Read Yucateco Génesis 40 Bible Online

Génesis 40 - Yucateco bible

Génesis 40

¹Cu dzo'ocol le ba'axo'ob j úucho', le aj dzaa ukul, wa le máax dzáic ca'ach yo'och vino le ajawo' pa'ate' yéetel le aj meen waajo' j si'ipinajo'ob ti' u dzuulilo'ob, ti' u ajawil Egipto.

²Le faraone', u káat ya'ale' u ajawil Egipto sen j p'u'uj ti' le ca'a túul aj meyajo'oba', u nojchil le aj dzaa ukulo'obo' yéetel u nojochil le aj meen waajo'obo',

³ca tu túuxtaj kalbilo'ob tu yotoch u nojochil le aj canano'obo', láili' tu'ux kala'an ca'ach Josee'.

⁴U nojochil le aj canano'obo' tu ya'alaj ti' José ca u táan óolt le ca'a túul nucuch aj meyajo'oba', le máaco'oba' xaanchajo'ob dze'edze'ec kiino'ob te j kalab najo'.

⁵Jun p'éel áakabe' le ca'a túul nucuch aj meyajo'oba' tu jujun túulilo'obe' tu wayaktajo'ob jujun p'éel náay, tu jujun p'éelil le náayo'oba' yanchaj ba'ax u káat ya'ale'.

⁶Tu ja'atzcab kiinile' j taal José u yila'ob ca tu nactáantaj ch'iiquilo'ob j tuucul.

⁷Ca tu káatchi'itaj ti'ob: ¿Ba'axten chi'ichnaque'ex sáasic?

⁸Leti'obe' tu núucajo'ob: Wayaknajo'on, u yajile' mina'an máax a'alic to'on ba'ax u káat u ya'ale. Josee' tu káatchi'itaj ti'ob: ¿Ma' wa ta tucultique'ex Ku máax sáasilcuntic ba'ax u káat u ya'ale'? Séeba'an a'ale'ex teen ba'ax ta wayaktaje'ex.

⁹U nojochil túun le aj dzaa ukulo'obo' tu tzicbaltaj ti' José ba'ax tu wayaktaj, ca tu tzolaj ti' beya': Ichil in wayake' tin wilaj jun cúul uva,

¹⁰yaan óox xa'ay u kabo'ob. Le uvao' jo'op' u tóop'ol u yóol, xíit xan u lool, le loolo'obo' tu beetaj u ch'úuyul u yich, lelo'oba' takanchajo'ob.

¹¹Tene' in machmaj ca'ach u nu'ucul u yukic vino le faraono', bix úuchic in machic le uva u ti'al in yedz ichil u nu'ucul le ukulo'. Tin wilaj jach teen dzáic tu kab faraón le vinoo'.

¹²Josee' tu ya'alaj ti': Le u yóox xa'ay ta wilajo', u káat u ya'al óox p'éel kiin,

¹³ichil óox p'éel kiine' faraone' yaan u xoquic le tac pool dza'an ta wóokolo', cu dzo'ocole' yaan u sutiquech ta meyaj, teche' yaan a ca'a dzáic le vino ti'o' je'el bixili' a dzáic ti' ca'ache'.

¹⁴Le quéen béeyac a wayako' ma' a tu'ubsiquen wale', beet utz a t'aan ma'alob tin wo'olal ti' faraón u ti'al u jóokesiquen te j cúuchila', ch'a'a teen óotzili'.

¹⁵Tene' j ocolta'aben tu lu'um le hebreobo', ma' u najmal in wantal ichil le kalaba' tumen ma' in beetmaj mix jun p'éel loobi'.

¹⁶Le ca tu yu'ubaj u j nojoch le aj meen waajo'ob jach utz bix úuchic u t'aan iquil tu ya'alajilac ba'ax cu taasic le wayako', tu ya'alaj ti': Tene' tin wayaktaj in kóoch jo'oltmaj óox p'éel u mejen xaaquil waaj.

¹⁷Le chan xaac yaan yóokolo' chuup ca'ach yéetel jejeláas ch'ujuc waajo'ob u ti'al le faraono', ba'ale' j éem ch'íich'o'ob u luko'ob le waajo'ob yaan ti' le xaac in kóoch jo'oltmaj ca'acho'.

¹⁸José túune' tu núucaj ti': Le wayako' cu na'ata'al beya': Le óox p'éel mejen xaaco'obo' u káat u ya'al óox p'éel kiin,

¹⁹ichil óox p'éel kiine' faraone' yaan u xoquic bix yanil le tac pool beeta'an ta wóokolo', cu dzo'ocole' yaan a ch'uyquinta'al tu kab jun cúul che', ch'íich'o'ob cu bin jaantic a bakel.

²⁰Tu yóox p'éel kiine, u kiinil síijic faraone', leti'e' tu noj kiinbesaj yéetel tuláacal u nuuquil u aj meyajo'ob. Tu táan tuláacalo'obe' tu túuxtaj cha'akabtbil u nojochil le aj dzaa ukulo'obo', bey u nojochil le aj meen waajo'obo'.

²¹Le aj dzaa ukulo' tu dzaj tu ca'a téen tu meyaj, ca j suunaj u dzáa le vino ti' faraón, je'el bixili'e',

²²Ba'ale' le aj meen waajo' tu túuxtaj jich'bil u caal, jach je'el bix tu na'atilac Josee',

²³Le aj dzaa ukulo' ma' tu tu'ubsa José.