Read Yucateco 2 Samuel 1 Bible Online

2 Samuel 1 - Yucateco bible

2 Samuel 1

¹Cu dzo'oco'ol u quíimil Saúle', Davide' j suunaj Siglag le ca j dzo'oc u pa'ic u muuk le j amalequitaobo', ca j p'áat ca'a p'éel kiino'obi'.

²Ba'ale' tu yóox p'éel kiine', j kuch jun túul máac j luk tu'ux cu je'elel ca'ach Saúl láaj tzi'itzi'ic u nook yéetel u tóos lu'umtmaj u pool iquil u chíicultic yaj óol. Le ca j kuch tu yicnal Davide', noclaj lu'um u ti'al u te'escuntic.

³Davide' tu káat chi'itaj ti': ¿Tu'ux a taal? Le j xiibo' tu núucaj: páatchaj in púudzul tu cúuchil tu'ux cu je'elelo'ob u aj ba'atelo'ob Israel.

⁴Davide' tu káat chi'itaj ti': ¿Ba'ax dzo'oc u yúuchul? ¡Beet utz a wa'alic ti' teen!. Le j xiibo' tu núucaj: le aj ba'atelo'obo', j puudzo'ob ti' le ba'atelo', ya'ab ti' leti'ob j quíimo'obi'. ¡J quíim xan Saúl yéetel Jonatán u paal!

⁵Davide' tu káat chi'itaj ti' le máax taas le t'aano': ¿Bix úuchic a wojéeltic j quíim Saúl yéetel Jonatán u paal?.

⁶Letie', tu núucaj: Ma' j taal ti' teen in taal ca'ach tu pu'uquil Gilboae', ca tin wilaj Saúl táan u nóocch'intcubáa tu yóokol u lóomte', ta'itac ca'ach u chucpachta'al tumen u bolanilo'ob ba'atel yéetel u tzimino'ob le aj p'eeco'.

⁷Ti' le súutuco' tu sutaj u yich paachil, le ca tu yilajene', tu t'anajen. Tene' tin dzajinbáa in beet ba'ax tu ya'alaj.

⁸Cu dzo'ocole' tu káat chi'itaj ti' teen máaxen, ca tin wa'alaj ti'e' j amalecquilen.

⁹Leti' túune' tu káataj ti' teen ca in nadzimbáa in quíims jun puli', tumen dzo'oc u jo'op'ol u x chakéetal, ba'ale' láili' cuxa'an ca'ache'.

¹⁰Teen túune' tin nadzajinbáe', ca tin quíimsaj, tumen tin wilaj ma' bíin páatac u cuxtal cu dzo'ocol u lúubulo'. Cu dzo'ocole', tin lukesaj ti' u x bak kab yéetel u péet jo'ol u ti'al in taas ti' teech in dzuulil.

¹¹David túun yéetel le máaxo'ob láakintmailo', tu jatajo'ob u nooko'ob tu yo'olal u chíiculalil yaj óolal,

¹²ca tu sen yaj oktajo'ob úuchic u quíimil Saúl yéetel Jonatán u paal, bey xan tumen j pa'ab u muuk le j israelitaob u aj ba'atelo'ob Yuumtzil, ca j yanchaj u su'ukino'ob tac u yocbal kiin.

¹³Cu dzo'ocole', Davide' tu káat chi'itaj ti' le j xi'ipal j taas le t'aan ti'ob: ¿Tu'ux a taal? Letie' tu núucaj: j táanxel lu'umilen, jun túul j amalequilen.

¹⁴Davide' tu ka'am a'alaj: ¿Ba'ax teen ta líiksaj a kab ti' le ajaw yéeya'an tumen Yuumtzilo'?

¹⁵Tu t'aanaj jun túul ti' u palitzilo'obe', ca tu ya'alaj ti': ¡Xeen a quíimsej! Letie', tu quíimsaj le j amalequilo',

¹⁶ca'aliquil Davide', táan u ya'alic: Teech ta caxtaj a quíimil, ta juunal ta tacaj a pool teech a'al ta quíimsaj le ajaw máax yéeya'an tumen Yuumtzilo'.

¹⁷Davide', tu kayaj le okol kaya', tu yo'olal quíimic Saúl yéetel Jonatán u paal,

¹⁸ca tu ya'alaj ca ca'anbesa'ac ti' u caajil Judá. Le okol kaaya', j dzíibta'ab, tu Ju'unil Aj ti'ibil bej.

¹⁹¡Teche' Israel, loobilta'ab a nojbe'enil ta pu'uquilo'ob! ¡Dzo'oc u lúubul u jach j xiibilo'ob a aj ba'atelo'ob!

²⁰Ma' a ka'aytique'ex tu caajil Gat mix a tzicbaltique'ex tu yáam bejilo'ob u caajil Ascalón, u ti'al ma' u qui'imactal u yóolo'ob u co'olelilo'ob x Filisteobo', u ti'al ma' u yóokoto'ob yéetel qui'imac óolal le x ma' ocsaj óolalo'ob.

²¹¡Jáawac u káaxal ja' yéetel ye'eb ta wóokole'ex u pu'uquilo'ob Gilboa, tumen u lu'umile'ex quíimil! Ti' j xanabcha'ata'ab u chimalo'ob le j xiixib máaco'obo'. Ti' j sa'at u jóopbal u chimal Saúli'.

²²Saúl yéetel Jonatane', mix jun téen j suunajo'ob wa ma' u papakcuntmuba'ob u máascabo'ob bey xan u x julubo'ob yéetel ki'ik bey xan yéetel u tzaatzel xiixib aj ba'atelo'ob.

²³Saúl yéetel Jonatán, sen yaacuntbil máaco'ob, mix tu cuxa'anilo'ob mix tu quimenilo'ob tu jun páaycuntuba'ob. ¡Asab séeba'ano'ob ca'ach ti' le j cóoto'! ¡Asab mu'uka'ano'ob ca'ach ti' leono'ob!

²⁴¡U x chupul paalale'ex Israel, okolnene'ex tu yo'olal Saúl máax búucbesique'ex ca'ach yéetel chacjome'en nook, bey xan yéetel ma'alob lino, jadzutzquinano'ob ca'ach yéetel jit'bil oro!

²⁵¡Dzo'oc u lúubulo'ob j xiixib máaco'ob te tu cúuchil ba'atelo'! ¡Jonatane', j quíimsa'ab tu ca'analil le pu'uco'obo'!

²⁶¡Okom óol in wanil ta wo'olal in sucu'un Jonatán! ¡Buca'aj utzil úuchic a bisicabáa tin wéetel! In ti'al tene', a wutzile', asab ya'ab ti' u yaacunaj co'olelo'ob.

²⁷¡Dzo'oc u lúubul le j xiixib máaco'obo'! ¡U nu'uculo'ob le ba'atelo' dzo'oc u ca'acacha'alo'ob!