Read Yucateco Génesis 6 Bible Online

Génesis 6 - Yucateco bible

Génesis 6

¹Le ca jo'op' u ya'abtal wíinic yóokol lu'ume' yanchaj u x ch'upul paalal.

²U paalal Kue' tu yilajo'ob qui'ichpamtac le x co'olelo'oba'. Ca túun tu yéeyajo'ob u ti'al u dzo'ocol u beelo'ob, x yéetel je'enquex tu yóoltajo'obe'.

³Ba'ale' Yuumtzile' tu ya'alaj: Ma' bíin in cha'a' ca cuxlac wíinic u ti'al ja'abo'ob mina'an u xuuli', tumen leti'e' chéen bak. Bey túuno' bíin cuxlac chéen ciento veinte ja'abo'ob.

⁴Le sen j ca'anal baaquel wíinico'obo' yanchajo'ob le ca tu nupjuba'ob u j xibil paalal Ku yéetel x ch'upul paalal le wíinico'obo' u ti'al u yantal u paalal x yéetelo'ob, cu dzo'ocol xane', leti'ob tu beetajuba'ob nucuch ba'alo'ob ti' le úuchben kiino'obo'.

⁵Yuumtzile' tu yilaj máan tip'a'an u kasa'anil le wíinic yóokol le lu'uma', mantadz xan chéen loob cu tucultic u beetic,

⁶ca j yajchaj tu yóol úuchic u beetic le wíinico'.

⁷Yéetel u yajil u yóol tu ya'alaj: Le wíinic tin beetajo' bin in ca'aj in xu'ulsej tac xan le alaktbil ba'alche'ob, le jíiltbil u máano'ob bey le ch'íich'o'obo'. ¡Sen yaj tin wóol úuchic in beetico'ob!

⁸Quex beyo' Noee' j lúub utzil tu táan Ku.

⁹Lela' u tzicbalil u cuxtal Noé: Noe' jun túul máac sen utz, mantadz cu yu'ubaj u t'antic Ku. Ichil le máaco'ob cuxa'ano'ob ti' le kiino'obo', chéen leti' cuxlaj ca'ach je'el bix tu yóoltilac Kue'.

¹⁰Noé yanchaj óox túul u paalal, tu kaaba'intajo'ob: Sem, Cam yéetel Jafet.

¹¹U ti'al Kue' le lu'uma' chuup yanil ca'ach yéetel kasa'anil, bey yéetel loobil,

¹²tumen dzo'oc u láaj kastal u kuuxtal wíinic. Le ca tu yilaj Ku yaan ca'ach sen ya'ab kasa'anil yóokol lu'ume',

¹³tu ya'alaj ti' Noé: Dzo'oc in tucultic in láaj xu'ulsic wíinic. Tu yo'olal u si'ipile' yaan ya'abcach loobilo'ob yóokolcaab, bin in ca'aj in xu'ulso'ob tac xan tuláacal u cajnáalilo'ob yóokolcaab.

¹⁴Beet jun p'éel cheem[8] yéetel che' yaan u yiitz, beet káasabo'ob ichil, tzutz yéetel u yiitz che' tuláacal u yáamo'ob, le yano'ob ichilo', bey le yano'ob paachil ti' le cheemo' u ti'al ma' yocol ja'i'.

¹⁵Beet le cheem yéetel le p'iiso'oba' Ciento treinta yéetel cinco metros u chowaquil, veintidos ca'a tac táancoch metros u cóochil, yéetel trece metros ca'a tac táancoch u ca'analil.

¹⁶Beet óox yáal le cheemo', yéetel jun p'éel calom iik bey táancoch metro tu yáanal u jo'ol najil, beet xan jun p'éel u jool ti' jun p'éel u tzéelo'ob.

¹⁷Tene' bin in ca'aj in túuxt jun p'éel búulcabal ca u pix le lu'um yéetel xan ca u xu'uls tuláacal ba'ax cuxa'an ti' tuláacal cúuchil yóokolcaab. Tuláacal ba'ax yaan te j lu'umo' yaan u quíimil.

¹⁸Ba'ale' ta wéetele' yaan in beetic jun p'éel nup t'aan; ti' le cheemo' yaan u yocolo'ob ta wéetele' a paalal, a watan yéetel a wilibo'ob.

¹⁹Bey xan unaj a bisic ichil le cheemo' jujun túul u j xiibil bey u x ch'uupil tuláacal le ba'alche'ob yano'ob yóokolcaab u ti'al ca cuxlaco'ob je'el bix teche'.

²⁰Ta wéetele' yaan u yocol ichil le cheemo' ca'a ca'a túul u jejeláasil le ba'alche'ob: bey ichil le ch'íich'o'obo', bey ichil alaktbil ba'alche'ob, bey xan ichil le cu jíilticuba'ob te j lu'umo' u ti'al ma' u quíimilo'ob.

²¹Nijcunt xan tuláacal janalbe'en ba'alo'ob, cananto'ob, u ti'al beyo' ca yanac ba'al a jaante bey xan le ba'alche'obo'.

²²Noé túune' tu beetaj tuláacal ba'ax a'ala'ab ti' tumen Ku.