Read Yucateco Génesis 38 Bible Online

Génesis 38 - Yucateco bible

Génesis 38

¹Ti' le kiino'obo' Judae' tu jun páaycuntubáa ti' u láaktzilo'ob, ca j bin cajtal tu yotoch jun túul máac cu kaaba'intic Hira, ti' caja'an ca'ach tu caajil Adulame',

²te'elo' tu kaj óoltaj u x ch'upul paal jun túul j cananil cu kaaba'intic Suá, ca j dzo'oc u beel x yéetel.

³Le ca tu nupjuba'obe' leti'e' j p'áat x yo'omil, ca j yanchaj jun túul u yaal, ca tu dzaj u kaaba'int Er.

⁴X yo'omchaj tu ca'a téen ca j yanchaj u láak u yaal, ca tu dzaj u kaaba'int Onán.

⁵Yanchaj u láak u yaal, lela' tu dzaj u kaaba'int Sela, le chan paala' síij ca'aliquil ti' yaan ca'ach Judá tu caajil Quezibe'.

⁶Judae' tu dzo'ocsaj u beel Er u yáax paal yéetel jun túul co'olel cu kaaba'intic Tamar.

⁷Ba'ale' ma' j utzchaj tu yich Yuumtzil ba'ax cu beetic ca'ach j Eri' ca tu lukesaj u cuxtal.

⁸Judá tu ya'alaj ti' Onán: Nupabáa ti' Tamar u x quimen íicham a sucu'un, beyo' ca beetic ba'ax u najmal u beetic jun túul baal, u ti'al ca páatac yantal u paalal a sucu'un ta wo'olal.

⁹Ba'ale' Onane' u yojele' tuláacal u paalal cu bin j síijile' ma' bíin a'ala'ac wa u paali', let o'olale' je'el jay téen cu nupcubáa yéetel u x quimen íicham u sucu'une' cu yilic ca'ach ma' u x yo'omchajal u ti'al ma' u yantal u ch'i'ibal u sucu'un yo'olal leti'.

¹⁰Yuumtzile' sen j p'u'uj tu yo'olal ba'ax ca'ach cu beetico', ca xan tu luksaj u cuxtal.

¹¹Judá túune' tu ya'alaj ti' x tamar: P'áaten x quimen íichamil, xeen tu yotoch a taata tac quéen nojochchajac j Sela. Ba'ax úuche', Judae' tu tuclaj: ma' xan ca quíimic je'el bix quíimic u sucu'uno'obe'. Bey túuno' x Tamare' j bin cajtal, tu yotoch u taata.

¹²Kuch u kiinil u quíimil u yatan Judá, u x ch'upul paal Súa. Cu dzo'ocol u jáawal u búuquintic okomil nooke', j bin tu caajil Timnat tu'ux cu ko'osol u j tamano'ob, j láakinta'ab tumen Hira j adulamitail u yéet aj bisajbáil.

¹³Le ca tu yojéeltaj x Tamar ti' yaan Timnat u taata u j quimen íichame', j kuch bin u ti'al u kosic u j tamano'ob,

¹⁴j bine' ca tu pitaj u nookil x quimen íichamil ca tu pixaj u yich yéetel jun p'éel bóoch' u ti'al ma' u kaj óolta'al tumen mix máac, ca j culaj tu jool u caajil Enaim, naadz ti' u bejil Timnat. Tu beetaj lela' tumen j Selae' dzo'oc u nojoch wíinictal, beyo' ma' dzo'ocsa'ac u beel yéeteli'.

¹⁵Le ca tu yilaj Judae', tu tucultaj jun túul x cáacbach, tumen leti'e' u pixmaj ca'ach u yich.

¹⁶Ca túun tu tzelajubáa ti' le bej u ti'al u náadzal ti' leti'; ma' tu tucultaj wa u yilibi', ca tu ya'alaj ti': ¿Ca cha'ic wa in chiltal ta wéetel? Leti' xane' tu káatchi'itaj ti': ¿Ba'ax ca bin a dzáa teen wa ca chiltal tin wéetel?

