Read Yucateco Génesis 36 Bible Online

Génesis 36 - Yucateco bible

Génesis 36

¹Le lo'oba' u ch'i'ilancab Esaú wa Edom.

²Esaue' j dzo'oc u beel yéetel u co'olelilo'ob Canaán: x yéetel Ada u x ch'upul paal Elón hititail, x yéetel Aholibama u x ch'upul paal Aná u yáabil Zibeón heveoil,

³x yéetel Basemat u yíidzin Nebaiot u x ch'upul paal xan Ismael.

⁴U paal Esaú j síijsa'ab tumen x Adae' tu kaaba'intaj Elifaz; x Basemate' tu síijsaj Reuel;

⁵x Aholibamae' tu síijsaj Jeús, Jaalam yéetel Coré. Le lo'oba' láaj u paalal Esaú, máaxo'ob síijo'ob tu lu'umil Canaán ca'aliquil ti' caja'an ca'achi'.

⁶Esaú j bin yéetel u yatano'ob, u paalal, yéetel xan le máaxo'ob caja'ano'ob tu yotoche', ca j bin cajtal táanxel tu'ux u ti'al u náachtal ti' Jacob u yíidzin. Tu bisaj tuláacal u yaalak ba'alche'ob, tu bisaj xan tuláacal le ba'alo'ob yanchaj ti' tu lu'umil Canaán,

⁷tu yo'olal sen ya'abchajic ba'ax yaan ti'obe' ma' j páatchaj u múul cajtalo'obi', cu dzo'ocol xane' le lu'um tu'ux caja'ano'ob ca'acho' ma' nu'uca'an u ti'al u tzéentico'ob u yaalako'obi'.

⁸Tu yo'olal lelo' Esaú wa Edome' j bin cajtal tu lu'umil u pu'uquilo'ob Seir.

⁹Le lo'oba' u ch'i'ilancab Esaú, u yúuchben ch'i'ibal le j edomitaob cajacbalo'ob ca'ach tu pu'uquilo'ob Seir.

¹⁰Lela' u kaaba'ob u paalal Esaú: Elifaz u yaal x Ada ti' Esaú, Reuele' u yaal x Basemat ti' Esaú.

¹¹U paalal Elifaze'; Temán, Omar, Sefo, Gatam yéetel Cenaz.

¹²Elifaze' yanchaj jun túul u x keech tu kaaba'intaj Timna, leti'e' yanchaj jun túul u yaal máax tu kaaba'intaj Amalec. Tuláacal le máaco'oba' j síijo'ob ti' x Ada jun túul ti' u yatano'ob Esaú.

¹³U paalal x Ruele' Nahat, Zera, Sama yéetel Miza; lelo'oba' j síijsa'abo'ob tumen x Basemat u láak jun túul ti' u yatano'ob Esaú.

¹⁴X Aholibama u yóox túul u yatan Esaú, tu síijsaj xan u paalal: Jeús, Jaalam yéetel Coré. Leti'e' u x ch'upul paal j Aná u yáabil Zibeón.

¹⁵U nuuquilo'ob u ch'i'ilancab Esaú, ichil u ch'i'ibalo'ob Elifaz u nojoch paal Esaú, u nuuquilo'obe': Temán, Omar, Cenaz,

¹⁶Coré, Gatam yéetel Amalec. Lelo'oba' u nuuquilo'ob ichil u ch'i'ibal Elifaz tu lu'umil Edom, tuláacal lelo'oba' láaj síijsa'abo'ob tumen x Ada.

¹⁷Ti' u paalal Reuel, u paal Esaú u nuuquilo'obe' Nahat, Zera, Sama yéetel Miza. Lelo'oba' u nuuquilo'ob tu lu'umil Edom, láaj síijsa'abo'ob tumen x Basemat u yatan Esaú.

¹⁸Ti' u paalal Esaú x yéetel Aholibama u yatan, u x ch'upul paal j Aná. U nuuquilo'obe' leti' lelo'oba': Jeús, Jaalam yéetel Coré.

¹⁹Tuláacal lelo'oba' u ch'i'ilancab Esaú wa Edom.

²⁰U paal Seir j horeo le caja'ano'ob ca'ach te j cúuchilo'obo': Lotán, Sobal, Zibeón, Aná,

²¹Disón, Ezer yéetel Disán, leti'ob ca'ach u nuuquilo'ob le j horeob u ch'i'ibal Seir tu lu'umil Edom.

²²U paalal Lotane' Hori yéetel Hemam, x Timna yíidzin ca'ach Lotán.

²³U paalal Sobale': Alván, Manahat, Ebal, Sefo yéetel Onam.

²⁴U paalal Zibeone': Aja yéetel Aná. Anae' leti' yáax il le sayabo'ob yano'ob te x tocoy, ca'aliquil táan ca'ach u canantic u burro'ob Zibeón u taata.

²⁵Anae' yanchaj jun túul u paal tu kaaba'intaj Disón, yéetel jun túul u x ch'upul paal tu kaaba'intaj x Aholibama.

²⁶U paalal Disone': Hemdán, Esbán, Itrán yéetel Querán.

²⁷U paalal Ezere': Bilhán, Zaaván yéetel Acán.

²⁸U paalal Disane': Uz yéetel Arán.

²⁹U nuuquilo'ob j horeobe' u kaaba'obe': Sobal, Zibeón, Aná,

³⁰Disón, Ezer yéetel Disán. Lelo'oba' u nuuctaquilo'ob ca'ach ichil u láaktzilo'ob tu lu'umil j horeob.

³¹Lelo'oba' ajawo'ob méektáantnajo'ob tu lu'umil Edom ma'ili' yanac ajaw tu lu'umil Israele':

³²Bela u paal Beore' ajawchaj Edom bey xan tu caajal cu kaaba'intic Dinaba.

³³Le ca j quíim Belae' méektáantnaj Jobab u paal Zera, sijnal tu caajil Bosra.

³⁴Le ca j quíim Jobabe' méektáantnaj Husam, sijnal tu lu'umil Temán.

³⁵Le ca j quíim Husame' méektáantnaj Hadad u paal Bedad máax pa'a u muuk Madián tu yáam lu'umil Moab; u caajale' u kaaba' ca'ache' Avit.

³⁶Le ca j quíim Hadade', j méektáantnaj Samla, u cajnáalil ca'ach Masreca.

³⁷Le ca j quíim Samlae' méektáantnaj Saúl u cajnáalil ca'ach Rehobot, jun p'éel caaj yaan ca'ach tu jáal áalcab ja'.

³⁸Le ca j quíim Saule' méektáantnaj Baal-hanan u paal ca'ach Acbor.

³⁹Le ca j quíim Baal-hanane' méektáantnaj Hadad, u caajale' cu kaaba'intic ca'ach Pau, u yatan ca'ach Hadade', cu kaaba'intic ca'ach Mehetabel u x ch'upul paal Matred, u yáabil Mezaab.

⁴⁰U kaaba'ob u nuuquilo'ob u yotochnáalo'ob Esaú, tu tzoolol u cajtalo'ob, u lu'umo'ob yéetel u kaaba'ob: Timna, Alva, Jetet,

⁴¹Aholibama, Ela, Pinón

⁴²Cenaz, Temán, mibzar,

⁴³Magdiel yéetel Iram. U láak u kaaba' Esaue' Edom; lelo'obo' u nuuquilo'ob u ch'i'ilancab Edom, tu tzoolol tu'ux caja'ano'ob, u ti'alo'ob ca'ach xan.