Read Yucateco Génesis 39 Bible Online

Génesis 39 - Yucateco bible

Génesis 39

¹Le ca j bisa'ab José Egiptoe', jun túul egipcio cu kaaba'intic Potifar j man ti' le ismaelitaob máaxo'ob j bis te'elo'. Potifare' u noj aj meyaj faraón u nojchil xan le máaxo'ob canantico'.

²Ba'ale' Yuumtzile' ma' tu p'ataj Josei', j bin sen utzil ti' ca'aliquil ti' cajacbal tu yotoch le j egipcio u dzuulilo'.

³U dzuulile' tu na'ataj ti' yaan Yuumtzil yéetel Josee', tu yo'olal lelo' cu bin utzil ti' José, ti' tuláacal ba'ax cu beetic.

⁴Lela' leti' j beet u lúubul utzil José ti' u dzuulil, tu yo'olal lelo' j dzaab tumen u dzuulil u ti'al u yáantic, yéetel u beetic u nojoch aj meeyjul u yotoch, tu p'ataj xan tu kab tuláacal ba'ax yaan ti'.

⁵Ti'ilie' kiino' Potifare' tu p'ataj tu kab José u yotoch yéetel tuláacal ba'ax u ti'al: le yano'ob tu yotocho' bey le yano'ob te j káaxo'.

⁶Iquil yanil tuláacal tu kab Josee', Potifare' ma' tu beetic mix ba'al, chéen janal u ca'aj. Josee' sen qui'ichquelem ca'achi, yéetel cu lúubul utzil;

⁷bey túuno', cu dzo'ocol u máan dze'edze'ec kiine', Josee' j ichta'ab tumen u yatan u dzuulil, jun p'éel kiine' tu ya'alaj ti' José: Chilen tin wéetel.

⁸Ba'ale' Josee' ma' tu yóoltaji', ca tu núucaj ti' beya': U tucult a tzicbe'enil, in dzuulile' tu p'ataj tin kab tuláacal ba'ax u ti'al, ca'aliquil weyanene' mina'an ba'ax o'olal u chi'ichnactal.

⁹Te j naja', teen u nojochil, mina'an u láak; in dzuulile' tuláacal u p'atmaj tin kab, chéen ba'ax ma'e' teech, tumen u yatanech; tu yo'olal lelo' bix cu j bin in beet ba'al kaas, ca u beet in kebanchajal tu táan Ku.

¹⁰Quex tumen sáamsamal táan u cóoyticubáa ti' José ca chilac x yéetele', ca xi'ic tu t'uube', leti'e' ma' tu yóotaji'.

¹¹Ba'ale' jun p'éel kiine' j ooc te j naj u beet u meyaj; tu yo'olal mina'an u láak máac te'elo',

¹²Le co'olelo' tu machaj tu nook Josee' ca tu ya'alaj ti': Chilen tin wéetel Ba'ale' Josee' jóok áalcabil ca tu p'ataj u nook tu kab le co'olelo'.

¹³Le ca tu yilaj j p'áat tu kab le nook iquil jóokic áalcabil Josee',

¹⁴tu t'anaj u palitzililo'ob le najo' ca tu ya'alaj ti'ob: Ile'ex in wíichame' tu taasaj to'on jun túul j hebreoil u ti'al u beet to'on óolaj. Taal tin wicnal, tu yóoltaj chiltal tin wéetel, ba'ale' tene' j awatnajen;

¹⁵le ca tu yu'ubaj in awat yéetel tuláacal in muuke', jóok áalcabil, tac u nook tu p'ataj waye'.

¹⁶Cu dzo'ocole' leti'e' tu ta'acaj u nook José, tac ca j kuch u dzuulil tu yotoch.

¹⁷Ca túun tu tzicbaltaj láili' le dzo'oc ca'ach u ya'alico': Le palitzil hebreoil ta taasaje' j ooc ichil u káasabil in wotoche' ca tu yóoltaj u paj in subtal,

¹⁸ba'ale' le ca j awatnajen yéetel tuláacal in muuke', dzíit yáalcab ca tu p'ataj u nook waye'.

¹⁹Bey tu beetilac teen a palitzilo'. U dzuulil Josee' sen j kuuxilnaj le ca tu yu'ubaj le ba'ax tzicbalta'ab ti' tumen u yatano',

²⁰Bey túuno' tu machaj Josee' ca tu beetaj u yocsa'al ichil le kalab naj tu'ux kala'ano'ob le máaco'ob tumen le ajawo'. Ba'ale' quex ti' yaan te j kalabo';

²¹Yuumtzile' ti' yaan yéetel Josee', tu ye'esaj ti' iquil lúubic utzil ti' u nojchil le kalab najo'.

²²Le máaca' tu p'ataj ti' José ca u canant le máaxo'ob kala'ano'obo', José a'alic tuláacal ba'ax u najmal u beeta'al te'elo';

²³u nojochil le kalab najo' ma' kabéetchaj u xakal ilic le ba'alo'ob cu canantic Joseo', tumen Yuumtzile' ti' yaan yéetele', leti' beetic u jóokol ma'alobil tuláacal ba'ax cu beetic.