Read Yucateco Génesis 45 Bible Online

Génesis 45 - Yucateco bible

Génesis 45

¹Josee' ma' j páatchaj u muclic u péec óolal tu táan tuláacal le máaxo'ob meyajtico', ca tu yawattaj ti'ob: ¡Jóokene'ex waye'! Bey túuno' mix jun túul ti' u aj meyajo'ob yaan tu yicnal; ca tu dzajubáa kaj óoltbil tumen u sucu'uno'ob.

²Ca túun jo'op' u yokol sen ka'am, tuláacal le j egipciob tu yojéeltajo'ob, u péectzilile' j kuch tac tu jalach naj le faraono'.

³Ca tu ya'alaj José ti' u sucu'uno'ob: Teen José. ¿Láili' wa cuxa'an in taatae'? Leti'obe' tu yo'olal sen ja'ak yo'olo'ob yanilo'ob tu táan, ma' j páatchaj u núuquico'ob mix ba'al ti'i'.

⁴Ba'ale' j a'ala'ab ti'ob tumen José: Beete'ex utz a naadzicaba'ex tin wicnal. Le ca tu nadzajuba'obe', leti'e' tu ya'alaj ti'ob: Teen José a wíidzine'ex, le máax ta conaje'ex Egiptoe';

⁵ba'ale' beete'ex utz ma' u yaatal ta wóole'ex mix a p'u'ujule'ex ta baatzile'ex úuchic a coniquene'ex, Tumen Ku tu túuxtajen táanil ti' te'ex u ti'al ca páatac c cuxtal.

⁶Táan u bin ca'a p'éel ja'abo'ob wi'ijil ti' le lu'uma', táan u bineltic cinco ja'abo'ob, ti' lelo'obo' ma' tu bin jochbil mix ba'al quex úuchuc paakal.

⁷Ba'ale' Kue' tu túuxtajen táanil ti' te'ex u ti'al ca u beet u p'áatal a ch'i'ibale'ex yóokol lu'um, yéetel u ti'al ca cuxlaque'ex je'el bix chéen leti' yojel u beete'

⁸Bey túuno' Ku tu túuxtajen waye', ma' te'exi'; leti' tu dzajen u ti'al tzol xiquinil ti' faraón, u dzuulil tuláacal u yotoch, yéetel u méektáanil tuláacal Egipto.

⁹Xeene'ex tu séeblaquil tu'ux yaan in taatae', ca a wa'ale'ex ti': Bey u ya'alic josea': Kue' tu dzajen bey u taatail tuláacal Egiptoe'. Co'oten a wilen. Ma' xáantal.

¹⁰Ti' bíin cajlaquech tu lu'umil Gosene', pa'ate' yéetel a paalal, a wáabilo'ob, a waalak ba'alche'ob, bey xan tuláacal ba'ax yaan ti' teech. Beyo' naadz ca bin j antal ti' teen.

¹¹Way quin in dzáa te'ex janal a ti'al teech yéetel u ti'al tuláacal a láaktzilo'ob, bey u ti'al tuláacal le máaxo'ob yano'ob ta wéetele', u ti'al ma' u bineltic te'ex mix ba'al, tumen yaan u yantal u láak cinco ja'abo'ob wi'ijil.

¹²In wíidzin Benjamín yéetel te'ex ca jaajcuntique'ex le ba'ax dzo'oc a wu'uyique'ex teen j a'ale'.

¹³Tzicbalte'ex ti' in taata buca'aj in páajtalil Egipto, yéetel tuláacal ba'ax dzo'oc a wilique'ex waye'. ¡Tu séeblaquil, xeene'ex ca a taase'ex in taata!

¹⁴Josee' tu méekaj u yíidzin Benjamín, ca jo'op' u yokol. Benjamín xane' okolnaj bey méekanil tumen José u sucu'uno'.

¹⁵Cu dzo'ocole' josee', tu dzu'udzaj tuláacal u sucu'uno'ob, okolnaj le ca tu méekajo'obe'. Cu dzo'ocol le ba'ax úucha' páatchaj u t'a'anal tumen u sucu'uno'ob.

¹⁶Tu noj najil faraone' j ki'itpaj u péectzilil, u sucu'uno'ob Josee' dzo'oc bin u kuchulo'ob; le faraono' qui'imacchaj yóol pa'ate' yéetel u nuuquil u j meyajo'ob.

¹⁷Ca tu ya'alaj faraón ti' José: A'al ti' a sucu'uno'ob cu kaxo'ob u cuuch u burro'ob ca suunaco'ob Canaán,

¹⁸ca u taaso'ob teen a taata yéetel a láaktzilo'ob. Teen quin in dzáa ti'ob u asab ma'alobil u lu'umil Egipto, ca u jaanto'ob u asab ma'alobil le ba'alo'ob cu yantal te j lu'uma'.

¹⁹A'al ti'ob ca u ch'a'ob bolano'ob way Egiptoe', ca u biso'ob u ti'al u taasico'ob u yatano'ob, u paalalo'ob, yéetel xan a taataex.

²⁰Ma' u tucultico'ob le ba'ax yaan ti'ob bejela'e', tumen tuláacal u ma'alobil ba'alo'ob yaan Egiptoe', u ti'alo'ob.

²¹U paalal Israele' tu beetajo'ob beyo'. Josee' tu dzaj le bolano'ob a'ala'ab ti' tumen faraone', yéetel janal u ti'al le bejo';

²²tu dzaj xan túumben nook u ti'al u jelicuba'ob, ba'ale' ti' Benjamine' tu dzaj trecientos u p'éelal sac taakin yéetel cinco u dzáamal búuco'ob.

²³Ti' u taatae' tu túuxtaj diez burro'ob u cuchmajo'ob u asab ma'alobil ba'alo'ob yaan Egiptoo', u láak diece' u cuchmajo'ob trigo, waaj yéetel janal u ti'al u jaant u taata te j bejo'.

²⁴Le ca j jóok José u yila'a' u bino'obe' tu kuben t'antaj ti'ob bic xi'ico'ob ba'atel te j bejo'.

²⁵Leti'obe' j jóoko'ob tu caajil Egipto u ti'al u binbalo'ob tu lu'umil Canaán tu'ux caja'an ca'ach Jacob u taataob.

²⁶Le ca tu tzicbaltajo'ob ti' cuxa'an José, leti' méektáantic tuláacal Egipto, ma' tu yojéeltaj ba'ax u beeti' mix ba'ax u ya'ali', tumen ma' páatchaj u yocsaj óoltic le ba'ax cu ya'ala'al ti'o.

²⁷Ba'ale' le ca tu tzicbaltajo'ob tuláacal le ba'axo'ob j a'ala'ab ti'ob tumen José, yéetel le ca tu yilaj le bolano'ob túuxta'ab tumen José u ti'al u bisa'ale', sen qui'imacchaj u yóol.

²⁸Ca túun tu ya'alaj: Chéen yéetel in wojéeltic cuxa'an in j xiibil paal Josee', je'el in bin in wila' ma'ili' quíimiquene'.