Read Yucateco Génesis 37 Bible Online

Génesis 37 - Yucateco bible

Génesis 37

¹Jacobe' j p'áat cajtal tu lu'umil Canaán tu'ux cajlaj ca'ach dze'edze'ec kiino'ob u taata.

²Lela' leti' u tzicbalil u paalal Jacob. Le ca j yanchaj diecisiete ja'abo'ob ti' Josee', cu canáantic ca'ach j tamano'ob pa'ate' yéetel u sucu'uno'ob, u paalal x Bilha yéetel u paalal x Zilpa u x keecho'ob u taata. Josee' cu bisic ca'ach tacpolal ti' u taata, tu yo'olal u kaakas cuxtal u sucu'uno'ob.

³Israele' tu asab yaabiltaj José ti' u láak u paalal, tumen dzo'oc ca'ach u nuxibtal ca j síij José. Let o'olale' tu beetaj jun p'éel qui'ichquelem búuc u ti'al.

⁴Ba'ale' le ca tu yilajo'ob u sucu'uno'ob buca'aj asab yaabilta'anil ti' leti'obe', tu sen p'ectajo'ob, cu dzo'ocole' jáaw u yutzil t'antico'ob.

⁵Jun téenaque' josee' yanchaj jun p'éel wayak ti'e' ca tu tzicbaltaj ti' u sucu'uno'ob; ba'ale' leti'obe' tu asab p'ectajo'ob,

⁶tumen tu ya'alaj ti'ob: U'uyene'exi', tumen bin in ca'aj in tzicbalt te'ex le wayak yanchaj teno'.

⁷Tin wayaktaj ti' láaj yano'on ich coole', táan ca'ach c beetic u x kaxabilo'ob trigo; in x kaxabe' téec líiki ca j p'áat toj wa'alacbal, ba'ale' le a x kaxabe'exe' tu tzolquintuba'ob tu bakpach in ti'alo' ca tu chinajuba'ob tu táan.

⁸Ca túun tu núucajo'ob u sucu'uno'ob: ¿A káat a wa'ale' yaan a beeticabáa c ajaw yéetel bin a ca'aj a t'oonquinto'on? Ca tu sen asab p'ectajo'ob tu yo'olal u wayako'ob yéetel bix u tzicbaltic ti'ob.

⁹Cu dzo'ocole' josé, yanji u láak wayak ti'e', ca tu tzicbaltaj xan ti' u sucu'uno'ob. Tu ya'alaj ti'ob: ¿A wojele'ex, yanji teen u láak wayak tu'ux tin náaytaje': le kiin, le uj, yéetel once eeko'obe' táan u chintalo'ob ca'ach tin táan?

¹⁰Le ca tu tzicbaltaj josé le wayak ti' u taata yéetel ti' sucu'uno'obe', j ke'ey tumen u taatae' ca j a'ala'ab ti': ¿Ba'ax a káat a wa'al yéetel le wayak yanji techa'? ¿ca tucultic yaan wa c chíinpoltiquech, a maama, a sucu'uno'ob, tac teen?

¹¹U sucu'uno'obe' yanchaj sawinajil ti'ob tu yo'olal leti', ba'ale' u taatae' cu sen tucultic ca'ach tu yo'olal le ba'ala'.

¹²Jun p'éel kiine' u sucu'uno'ob josee' j bino'ob Siquem táan u caxtico'ob ya'ax su'uco'ob u ti'al u j tamano'ob u taata.

¹³Israel túune' tu ya'alaj ti' José: U'uye, a sucu'uno'obe' ti' yano'ob Siquem u ti'al u canantico'ob le j tamano'obo'. In káat ca xi'iquech a wilo'ob. Ca tu núucaj José: Ma'alob, je'el in bine'.

¹⁴Ca tu ya'alaj Israel: Ma'alob, xeen a wil bix yanil a sucu'uno'ob yéetel le j tamano'obo', suunen a wa'al teen bix yanilo'ob. Israele' tu túuxtaj José likul u táax lu'umil Hebrón; le ca j kuch Siqueme',

¹⁵leti'e' j sa'at te j káaxo', j nactáanta'ab túun tumen jun túul máaque' ca j káatchi'ita'ab ti': ¿Ba'ax ca máan a caxante?

¹⁶Josee' tu núucaj: Táan in máan in caxant in sucu'ono'ob. ¿Je'el wa u páajtal a wa'alic teen tu'ux cu canantico'ob le j tamano'obo'?

¹⁷Ca tu ya'alaj le máaco': Dzo'oc u lukulo'ob waye'. Tin wu'uyaj u ya'alico'ob táan u bino'ob Dotán. Josee' j bin u caxant u sucu'uno'obe' ca tu nactáantajo'ob Dotán.

