible Online

Génesis 34 - Yucateco bible

Génesis 34

¹Dina le x ch'upul paal tu síijsaj x Lea ti' Jacobe', j bin u xíimbalt u yéet x ch'úupalalil caja'ano'ob ti' le cúuchilo'

²Ba'ale' ila'ab tumen Siquem u paal Hamor heveoil, u nojochil le cúuchilo' tu beetaj óolaj ti' iquil tu jáanpaytilac ca j chilaj x yéetel, ca tu wach'aj sujuytaj.

³Quex beyo', sen utzchaj tu yich leti', tu yóoltaj ca'ach u beet ca'a óolta'ac tumen x Dina.

⁴Ca túun j t'aanaj Siquem yéetel Hamor u taata, ca tu ya'alaj ti': Taat, xeen a káat le x ch'úupal u ti'al ca dzo'ococ in beel x yéetel.

⁵Jacobe' tu yojéeltaj j beeta'ab óolaj ti' x Dina u x ch'upul paal tumen j Siquem, chéen ba'ale' ma' tu ya'alaj mix ba'ali' tumen u paalale' ti' yano'ob ca'ach ich co'ole', táan ca'ach u canantico'ob u yaalako'ob, le ca suunajo'obe' ca tu ya'alaj ti'ob.

⁶Ca'aliquile', j Hamor u taata j Siqueme', j bin t'aan yéetel Jacob.

⁷Le ca j u'ulo'ob u paalal Jacob te j káaxo' tu yojéeltajo'ob ba'ax dzo'oc u yúuchul, sen p'u'ujo'ob tumen lelo' jun p'éel ba'al sen nojoch subtzilil u ti'al Israel iquil chilajic j Siquem yéetel u x ch'upul paal Jacob. Lelo' jun p'éel ba'al ma' unaj u yúuchuli'.

⁸Ba'ale' j Hamore' j t'aanaj yéetelo'ob ca tu ya'alaj ti'ob: In j xi'ipal j Siqueme' jach utz tu yich a wíidzine'ex. Jach beete'ex utz a cha'ique'ex u dzo'ocol u beel x yéetel,

⁹suunene'ex láaktzilil ti' to'on; beyo' to'one' je'el u páajtal u dzo'ococ c beel yéetel a x ch'upul paale'exe', te'ex xane' je'el u páajtal u dzo'ocol a beele'ex x yéetel le c ti'alo'obe'.

¹⁰P'áatene'ex cáajal t éetel. Le lu'uma' bey ba'al a ti'ale'exe'; cajlene'exi', beete'ex ba'al a cuxtale'ex, mane'ex lu'umo'ob.

¹¹Siquem xane' tu ya'alaj ti' u taata x Dina yéetel ti' u sucu'uno'ob: Tene' quin káat óoltic te'ex ca a éejemt te'ex, je'el in dzáic te'ex je'el ba'alac a káate'exe'.

¹²Mix ba'al ti' wa jun p'éel nojoch bo'olal asab ya'abil ti' u suuquil, tene' je'el in bo'otic te'exe', je'el xan in dzáic te'ex ya'ab siibalo'obe'; chéen cha'ex u dzo'ocol u beel le x ch'úupal tin wéetela'.

¹³Ba'ale', tu yo'olal tu beetaj óolaj ti' x Dinae', u paalal Jacobe' tu núucajo'ob ti' yéetel ti' Hamor u taata, ma' yéetel jaaj óolali',

¹⁴tu ya'alajo'ob ti'ob: Ma' tu páajtal c dzáic c íidzin ti' jun túul j xiib ma' súutkupta'ani', tumen lelo' su'ubtzil c ti'al.

¹⁵Je'el u páajtal c éejemtique' wa te'exe' ca béeytale'ex je'el bixo'one', lela' u káat ya'ale'; yaan u súut kupta'al tuláacal j xiib yaan ichile'ex.

¹⁶Wa je'ele' te'exe' cu dzo'ocol a beele'ex yéetel c ch'upul paalal, to'on xane' cu dzo'ocol c beel yéetel a ti'ale'exi'; c cajtal ichile'ex beyo' c suut jun p'éelili' caaj.

¹⁷Ba'ale' wa ma' ta éejemtique'ex ba'ax c a'alique', c lukul waye' c bisic c íidzin.

