Read Yucateco Génesis 48 Bible Online

Génesis 48 - Yucateco bible

Génesis 48

¹Cu dzo'ocol u máan dze'edze'ec kiine' j a'ala'ab ti' José, koja'an u taata. José túune' j bin u yila'e' ca tu bisaj u ca'a túul paalal, Manasés yéetel Efraín.

²Le ca j a'ala'ab ti' Jacob dzo'oc u kuchul José u paal ilique' tu ch'a'aj muuk u ti'al u cuxtal tu'ux chilicbalo'.

³Ca tu ya'alaj ti' José: U Junab Kuil tuláacal páajtalile chíicpaj teen tu nojoch caajil Luz, tu lu'umil Canaán,

⁴ca tu qui' t'aan teen yéetel le t'aano'oba': U'uye, teen quin in beet u yantal ya'ab a paalal, a ch'i'ilancabil xane' yaan u kuchul u líikso'ob u múuch'ul caajo'ob. U láak ba'ale' ti' a ch'i'ilancab bin in dzáa le lu'umo'oba'. Mix bikin bíin p'áatac ma' a ti'alintic.

⁵Bey túuna', a paalal, Efraín yéetel Manasés le j síijo'ob way tu lu'umil egipto ma'ili' taalaquen in much'quintinbáa ta wéetel way ti' le lu'uma', ba'al in ti'alo'ob. Leti'obe' jach in ti'alo'ob je'el bixo'ob Rubén yéetel Simeone'.

⁶Le paalal cu bin j antal teech pachal ti'obe', ba'al a ti'alo'ob; tu yo'olal íidzintzilo'ob ti' Efraín yéetel Manasese', tu kaaba'ob bíin dza'abac kam ba'albáil.

⁷Ca'aliquil táan in suutbal lukbalen Padan-arame', j quíim teen Raquel a maama tu lu'umil canaán, jun p'iit u binbal in kuchbal Efrata, te tin mucaji', tu bejil Efrata, bejela'e' cu kaaba'intic Belén.

⁸Israele' tu téec pactaj u paalal Josee', ca tu káatchi'itaj: ¿Lelo'oba' máaxo'obi'?

⁹Josee' tu núucaj: Lelo'oba' in paalal tu dzaj teen Ku tu lu'umil Egipto. U taata túune' tu ya'alaj ti': Beet utz a naadzico'ob teen ca in dzáa in qui' t'aan ti'ob.

¹⁰Israele' dzo'oc ca'ach u sen ch'íijil, ma' jach sáasil u yichi'. Ma' ma'alob ca'ach u paacati', let o'olale' Josee', yanchaj u nadzic u paalal ti' u taata, leti'e' tu méekajo'ob ca tu dzu'udzajo'ob.

¹¹Cu dzo'ocole', ca tu ya'alaj ti' José: Ma' tin tucultaj wa je'el in ca'a iliqueche', ba'ale' Kue' dzo'oc xan u beetic in wilic a paalal.

¹²Josee' tu lukesaj le paalal tu píix u taatae' ca j noclaj lu'umo' tu táan.

¹³Cu dzo'ocole' tu machaj tu ca'a túulal, Efraine' tu machaj yéetel u x no'oj, Manasese' yéetel u x dzíic, ca tu nadzajo'ob ti' u taata. Bey túuno' Efraine' j p'a'at tu x dzíic Israel, Manasese' tu x no'oj.

¹⁴Ba'ale' le ca tu tich'aj u kaabe' tu katcuntaj tu ca dzíitil, u x no'oj kabe' tu dzaj yóokol u pool Efraín u yíidzintzil, u x dzíic kabe' tu dzaj yóokol u pool Manasés quex leti' sucu'untzil.

¹⁵Ca túun tu qui' t'antaj José beya': Le Ku u'uyaj t'anta'ab tumeno'ob Abraham yéetel Isaac in taataob, le Ku tu canantajen líikbal u kiinil síijiquen,

¹⁶u ángel máax tu tocajen ti' tuláacal kaas. Leti' ca u qui' t'ant le paalala'. Tu yo'olalo'obe' ca ka'ajsa'ac in kaaba', bey u kaaba'ob Abraham yéetel Isaac in taataob. Ca yanac ya'abcach u paalalo'ob, ca kuchuco'ob sen nucuch cajtalo'ob yóokolcaab.

¹⁷Ba'ale' Josee' ma' utz tu yiljilac bix úuchic u dzáic u x no'oj kab u taata yóokol u pool Efraini', Bey túuno' tu machaj u kab u taatae' u ti'al u luksic yóokol u pool Efraín ca u dzáa tu yóokol u pool Manasés,

¹⁸ca'aliquile' tu ya'alaj ti': Ma' in taata, ma' beyi', je'el le sucu'untzila', dzáa a x no'oj kab yóokol u pool.

¹⁹Ba'ale' u taatae' ma' tu yóoltaj u kex u kabi', ca tu núucaj ti': ¡In wojel, in paal, in wojel! Leti' xane' bíin kuchuc nojoch cajtal. Chéen ba'ale' le íidzintzilo' bíin asab nojoch caajac ti' leti', u ch'i'ilamcabe' bíin u líikso'ob ya'abcach nucuch caajo'ob.

²⁰Láili' ti' le kiino' Jacobe' tu qui' t'antajo'ob beya': U caajil Israele', bíin u ch'a' a kaaba'ex le quéen qui' t'aanac, bey bíin u ya'ala': Ku ca u beet je'el bix tu beetilac ti' Efraín yéetel ti' Manasese'. Bey úuchic u táanilcunta'al Efraín ti' Manasés tumen Israel.

²¹Cu dzo'ocole' tu ya'alaj ti' José: Ile, tene' in ca j quíimil, ba'ale' Kue' ma' bíin u p'ate'exi', yaan u beetic a suute'ex tu lu'um a wúuchben ch'i'ibale'ex.

²²Ti' teche' tin dzaj asab ya'ab ba'alo'ob ti' le tin dzaj ti' a sucu'uno'obo'; quin dzáic teech Siquem le lu'um tin tocaj ti' le amorreob ca j ba'atelnajen yéetelo'obe'.