Read Yucateco Génesis 8 Bible Online

Génesis 8 - Yucateco bible

Génesis 8

¹Ku túune' tu ka'ajesaj Noé bey xan tuláacal le ba'alche'ob yano'ob yéetele', te ichil le cheemo'. Ca tu beetaj u yustaj iik yóok lu'um, le ja' túuno' jo'op' u sa'ap'al;

²ca j ka'al u sayabilo'ob u taamilo'ob le ka'anabo' bey xan u kalabilo'ob ca'an. Ca j jáaw u káaxal ja',

³le ja' túuno' jo'op' u sa'ap'al jujun p'íitil. Cu dzo'ocol u máan ciento cincuenta kiino'obe', le ja'o' j bin u sa'ap'al;

⁴tu kiinil diez yéetel siete ti' u mesil siete ca je'el le cheem yóokol u witzil Ararat.

⁵Ca'aliquile' le ja'o' táan u bin u sa'ap'al; tu yáax jun p'éel u kiinil u mesil diez páatji u yila'al u asab ca'anlil le witzo'obo'.

⁶Cu dzo'ocol u máan cuarenta kiino'obe', Noe' tu je'aj u calom kiinil le cheem tu beetajo'

⁷ca tu cha'aj jun túul j ch'oom; ba'ale' le j ch'oomo' xiknalnaj tzela'an tzéel tac ca j tij le lu'umo'.

⁸Cu dzo'ocol u máan kiin u cha'akabt le j ch'oomo', tu cha'akabtaj jun túul sacpacal u ti'al u yojéeltic wa dzo'oc u tijil le lu'umo'.

⁹Ba'ale' le sacpacalo' suunaj te j cheemo', tumen ma' j páatji u t'úuchul mix tu'uxi' tu yo'olal láili' pixa'an le lu'um tumen le ja'o'. Noé túune' tu jóoksaj u kabe' ca tu machaj le sacpacalo' ca tu yocsaj ichil le cheemo'.

¹⁰Noee' tu pa'ataj u máan u láak siete kiino'obe' ca tu cha'akabtaj tu ca'a téen le sacpacalo'.

¹¹Táan u yéeksame'ental ca j suunaj le sacpacal yéetel jun chan xéet' u kab olivo tu coj. Bey tu yojéeltilac Noé táan u tijil le lu'umo'.

¹²Tu pa'ataj u máan u láak siete kiino'obe' ca tu ca'a cha'akabtaj le sacpacalo', ba'ale' ma' j suunaj le sacpacalo'.

¹³Seis cientos yéetel jun p'éel u ja'abil Noé ca j tij le lu'umo'. Tu yáax jun p'éel kiin ti' le yáax meso' Noee' tu je'aj u yóokol le cheemo' ca tu yilaj dzo'oc u tijil le lu'umo'.

¹⁴U ti'al u kiinil veinte yéetel siete ti' le ca'a p'éel meso' le lu'umo' dzo'oc ca'ach u ma'alob tijil.

¹⁵Ca j a'ala'ab túun ti' Noé tumen Ku:

¹⁶Jóoken ti' le cheem pa'ate' yéetel a watan, a paalal, yéetel a wilibo'ob.

¹⁷Jóokes xan tuláacal ba'alche'ob yano'ob ta wéetelo': le ch'íich'o'obo', alaktbil ba'alche'ob bey le cu jíilticuba'obo' u ti'al ca ki'itpajaco'ob tuláacal yóok lu'um, ca ya'abchajaco'ob ca u chupo'ob xan yóokolcaab.

¹⁸Jóoko'ob túun ti' le cheemo', Noé, u yatan, u paalal bey u yilibo'ob.

¹⁹Jóoko'ob xan tuláacal alaktbil ba'alche'ob, káaxil ba'alche'ob, le cu jíilticuba'ob tac xan le ch'íich'o'obo'.

²⁰Cu dzo'ocole' Noé tu beetaj jun p'éel u multuunil kultaj[9] u ti'al u tzicbe'enil Yuumtzil, tu ch'a'aj jujun túul ti' u jejeláasil u ma'alobil ba'alche'ob, ch'íich'o'ob ca tu táanbesaj ti' Yuumtzil bey tóocbil ti'ibil óolale'.

²¹Le ca j kuch u jadzutz qui'iboquil ti' Yuumtzile' tu ya'alaj: Mix bikin bíin in ca'a loolob t'ant le lu'um tu yo'olal u si'ipil wíinic, tumen likul tu táanquelmil chéen kaakas tuucul yaan ti' le máaco'. Mix xan bíin suunaquen in xu'uls tuláacal ba'alche'ob je'el bix dzo'oc in beetico'.

²²Ca'aliquil dzaca'an yóokolcaabe', yaan u yantal paakal yéetel jooch; yaan u yantal ooxow yéetel que'el, bíin yanac que'elil yéetel yáax kiinil, bey xan kiino'ob yéetel u yáakabilo'ob.