Read Yucateco Génesis 46 Bible Online

Génesis 46 - Yucateco bible

Génesis 46

¹Israele' tu dzajubáa j bej yéetel tuláacal ba'ax yaan ti' ca'achi. Le ca j kuch Bersebae', tu kubaj quíimsbil ba'alche'ob ti' u Ku u taata.

²Ti' le áakabo' Kue' j t'aanaj yéetel Israel ichil jun p'éel náay, ca tu t'anaj tu kaaba': Jacob, Jacob. Leti'e' tu núucaj: Je'elena'.

³Ku túune' tu ya'alaj: Teen Junab Ku, u Kuen a taata. Ma' a sajactal j bin Egipto, tumen te'elo' bíin in beet ca ya'abac a ch'i'ibal, yaan u kuchul j béeytal jun p'éel nojoch múuch' caaj.

⁴Yaan in bin ta wéetel Egipto, teen quin in jóokes a ch'i'ilancab te'elo'. Cu dzo'ocol xane' le quéen quíimqueche', josee' ti' cu bin j yantal ta tzéele'.

⁵Cu dzo'ocole' Jacobe' j jóok Beerseba. U paalal Israele' tu dzajo'ob u taata, u paalalo'ob yéetel u yatano'ob ti' le bolano'ob túuxta'ab ti' tumen faraón u ti'al u bisa'alo'obo'.

⁶Jacob yéetel tuláacal u láaktzilo'obe' j bino'ob Egipto, tu bisajo'ob u wacaxo'ob, u j tamano'ob yéetel tuláacal le ba'alo'ob yanchaj ti'ob tu lu'umil Canaán.

⁷Tuláacal u j xibil paalal, u x ch'upul paalal, u j xiibil áabilo'ob yéetel u x ch'upul áabilo'obe' j bino'ob yéetel.

⁸Lelo'oba' u kaaba'ob le israelitaob j bino'ob Egiptoa'; u káat ya'ale', Jacob yéetel u ch'i'ilancab: Rubén u j yáax paal Jacob.

⁹U paalal Rubene': Hanoc, Falú, Hezrón yéetel Carmi.

¹⁰U paalal Simeone': Jemuel, Jamín, Ohad, Jaquín Zoar, yéetel Saúl u yaal jun túul co'olel x canaanil.

¹¹U paalal Levie': Gersón, Coat yéetel Merari.

¹²U paalal Judae': Er, Onán, Sela, Fares yéetel Zara, (Er yéetel Onane' j quíimo'ob tu lu'umil Canaán). U paalal Farese': Ezrón yéetel Hamul.

¹³U paalal Isacare': Tola, Fúa, Job yéetel Simrón.

¹⁴U paalal Zabulone': Sered, Elón yéetel Jahleel.

¹⁵Lelo'oba' u paalal Jacob yéetel Lea ca'aliquil ti' caja'ano'ob ca'ach Padan-aram, pa'ate' yéetel Dina u x ch'upul paal. Tu pa'ate'il u ch'i'ibale' treinta yéetel tres, j xiibo'ob tac u x ch'uupilo'ob.

¹⁶U paalal Gade': Sifión, Hagui, Esbón, Suni, Eri, Arodi yéetel Areli.

¹⁷U paalal Asere': Imna, Isúa, Isúi Bería, yéetel jun túul x yíidzino'ob cu kaaba'intic Sera. U paalal Beriáe': Heber yéetel Malquiel.

¹⁸Lelo'oba' u paalal Jacob yéetel Zilpa. Le x palitzil tu síaj Labán ti' Lea u x ch'upul paal, u ch'i'ibale' diez yéetel seis máaco'ob tu pa'ate'il.

¹⁹U paalal Jacob yéetel Raquel u yatan: José yéetel Benjamín.

²⁰U paalal José yéetel Asenat: Manasés yéetel Efraín. Lelo'oba' j síijo'ob Egipto. Asenate' u x ch'upul paal Potifera u aj kiinil On.

²¹U paalal Benjamine': Bela, Bequer, Asbel, Gera, Naamán, Ehi, Ros, Mupim Hupim yéetel Ard.

²²Lelo'oba' u ch'i'ibal Jacob yéetel Raquel. Catorce máaco'ob tu pa'ate'il.

²³U paal Dane': Husim.

²⁴U paalal Neftalie': Jahzeel, Guni, Jezer yéetel Silem.

²⁵Lelo'oba' u paalal Jacob yéetel Bilha, le x palitzil tu síaj Labán ti' Raquel u x ch'upul paal, u ch'i'ibalo'obe' siete máaco'ob tu pa'ate'il.

²⁶Le máaco'ob j kucho'ob Egipto yéetel Jacob, tuláacalo'ob jach u ki'ikele', sesenta yéetel seis chéen j xiibo'ob, ma' j xo'oc u yatantzilo'ob yéetel u paalalilo'obi'.

²⁷U paalal Josee', ca'a túulo'ob, sijnalo'ob Egipto. Bey túuno' le j kucho'ob Egipto' sesenta máaco'ob láaj u ch'i'ilancab Jacob.

²⁸Jacobe' tu túuxtaj táanil Judá u yil José, u ti'al ca taalac u kam tu lu'umil Gosén. Le ca j kucho'ob Gosene',

²⁹Josee' tu ya'alaj ca nu'ucbesa'ac u bolan u ti'al ca xi'ic u kam u taata. Le ca j kuch tu táan u taatae', tu méekaj, j xaanchaj u yokol tu queléembal.

³⁰Israel túune' ca tu ya'alaj ti' José: ¡Cu dzo'ocol in pactiquech tin wichil láili' cuxa'aneche', tene' je'el u páajtal in quíimile'!

³¹Josee' tu ya'alaj ti' u sucu'uno'ob yéetel ti' u láaktzilo'ob u taata: Bin in ca'aj in wil Faraón, ca in dzáa le péectzila': In sucu'uno'ob, u láaktzilo'ob in taata, máaxo'ob cajacbalo'ob ca'ach canaane', dzo'oc u taalo'ob u ti'al ca p'áataco'ob tin wéetel;

³²tu taasajo'ob u j tamano'ob, u wacaxo'ob yéetel tuláacal ba'ax yaan ti'ob, tumen u meyajo'obe' j canan j taman yéetel tzéen wacax.

³³Le túun quéen u t'ane'ex le faraón yéetel le quéen u káat te'ex ba'ax meyajil ca beetique'exe',

³⁴te'exe' a'ale'ex ti'e'; j canan j taman suuc c beetic, je'el bix c máanja'an ch'i'ibalo'obe'. Bey túuno' je'el u páajtal a p'áatale'ex cajtal tu lu'umil Gosene', tumen le j egipciobo' u wet'majo'ob u yúuchul múul cajtal yéetel aj canan j tamano'ob.