Read Yucateco Génesis 49 Bible Online

Génesis 49 - Yucateco bible

Génesis 49

¹Jacobe' tu t'anaj u paalal ca tu ya'alaj ti'ob: Nadzaba'ex u ti'al in wa'alic te'ex ba'ax cu taal u kiinil:

²Nadzaba'ex u ti'al a wu'uye'ex u paalale'ex Jacob, táan óolte'ex u t'aan Israel a taataex.

³Rubén teche' in nojoch paalech, in muuk yéetel u yáax ich in táanquelemil, teech yáax ti' tzicbe'enil yéetel ti' páajtalil.

⁴Ba'ale' bejela'e' ma' teech u yáax paali', tumen teche' bey jun p'éelech u muuk ja' cu sen tuul ma' tu páajtal u yedzcunta'al; tumen ta manba'alcuntaj u cúuchil in wenel iquil chilajiquech yéetel in x keech.

⁵Simeón yéetel Leví, te'exe' ca'a túul sucu'untzile'ex; a máascabe'exe' u nu'ucul meyaj loob.

⁶¡Mix bikin bíin yanaquen tu cúuchil a much'tale'ex! Tumen le ca j p'u'uje'exe' ta quíimsaje'ex wíinico'ob, chéen tu yo'olal bey ta wóoltilaque'ex, ta cachaje'ex u yooco'ob le wacaxo'obo'.

⁷¡Loolob t'anta'ac, bey, loolob t'anta'ac u sen dzíidzic p'u'ujulo'ob! ¡Teen quin in ma'alob ki'itbese'ex ichil tuláacal u caajil Israel!

⁸Judá a láaktzilo'obe' bíin u qui' t'aan techo'ob. Bíin a bidz u yúul a aj p'eeco'ob, le jach a láaktzilo'obo' bíin u chíin pooltecho'ob.

⁹¡Teech Judá in paal! Beyech u chichnil león le quéen u p'at u jaantic ba'ax tu quíimsaje'; cu mot'tal, cu chital j lu'um, bey jun túul nojoch leóne'. ¿Máax bíin páatchajac u chi'ichnaccuntic?

¹⁰Mix máac bíin luksic u páajtalil Judá, mix le jalach xóolte' yaan tu kabo', tac quéen kuchuc u kiinil u taal u taatail le jalach xóolte'o', le máax bíin u'uyaj t'anta'ac, tumen múuch' caajo'ob bíin dzo'ocbesic u t'aan.

¹¹Le máax cu kaxic u chan burro tu'ux cu pa'akal le uvaobo', le máax cu p'o'ic tuláacal u nook yéetel vino, ¡Yéetel u kaab le uvaobo'!

¹²U neek u yiche' sen asab éek ti' le vinoo', u cojo'obe' sactac bey saquil u kaab iime'.

¹³Zabulone' bíin cajlac tu jáal ka'anab, tu'ux bíin yanac cúuchil u ti'al cheemo'ob. U xuul u lu'umilo'obe' bíin kuchco'ob tac Sidón.

¹⁴Isacare' jun túul u ba'alche'il cuuch, cu je'elel yáanal u najil tu'ux cu tzéenta'al ba'alche'ob.

¹⁵Le ca tu yilaj ma'alob le caajo'ob yéetel sen utz u ti'al je'elele', tu p'usaj u pu'uch u ti'al u bisic cuuch, bey palitzile', ma' tu ya'alaj ma'i'.

¹⁶Dane' jach leti' bíin u méektáant u yéet ki'ikelo'ob bey jun múuch' u cajtalil u yotochnáalilo'ob Israele'.

¹⁷Dane' bíin béeyac, bey jun túul caan cu codzcubáa tu jáal beje', cu chi'ic u caal yooc tzíimin, cu beetic u lúubul máax nat'mail.

¹⁸¡In Yuumtzil quin pa'atic ca a toquen ti' quíimili'!

¹⁹Yóokol Gade' bíin u pulajuba'ob jun tzúuc aj ba'atelo'ob, ba'ale' tu pachale' leti' bíin u ch'a'apachte.

²⁰Asere' bíin sen yanac ba'al u jaante; bíin u dzáa u janalbe'en janal ajawo'ob.

²¹Neftalie' bey x aal quéej cha'akab u máane', yaan u mejenil jach jadzutztaco'ob.

²²Josee' bey jun cúul che' yaan tu jáal ja'e', cu yantal ya'ab u yich, u kabo'obe' cu na'acalo'ob yóokol pak.

²³Ch'a'a' p'ecta'an tumen le aj ch'iin julubo'obo', cu pulico'ob julubo' yóokol, mantadz táan u beetico'ob u chi'ichnactal;

²⁴ba'ale' Josee' yaan u muuk u kab, ma'alob u machmail u x p'unche'; ¡Nib óolal ti' le aj páajtalil u Junab Ku Jacobo'! ¡Nib óolal ti' u kaaba' le aj Canan j tamano', ti' u aj ta'acbesaj Israel!

²⁵Nib óolal ti' le u Ku a taatao', máax bíin áantiquech; ti' u Kuil tuláacal páajtalil máax bíin u dzáa ta wóokol u qui' t'aan. ¡Yéetel u qui' t'aanilo'ob ca'an! ¡Yéetel u qui' t'aanilo'ob u taamil ka'anab! ¡Yéetel xan u qui' t'aanil iimo'ob yéetel jobnel!

²⁶A taatae' tu qui' t'aan teech asab ti' qui' t'anta'abiquen tumen in taata. Tac tu xuul le mantadz cuxa'an káaxo'obo', le qui' t'aano'oba' ti' bíin p'áatac tu yóokol u pool José, máax yéeya'ab ichil u sucu'uno'ob.

²⁷Benjamine' jun túul dzíidzic loobo', tu ja'atzcabile' cu jaantic ba'ax cu quíimsic, tu yoca'an kiinile' cu t'oxic u yalab.

²⁸Lelo'oba' u doce ch'i'ibalilo'ob Israel, lela' leti' le ba'alo'ob tu ya'alaj le ca tu dzaj u qui' t'aan ti' jujun túulil u paalal.

²⁹Jun p'éel u kiinile' Jacobe' tu ya'alaj ti' u paalal: Chéen jun p'íit kiin cu bineltic in quíimil. Muquene'ex tu tzéel in máanja'an ch'i'ibalo'ob ti' le áactun yaan tu lu'um Efrón le j hititae',

³⁰te tu lu'umil canano'; in káat in wa'ale', le áactun yaan Macpelae', actáan ti' Mamre, le tu manaj Abraham pa'ate' láili' yéetel u lu'um Efrone', u ti'al u mucnalil láaktzilo'ob.

³¹Ti' j mu'uc Abraham yéetel x Sara u yatani', Isaac yéetel x Rebeca u yatan, ti' xan tin mucaj x Leae'.

³²Le lu'um yéetel le áactun yaan te'elo' j ma'ano'ob ti' le j hititaobo'.

³³Jacob le ca j dzo'oc u ya'alic ti' u paalal ba'axo'ob bíin u beetajo'obe', j chilaj tu ca'a téene' ca j quíimi.