¹⁷Ca tu núucaj Judá: In ca'aj in túuxt ti' teech jun túul u mejenil in j tamano'ob. Ca tu núucaj leti': Ma'alob túun, chéen ba'ale' yaan a p'atic teen wa ba'ax yaan u tojol, bey jun p'éel u chíiculal je'el a túuxtic tene'.

¹⁸Judae' tu káatchi'itaj ti': ¿Ba'ax a káat ca in p'at teech? Leti'e' tu núucaj ti': P'at teen a x dzalab, a kax nak yéetel le xóolte' yaan ta kabo'. Judae' tu láaj dzáa ti'; ca j chilaj x yéetel, ca tu p'ataj x yo'omil.

¹⁹Cu dzo'ocole' x Tamare' j bine' ca tu luksaj le bóoch' iquil tu pixajilac u yiche', ca tu ca'a búuquintaj u nookil u x quimen íichamil.

²⁰P'elac kuchic Judae' tu túuxtaj le chan j tamano' yéetel yéet aj bisajbáil le j adulamitaile', u ti'al ca su'utuc ti' tumen le co'olelo' le chíiculo'obe'; ba'ale' ma' tu nactáantaji'.

²¹Ca túun jo'op' u káat péectziltic ti' le máaco'ob yano'ob ti' le cúuchilo': ¿Tu'ux yaan le x cáacbach, x Enaime' le yaan ca'ach tu jáal le beja'? Ca j núucab ti': Mix jun túul x cáacbach yanac waye'.

²²Leti' túune' j suunaj tu'ux yaan ca'ach Judá, ca tu ya'alaj ti': Ma' tin nactáantaj le co'olelo', le máaco'ob yano'ob te'elo' tu ya'alajo'ob xan ti' teen, ma' bin tu yilajo'ob mix jun túul x cáacbachi'.

²³Judae' tu núucaj ti': Mix ba'al ti', p'áatac yéetel le ba'alo'abo', u ti'al ma' c che'ejta'al tumen mix máac. Ba'ale' ojéelta'ac: tene' tin túuxtaj le chan j tamano', ba'ale' teche' ma' ta nactáantaji'.

²⁴Cu dzo'ocol u máan óox p'éel meso'obe', j taal a'albil ti' Judá: X Tamar a wilibe', dzo'oc u x yo'omtal iquil u chiltal yéetel j xiibo'ob. Judae' t'aanaj káam: Jóokse'ex, tóoque'ex.

²⁵Ba'ale' ca'aliquil táan u jóokesa'ale, leti'e' tu túuxtaj a'albil ti' u suegro: U taatail le ba'alo'oba' leti' máax x yo'omquinten. Jach qui' ila'a' máax ti'alintic le x dzalabo', le kax nako' yéetel le xóolte'a'.

²⁶Le ca tu yilaj Judá ba'al u ti'al le nu'uculo'obo', tu ya'alaj: X leti'e' ma'alob ba'ax tu beetaj, tumen ma' tin dzo'ocsaj u beel yéetel j Sela in paali'. Ma' suunaj chital x yéeteli'.

²⁷Le ca j kuch u kiinil ti' x Tamare', tu síijsaj mejen iicho'ob.

²⁸Le súutuc táan u síijil jun túule' tu jóoksaj u kab. Le x aalansajo' tu kaxaj jun xéet' chac kuuch tu kab, ca tu ya'alaj: Leti' yáax paal.

²⁹Ba'ale' le chan paalo' tu jáan ocsaj u kab, ca j síij u yéet iichil yáax táanil; tu yo'olal lelo' le x aalansajo' tu dzaj u kaaba'int Fares, tumen tu ya'alaj: ¿Bix páatchajic a je'ic bej?

³⁰Cu dzo'ocole' síij u láak chan paal yaan ca'ach le chac kuuch tu kabe', ca tu dzaj u kaaba'int Zera.