Read Yucateco Génesis 35 Bible Online

Génesis 35 - Yucateco bible

Génesis 35

¹Kue' tu ya'alaj ti' Jacob: Líikesabáa, xeen j cajtal Betel. Te j cúuchilo' beet jun p'éel u multuunil kultaj ti' le Ku chíicpaj teech ca'aliquil táan ca'ach a wáalcab ti' a sucu'un Esaú.

²Jacob túune' tu ya'alaj ti' u láaktzilo'ob yéetel ti' tuláacal le máaxo'ob láakintico': Pule'ex le beetbil kuob yaan ichile'exo', ichquilnene'ex, kex xan a nooke'ex.

³Co'one'ex séeba'an Betel, tumen in ca'aj in beet jun p'éel u multuunil kultaj ti' u tzicbe'enil Ku máax j áanten le ca j mukyajnajene', tu láakintajen xan tuláacal tu'ux j máanen.

⁴Leti'ob túune' tu kubajo'ob ti' Jacob tuláacal le beetbil kuob tac xan le tuupo'ob yaan ca'ach tu xiquino'obe', Jacobe' tu láaj mucaj tu chuun jun cúul béec yaan ca'ach tu lu'umil Siquem.

⁵Le ca jóoko'obe', Kue' tu beetaj u sen sajactal tuláacal u taatailo'ob le caajo'obo', tu yo'olal lelo' ma' ch'a'apachta'ab u paalal Jacobi'.

⁶Jacob yéetel le máaxo'ob láakintico' j kucho'ob tu caajil Luz, jun p'éel nojoch caaj cu kaaba'intic xan Betel yaan tu lu'umil canaán.

⁷Tu beetaj jun p'éel u multuunil kultaj, ca tu dzaj u kaaba'int le cúuchilo' El-Betel, tumen chíicpaj Ku ti' te'elo' ca'aliquil táan u yáalcab ti' u sucu'un,

⁸ti' xan j quíim x Débora le co'olel canant x Raquele', ca j mu'uc yáanal jun cúul béec, naadz Betel. Jacobe' tu dzaj u kaaba'int le cúuchilo': u béequil okol.

⁹Ca'aliquil táan u suut Jacob Padan-arame' Kue' chíicpaj ti' tu ca'a téen ca

¹⁰tu qui' t'antaj beya': Teche' Jacob ca kaaba'intic, ba'ale' bejela'e' ma' bey ca j bin t'anbilo'; Israel a kaaba' bejela'e'. Cu dzo'ocol u ke'exel u kaaba' tumen Kue',

¹¹j a'ala'ab ti': tene' u Junab Kuilen tuláacal páajtalil; yanac ya'ab a paalal, bey xan yanac ya'ab ch'i'ilancab, ti' teech bíin jóokoc jun múuch' caajo'ob, yéetel ya'abcach caajo'ob ichil xan a ch'i'ibale' bíin yanac ajawo'ob.

¹²Le lu'um tin dzaj ti' Abraham yéetel ti' Isaaque', quin dzáic xan ti' teech, pachal ti' teche' bíin in dzáa xan ti' a ch'i'ibalo'ob.

¹³Le ca j luk Ku ti' le cúuchil tu'ux t'aanaj ca'ach yéetel Jacobo',

¹⁴Jacobe', tu ch'a'aj jun p'éel tuuniche', ca tu wa'alcunsaj, j p'at bey jun p'éel ocom túune', te tu'ux t'aanaj Kuo'; cu dzo'ocole' tu wecaj aceite yéetel vinoe', u ti'al u jun páaycuntic,

¹⁵ca tu dzaj u kaaba'int Betel le cúuchilo'.

¹⁶Cu dzo'ocole' j kucho'ob Betel; ma' jach náach yanilo'ob ti' Efratae', ca j yanchaj u chan paal x Raquel, talam úuchic u síijsaj.

¹⁷Tu jach talamile' le x aalantzilo' tu ya'alaj ti': Ma' ch'a'ic sajaquil dzo'oc a síijsic jun túul chan j xi'ipal.

¹⁸Ba'ale' leti'e' ta'itac ca'ach u quíimil, ichil u x chakéetile' tu ya'alaj: Benoni, u kaaba' le chan paalo', quex beyo', u taata le chan paalo'; Benjamín tu dzajilac u kaaba'inte.

¹⁹Bey úuchic u quíimil x Raquel, ca j mu'uc tu bejil Efrata, bejela'e' cu kaaba'intic Belén.

²⁰Jacobe' tu líiksaj jun p'éel pak yóokol u mucnal u ti'al u ka'ajsa'al, le u pakil ka'ajsajilo' tac bejela'e' cu chíicultic u mucnal x Raquel.

²¹Israele' j túul xíimbalnaj tac tu witzil najil Edar.

²²Ca'aliquil ti' caja'an Israel te j cúuchilo', Rubene' j chilaj yéetel Bilha, u x keech u taata. Le ca tu yojéeltaj Jacobe', sen j p'u'uji. U paalal Jacobe' chucpaj doce.

²³Ti' x Leae' j yanchaj: Rubén u sucu'untzilil, Simeón, Leví, Judá, Isacar yéetel Sabulón

²⁴Le j yanchajo'ob ti' yéetel x Raquele': José yéetel Benjamín.

²⁵Le j yanchajo'ob ti' yéetel x Bilha u x koos x Raquele', Dan yéetel Neftalí,

²⁶Le j yanchajo'ob ti' yéetel x Zilpa u x koos Leae', Gad yéetel Aser. Lelo'oba' u paalal Jacob j síijo'ob tu lu'umil Padan-aram.

²⁷Jacobe' j bin u xíimbalt Isaac u taata tu caajil Mamre, jun p'éel nojoch caaj cu kaaba'intic xan Arba wa Hebrón, u cúuchilil tu'ux cajlajo'ob ca'ach Abraham yéetel Isaac.

²⁸Isaaque' yaan ca'ach ciento ochenta ja'abo'ob ti' ca j quíimi.

²⁹J bin u nupubáa yéetel u yúuchben ch'i'ibalo'ob cu dzo'ocol u sen ch'íijil, j mu'uc tumen Esaú yéetel Jacob u paalal.