¹⁸J Hamor yéetel j Siquem u paale' tu éejemtajo'ob le ba'ax a'ala'ab ti'obo'.

¹⁹Le j xi'ipalo' tu séeblaquil tu súut kuptajubáa, ma' tu pa'ataj u láak kiini', tumen jach utzchaj tu yich u x ch'upul paal Jacob. Tu yo'olal cu jach chíin poolta'al x Siquem ichil tuláacal u láaktzilo'ob u taata,

²⁰j bino'ob leti' yéetel j Hamor u taata tu jool le nojoch caajo', tu'ux cu kax t'anta'al tuláacal ba'alo'ob, ca tu ya'alajo'ob ti' tuláacal le cajnáalo'obo'.

²¹Le máaco'oba' utz u bisicuba'ob t éetel, bin u ca'ajo'ob cajtal ichilo'on yéetel xan bin u ca'ajo'ob j meyaj waye', tu jaajile' yaan ya'ab lu'um u ti'alintajo'ob; to'one' je'el u páajtal c dzo'ococ c beel yéetel u x ch'upul paalalo'obe', leti'ob xane' je'el u páajtal u dzo'ocol u beelo'ob yéetel le c ti'alo'obe'.

²²Chéen ba'ale' u ti'al ca páatac c béeytal jun p'éel caaje', leti'obe' chéen u káato'ob jun p'éel ba'al: tuláacal bin le c éet xiibo'ob yaan u súut kupta'alo'ob je'el bix suuquil ti'obe'.

²³Tuláacal ba'ax u ti'alo'ob yéetel u yaalako'obe' bíin c ti'alac. Chéen yaan c a'alic bey, leti'ob túune' cu p'áatalo'ob cajtal t éetel.

²⁴Tuláacal le u j xiibilo'ob cajnáalo'ob ichil le nojoch caaj u chucmajo'ob u nojochil u ti'al aj ba'atele', tu éejemtajo'ob le ba'axo'ob tu ya'alajo'ob j Hamor yéetel j Siquem u paal, ca j súut kupta'abo'ob.

²⁵Ba'ale' Simeón yéetel Leví u paalal Jacob u sucu'uno'ob x Dinae', j bino'ob tu yóox p'éel kiin te noj caajo', ca'aliquil le xiibo'ob táan u mukyajtico'ob u ki'inamil le súut kuptajo', tu jíiltajo'ob u máascabo'ob ca tu láaj quíimsajo'ob le xiibo'ob, ma' yanchaj máax káatal tu beelo'obi'

²⁶yéetel máascab tu quíimsajo'ob j Hamor yéetel j Siquem u paal; cu dzo'ocole' tu jóoksajo'ob x Dina tu yotoch Siqueme' ca j bino'ob.

²⁷Kucho'ob xan u láak u paalal Jacob, cu dzo'ocol u máano'ob yóokol le quimeno'obo', tu ch'a'ajo'ob le ba'alo'ob yaan te j caajo', bey tu sutilaco'ob le kaas beeta'ab ti' x Dina u yíidzino'ob.

²⁸Tu bisajo'ob j tamano'ob, Wacaxo'ob, burro'ob, tac xan tuláacal le ba'alo'ob yaan ich caajo', bey le yano'ob ichil le coolo'obo'.

²⁹Tu ch'a'ajo'ob tuláacal le ba'alo'ob ichil le najo'obo', tu bisajo'ob xan le paalalo'obo' yéetel le co'olelo'obo'

³⁰Jacob túune' tu ya'alaj ti' Simeón yéetel ti' Leví: Te'exe' dzo'oc a p'atiquene'ex kaasil. Bejela'e' u cajnáalilo'ob le cúuchila', le j cananeob yéetel le j ferezeob, binel u ca'ajo'ob u ch'a'a p'eecteno'ob. Bíin u much'uba'ob u ti'al u loobiltiqueno'ob, tu yo'olal ma' ya'ab máaco'ob yaan tene' bíin u quíimso'ono'ob tac xan in láaktzilo'ob.

³¹Leti'obe' tu núucajo'ob ti': ¿Ca tucultique' u najmal u beetic ba'al ti' c íidzin bey jun túul x chocó pool co'olele'?