Read Yucateco Génesis 7 Bible Online

Génesis 7 - Yucateco bible

Génesis 7

¹Cu dzo'ocole' Yuumtzile' tu ya'alaj ti' Noé. Ichil tuláacal le máaco'ob yano'ob ti' le kiino'oba', chéen teech ca cuxtal jach je'el bix in káate'. Tu yo'olal lelo' ooquen yéetel a paalal ichil le cheemo'.

²Chuc ichil tuláacal le ba'alche'ob utz u jaanta'alo'obo' siete u j xiibilo'ob yéetel siete u x ch'uupilo'ob, ba'ale' ichil le ma' janalbe'eno'obo' chuc chéen jun túul u j xiibil yéetel jun túul u x ch'uupil.

³Chuc xan siete u núupul tuláacal jejeláas ch'íich'o'ob u ti'al ma' u xu'ulul u ch'i'ibalo'ob yóokolcaab,

⁴Tumen ichil siete kiino'obe' yaan in beetic u káaxal ja' cuarenta kiino'ob yéetel cuarenta áakabo'ob. ¡Bin in ca'aj in xu'uls tuláacal ba'ax cuxa'an in beetmaj yóok lu'um!

⁵Noee' tu beetaj tuláacal jach je'el bix a'ala'abic ti' tumen Yuumtzile'.

⁶Le ca j bu'ul le lu'um tumen le búulcabalo', ti' Noee' yaan ca'ach seis cientos ja'abo'ob.

⁷Noé túune' j ooc yéetel u paalal, u yatan bey xan u yilibo'ob ichil le cheem u ti'al u ta'acbesicuba'ob ti' le búulcabalo'.

⁸Le janalbe'en ba'alche'ob yéetel le ma' janalbe'eno'obo', le cu xiknalo'ob bey le cu jíiticubaobo',

⁹j ooco'ob yéetel Noé ichil le cheemo', ca'a ca'a túulil j xiib yéetel x ch'uup, je'el bix tu nu'uctilac Kue'.

¹⁰Tu siete kiino'obe' le búulcabalo' jo'op' u pixic le lu'uma'.

¹¹Ti' u kiinil diez yéetel siete ti' le ca'a p'éel meso', yaan ca'ach ti' Noé seis cientos ja'abo'ob Jach ti' le kiino', xíiclajo'ob u sayabilo'ob le nojoch ka'anabo', ca j je'epaj xan u kalabilo'ob ca'an.

¹²Cuarenta kiino'ob yéetel cuarenta áakabo'ob káax ja' yóokol le lu'uma'.

¹³Ti'ilie' kiino' j ooc Noé ichil le cheem yéetel u paalal, u kaaba'obe': Sem, Cam yéetel Jafet; u yatan yéetel u yilibo'ob.

¹⁴Yéetel leti'obe' j ooco'ob xan tuláacal u jejeláasil káaxil ba'alche'ob, alaktbil ba'alche'ob, bey tuláacal u jejeláasil ch'íich'o'ob.

¹⁵Tuláacal le ba'alche'obo' ca'a ca'a túulil ooquico'ob ichil le cheemo' yéetel Noé.

¹⁶J ooco'ob jun túul j xiib yéetel jun túul x ch'uup, jujun túul u jejeláasil, je'el bix a'ala'abic ti' Noé tumen Kue', cu dzo'ocole' Yuumtzile' tu kalaj u jool le cheemo'.

¹⁷Le búulcabalo' xaanchaj cuarenta kiino'ob. Le ca j na'ac le ja'o', j líik le cheem te j lu'umo' ca j p'áat kaacba yóok ja'.

¹⁸Le ja'o' j bíin u na'acal asab ca'anal, ba'ale' le cheemo' láili' táan u bin u báabe'.

¹⁹Sen ca'analchaj le ja'o', j kuch tac u pix u sen ca'analil u witzilo'ob le lu'umo';

²⁰Cu dzo'ocol u pixic le witzo'obo' na'ac u láak siete metros yóokolo'ob,

²¹Bey úuchic u quíimil tuláacal máac cuxa'an yóokol lu'um, ch'íich'o'ob, alaktbil ba'alche'ob, káaxil ba'alche'ob, bey xan le cu jilanquilo'ob te j lu'umo'.

²²Tuláacal ba'ax yaan j lu'um, yaan cuxtal ti' yéetel cu múus iike' j quíimi.

²³Chéen Noé yéetel le yano'ob ichil le cheemo' j p'áat cuxa'ano'ob; le u chuucanilo'obe' j xu'ulsa'abo'ob: wíinico'ob, alaktbil ba'alche'ob, ch'íich'o'ob cu xiknalo'ob, bey xan le ba'alche'ob cu jíilticuba'obo';

²⁴ciento cincuenta kiino'ob j xaanchaj buululil le lu'umo'.