¹⁸Leti'obe' tu yilajo'ob u tíip'il; ma'ili' náadzaque' tu jok jo'oltajo'ob ba'ax cu bin u beetajo'ob u ti'al u quíimsico'ob.

¹⁹Ca tu ya'alajo'ob tu baatzilo'ob: ¡Ile'ex je'el cu taal le máax cu wayako'!

²⁰Co'otene'ex, co'one'ex quíimsic; cu dzo'ocole' c pulique'ex ti' jun p'éel soj ch'e'en, c a'alique'ex jun túul j káaxil ba'alche' jaante. ¡Beyo' bíin c ilique'ex ba'ax bíin úuchuc yéetel u wayako'obe'!

²¹Le ca tu yu'ubaj Rubén ba'ax cu ya'alico'ob tu yo'olal Josee', tu yóoltaj u toc ti' u sucu'uno'ob, ca tu ya'alaj: Ma' a quíimsique'ex.

²²Ma' a wequique'ex ki'ik. Pule'ex ichil le j soj ch'e'en yaan te x tocoy cúuchila', ba'ale' ma' beetique'ex loob ti'. Rubene' tu ya'alaj lela' tumen u káat ca'ach u toc José u ti'al ma' u quíimsa'al tu yo'olal u beetic u suut tu yicnal u taata;

²³ba'ale' le ca j kuch José le tu'ux yaan u sucu'uno'obe', leti'obe' tu pitajo'ob le nook u búuquintmaje',

²⁴tu machajo'obe' ca tu pulajo'ob ichil le j soj ch'e'eno'.

²⁵Cu dzo'ocole' ca j culajo'ob janal. Ti' lela' tu yilajo'ob u taal jun múuch' Ismaelo'ob, ti' u taalbalo'ob tu lu'umil Galad táan u bisico'ob yóokol u camello'ob qui'iboc ja', balsamo, yéetel mirra u ti'al u biso'ob Egipto.

²⁶Judá túune' tu ya'alaj ti' u sucu'uno'ob: ¿Ba'ax u biiilal ca c quíims c íidzin, wa cu dzo'ocol yaan c caxtic bix c balic u quíimil?

²⁷Asab ma'alob ca c co'one'ex ti' le ismaelitaob, u ti'al ma' c quíimsic, tumen leti'e' c íidzin. U sucu'uno'obe' tu éejemtajo'ob ba'ax tu ya'alaj;

²⁸le ca j máan le j coonolo'ob madianitaob te'elo', jóoksa'ab José te j ch'e'en tumen u sucu'uno'obo' ca tu conajo'ob ti' le j ismaelitaob tu tojol veinte sac taakino'ob. Bey bisa'abic José tu lu'umil Egipto'.

²⁹Le ca j suunaj Rubén tu yicnal le ch'e'eno' ma' tu nactáantaj José ichili', ca tu jataj u nook u chíiculal yaj óolal.

³⁰Cu dzo'ocole' ca suunaj tu'ux yaan u yíidzino'obe', ca tu ya'alaj ti'ob: Mina'an le j xi'ipal te'elo'. ¿Bejela'e' ba'ax quin in beete?

³¹Leti'ob túune' tu ch'a'ajo'ob u búuc Josee' ca tu bonajo'ob yéetel u ki'ikel jun túul j yuuc tu quíimsajo'ob;

³²cu dzo'ocole' tu túuxtajo'ob ti' u taataob yéetel le túuchi' t'aana': T nactáantaj lela'. Il a wil ma'alob wa ma' u búuc a paal.

³³Jacob, le ca tu kaj óoltaje', tu ya'alaj: ¡Lela' leti' u buuc in paal! Jun túul j káaxil ba'alche' xe'exe'et'e, ca tu jaantaj.

³⁴Jacob túune' tu ja'aja'ataj u nooke' ca tu búuquintaj u j okom búuquil quíimil, ya'ab kiino'ob tu yoktaj quíimic u paal.

³⁵Tuláacal u j xibil paalal yéetel u x ch'upul paalal tu yóoltajo'ob u caxanto'ob bix je'el u qui'imaccunsico'ob u yóole', ba'ale' leti'e' ma' ca'a qui'imaccunta'ab u yóoli'; ba'ale' tu yoktaj u paal táan u ya'alic: Yaan in búuquintic u okom búuquil quíimil tac quéen xi'iquen tu yicnal ichil le quimeno'obo'.

³⁶Egiptoe', le j madianitaobo' tu conajo'ob José ti' jun túul máac cu kaaba'intic Potifar, lela' u noj aj meyaj faraón ca'ache', u ajawil Egipto, leti' xan cu beetic u nojochil u aj canano'ob.