Read Yucateco Génesis 5 Bible Online

Génesis 5 - Yucateco bible

Génesis 5

¹Lelo'oba' u tzoolol u ch'i'ilancab Adán. Le ca j beeta'ab wíinic tumen Ku; tu beetaj chica'an ti' leti',

²j xiib yéetel x ch'uup tu beetilac, ca tu pulaj u qui' t'aan yóokolo'ob ti' le kiino' beeta'abico'obo', Kue' tu ya'alaj: a'ala'ac wíinico'ob leti'ob.

³Yaan ca'ach ciento treinta ja'abo'ob ti' Adán ca j síij u paal tu kaaba'intaj Set, máax jach chica'an ca'ach ti' leti'.

⁴Cu dzo'ocole' Adane' cuxlaj u láak ocho cientos ja'abo'ob, yanchaj u láak u j xibil paalal bey u x ch'upul paalal,

⁵bey túuno' cuxlaj tu pa'ate'ile' novecientos treinta ja'abo'ob. Buca'aj u ja'abilo'ob ca j quíima'.

⁶Yaan ca'ach ciento cinco ja'abo'ob ti' Set ca j síij Enós u paal.

⁷Cu dzo'ocole', Sete' cuxlaj u láak ochocientos ja'abo'ob, yanchaj u j xibil paalal, bey u x ch'upul paalal;

⁸bey túuno' cuxlaj tu pa'ate'ile' novecientos doce ja'abo'ob. Buca'aj u ja'abilo'ob' ca j quíima'.

⁹Yaan ca'ach noventa ja'abo'ob ti' Enós ca j síij Cainán u paal.

¹⁰Cu dzo'ocol lela', Enose' cuxlaj ochocientos quince ja'abo'ob, yanchaj u láak u j xibil paalal bey u x ch'upul paalal;

¹¹bey túuna' cuxlaj u láak novecientos cinco ja'abo'ob. Buca'aj u ja'abilo'ob ca j quíima'.

¹²Yaan ca'ach setenta ja'abo'ob ti' Cainán ca j síij Mahalalel u paal,

¹³Cu dzo'ocole' Cainane' cuxlaj u láak ochocientos cuarenta ja'abo'ob, yanchaj u láak u j xibil paalal bey u x ch'upul paalal;

¹⁴bey túuna' cuxlaj novecientos diez ja'abo'ob. Buca'aj u ja'abilo'ob ca j quíima'.

¹⁵Yaan ca'ach setenta yéetel cinco ja'abo'ob ti' Mahalalel ca j síij Jared u paal.

¹⁶Cu dzo'ocole', Mahalalele' j cuxlaj u láak ochocientos treinta ja'abo'ob, yanchaj u láak u j xibil paalal bey u x ch'upul paalal;

¹⁷bey túuna' j cuxlaj ochocientos noventa yéetel cinco ja'abo'ob. Buca'aj u ja'abilo'ob ca j quíima'.

¹⁸Yaan ca'ach ciento setenta yéetel ca'a p'éel ja'abo'ob ti' Jared ca j síij Enoc u paal.

¹⁹Cu dzo'ocole' j cuxlaj Jared u láak ochocientos ja'abo'ob, yanchaj u láak u j xibil paalal bey u x ch'upul paalal;

²⁰bey túuna' cuxlaj novecientos setenta yéetel ca'a p'éel ja'abo'ob. Buca'aj u ja'abilo'ob ca j quíima'.

²¹Yaan ca'ach setenta yéetel cinco ja'abo'ob ti' Enoc ca j síij Matusalén u paal.

²²Enoque' cuxlaj jach je'el bix tu yóoltilac Kue'. Cu dzo'ocol u síijil Matusalén. Enoque' j cuxlaj u láak tres cientos ja'abo'ob, yanchaj u láak u j xibil paalal, bey u x ch'upul paalal.

²³Bey túuno' cuxlaj tres cientos setenta yéetel cinco ja'abo'ob.

²⁴Tu yo'olal cuxlajic Enoc jach je'el bix tu yóoltilac Kue'; jun p'éel kiine' samkaj tu yo'olal j bisa'ab tumen Ku.

²⁵Yaan ca'ach ciento ochenta yéetel siete ja'abo'ob ti' Matusalén ca j síij Lamec u paal;

²⁶cu dzo'ocole' j cuxlaj Matusalén u láak setecientos ochenta ja'abo'ob, yanchaj u láak u j xibil paalal bey u x ch'upul paalal;

²⁷bey túuna' cuxlaj tu pa'ate'ile' novecientos sesenta yéetel nueve ja'abo'ob. Buca'aj u ja'abilo'ob ca j quíima'.

²⁸Yaan ca'ach ciento ochenta yéetel ca'a p'éel ja'abo'ob ti' Lamec ca j síij jun túul u paal,

²⁹Lela' tu dzaj u kaaba'int Noé,[7] tumen tu ya'alaj: Yuumtzil tu loolob t'antaj le lu'uma'; yaan c meyaj, yaan c p'is muktic u ti'al c táan óoltic c paakal ba'ale' le chan j xi'ipala' bíin u beet c je'elel.

³⁰Cu dzo'ocol u síijil Noee', cuxlaj Lamec u láak quinientos noventa yéetel cinco ja'abo'ob, yanchaj u láak u j xibil paalal bey u láak u x ch'upul paalal;

³¹Bey túuno' j cuxlaj tu pa'ate'ile' setecientos setenta yéetel siete ja'abo'ob. Buca'aj u ja'abilo'ob ca j quíima'.

³²Noee' yaan ca'ach quinientos ja'abo'ob ti' ca j síijo'ob Sem, Cam yéetel Jafet u paalal.