Read Yucateco Génesis 43 Bible Online

Génesis 43 - Yucateco bible

Génesis 43

¹Le wi'ijo' j máan tip'a'anchaj ti' tuláacal le múuch' caajo'obo'

²cu dzo'ocol u láaj jaantic Jacob yéetel u paalal le trigo tu taasajo'ob tu lu'umil Egiptoe', Jacobe' tu ya'alaj ti'ob: Xeene'ex tu ca'a téen a mane'ex jun p'íit trigo u ti'al c jaante.

³Ba'ale' judae' tu núucaj ti': Le máaco' jach tu ya'alaj to'on: Wa ma' ta taasique'ex u j tuup'il a wíidzine'ex waye', mix a chéen taale'ex a wilene'exi';

⁴bey túuna' wa ca cha'ic u bin t éetele', c bin j man teech le trigoo';

⁵ba'ale' wa ma' ta cha'ic u bine', ma' táan c bin, le máaco' tu ya'alaj to'on: wa ma' ta taasique'ex teen u j t'uupil a wíidzine'exe', ma' a taal a wilene'ex.

⁶Ca túun tu ya'alaj Israel: ¿Ba'ax teen cu beeta'al teen sen ya'ab kaas? ¿Ba'ax teen ta wa'alaje'ex ti' le máac yaan u láak a wíidzine'ex?

⁷Leti'obe' tu núucajo'ob: Tumen leti'e' tu sen káatchi'itaj t o'olal yéetel tu yo'olal c láaktzilo'ob. Tu káatchi'itaj to'on: ¿Cuxa'an wa a taataex? ¿Yaan wa u láak a wíidzine'ex? To'one' j yanchaj c núuquic u káat chi'ob. ¿Tu'ux bin c ojéelt wa yaan u ya'alic to'on ca c bis c íidzin?

⁸Judae' tu ya'alaj ti' Israel u taata: Wa c káate'ex cuxtale' cha' u bin le j xi'ipalo', teen quin in canante, chéen bey je'el c bin tu séeblaquilo'. Beyo' ma' t quíimil, mix teech, mix to'on, mix c paalal.

⁹Teen quin dzáiquimbáa tu yo'olal; ti' teen ca bin a káat je'el ba'alac ca úuchuc ti'e'. Wa ma' tin sutic waye', teen quin in cuch u si'ipil ta táan tuláacal u kiinilo'ob in cuxtal.

¹⁰Wa ma' tu yo'olal dzo'oc u sen xáantal waye', ¡bejela'a' dzo'oc c bine' yéetel dzo'oc c suut ca'a téene'!

¹¹Ca túun tu núucaj u taata ti'ob: Bey mina'an u láak ba'ax cu páajtal c beetico', beete'ex lela': bise'ex siibalo'ob ichil u nu'ucul a cuuche'ex u ti'al le máaco'. Bise'ex ti' u asab ma'alobil ba'ax cu beeta'al ti' le caajo'oba', jun p'íit balsamo, jun p'íit caab, qui'iboc ja'ob, mirra, nuez, yéetel almendra.

¹²Bise'ex xan ca'a jaatz taakin, yéetel kube'ex ta kabile'ex le taakin j su'ut te'exo', ma' c ojel wa chéen j náay óolali'.

¹³¡Séeba'an! ch'a'ex a wíidzine'ex, xeene'ex tu ca'a téen a wile'ex le máaco'.

¹⁴Ku ca u beet u muuntal u pucsi'ikal u ti'al u cha'akabtic Simeón yéetel Benjamín. Tin wo'olale', wa yaan in p'áatal j ma' paalale', p'áataquen túun j ma' paalal.

¹⁵U paalal Jacobe' tu ch'a'ajo'ob siibalo'ob, ca'a jaatz u ya'abil taakin, yéetel Benjamine' ca j bino'ob Egipto. Le ca kucho'ob tu táan Josee',

¹⁶ca j ila'ab tumen José ti' yaan Benjamín yéetelo'obe', tu ya'alaj ti' u aj cananba'albáa u yotoch: Bis le máaco'ob tin wotocha', quíims jun túul wacaxe' ca a nu'ucbesej, tumen leti'obe' yaan u janalo'ob tin wéetel chúumuc kiin.

¹⁷Le aj canan ba'albáo' tu beetaj jach je'el bix nu'ucta'abic ti' tumen Josee', ca tu bisajo'ob,

¹⁸Ba'ale' leti'obe' ja'ak u yóolo'ob tumen táan u bisa'alo'ob tu yotoch José, ca tu ya'alajo'ob tu baatzilo'ob: ¡Lela' chéen táabsajil! j taasa'abo'on waye' tu yo'olal le taakin j su'ut to'ono', bin u ca'aj u macho'ono'ob u ti'al u beetico'ob c meyaj beyo'on palitzile' pa'ate' yéetel c aalako'ob.

¹⁹Tu yo'olale' le ca j kucho'ob tu jool le najo' j naadzo'ob tu yicnal le aj canan ba'albáo' u ti'al ca t'aanaco'ob tu yéetel,

²⁰Ca tu ya'alajo'ob ti': ¡Nojoch máac! jach u jaajile' le u láak kiinaco' chéen j taalo'on j maan trigo,

²¹Ba'ale' le ca j kucho'on tu'ux ca'ach bin c máans áakabe', le ca j t wach'aj c costale', t ilaj tu jáal chi'obe' ti' yaan c taakin tu jujun túulilo'oni'. Le taakino' t ilaj chuca'an. Bejela'e' t taasaj u ti'al c sute,

²²t taasaj xan u láak taakin u ti'al c manic trigoo. Ba'ale' ma' c ojel máax dzáa le yáax taakin tu jool c cuucho'.

²³Le aj canan ba'albáo' tu núucaj: Jóomoc a wóole'ex, ma' a ch'aique'ex sajaquil. A Kuex yéetel u Ku a taataexe' leti' wal dzáa ichil a cuuche'exe'. Tumen tene' tin kamaj le taakin iquil bo'olnajique'exe'. Le aj canan ba'albáo' tu joksaj Simeone' ca tu bisaj tu'ux yano'ob leti'ob;

²⁴Cu dzo'ocole' ca tu láaj bisajo'ob tu yotoch José, ca tu dzaj ja' u ti'al u p'o'ic u yooco'ob, tu dzaj xan ba'al u jaant u burro'ob.

²⁵Leti'obe' tu máakanto'ob le siibalo'obo' ca tu pa'atajo'ob u suutbal José chúumuc kiin, tumen tu yojéeltajo'ob ti' cu bino'ob janali'.

²⁶Le ca j kuch José tu yotoche', leti'obe' tu dzajo'ob le siibalo'ob tu taasajo'obe', ca j noclajo'ob j lu'um tu táan.

²⁷Josee' tu káatchi'itaj ti'ob bix yanilo'ob, tu káatchi'itaj xan: ¿Bix yanil a taataex, le nuxiib ta tzicbaltaje'ex teen, láili' cuxa'ane'?

²⁸Leti'obe' j chinlajo'ob ca tu ya'alajo'ob: C taatae', a palitzile', ma'alob yanil, láili'; cuxa'ane'.

²⁹Josee', paacatnaj tu bakpach, ca tu yilaj Benjamín u yíidzin ti' jun túulili' taata yéetel ti' jun túulili' maama, ca tu ya'alaj: ¿Leti' wa u j t'uupi a wíidzine'ex ta tzicbaltaje'ex tena'? ¡J xi'ipal, Ku ca u qui' t'aan teech! Le ca tu ya'alaj le t'aana',

³⁰Josee' j péecnaj u yóol ca tu yilaj u yíidzin, ca j taacchaj u yokol. Tu séeblaquil j ooc tu yotoch, ca okolnaj te'elo'.

³¹Le ca páatchaj u jáawal u yokole' tu p'o'aj u yich, jóoke' ca tu ya'alaj: ¡jóoksa'ac le janalo'!

³²Josee' j dzaab u janal ti' jun p'éel x mayacche', u paalal Jacobe' ti' u láak. Ti' u láak x mayacche'e' le j egipciob cu janalo'ob yéetel Joseo'; tumen ti' le egipciobo', wet'a'an ti'ob u múuch' janalo'ob yéetel le j hebreob.

³³Le u láaktzilo'ob Josee' j culajo'ob le ca a'ala'ab ti'ob tumen, tu tzoolol u ja'abilo'ob, ya'ax táanile' le sucu'untzilo'obo' tac le j t'uup íidzino'; leti'obe' sen jaka'an u yóolo'ob táan u paclan ilicuba'ob.

³⁴Josee' tu dzaj u jaanto'ob le ba'ax cu jaantic leti'e' ti' Benjamine' tu dzaj u ya'abil. José yéetel u láaktzilo'obe' j múuch' ukulnajo'ob ca sen j qui'imacchaj u yóolo'ob.