Read Yucateco 2 Samuel 10 Bible Online

2 Samuel 10 - Yucateco bible

2 Samuel 10

¹Cu máam dze'edzec kiino'obe', j quíim Nahas u ajawil j amonitaobe', ca j ajawtnaj Hanún u paal.

²David túune' tu tucultaj unaj u bisicubáa ma'alob yéetel Hanún u paal Nahas, u ti'al u sutic u je'el le utz beeta'ab ti' tumen u taatao', ca tu túuxtaj dze'edzec u nuuquil u aj meyajo'ob bisic u yaj óol ti' úuchic u quíimil u taata. Ba'ale' le ca j kuch u nuuquil u aj meyajo'ob David tu lu'um le j amonitaobo',

³u nuuquil le j amonitaobo', tu ya'alajo'ob ti' Hanún u ajawilo'ob: ¿Cu tucultic a tzicbe'enil chéen tu túuxtaj David, le máaco'ob u ti'al u taaso'ob ti' teech u t'aanil u yaj óolal quíimic a taatao'? ¡C tucultique', tu túuxtaj u ti'al u xakal ilico'ob le caaja', u ti'al ca taalaco'ob u xu'ulso'ob!

⁴Hanún túune' tu beetaj u ma'achal u nuuquil u aj meyajo'ob Davide', ca tu dzicaj u me'exo'ob, bey xan ja'at u nooko'obe' ca sen cóomquinta'ab tac tu yóokol u bakel yiito'ob, ca j tojolch'iinta'abo'ob.

⁵Le ca tu yojéeltaj Davide', tu túuxtaj ch'a'abil u beelo'ob tumen sen sublaco'ob ca'achi, tu ya'alaj ti'ob ca p'áataco'ob Jericó u p'áato'ob u nuuctal u me'exo'ob u ti'al ca suunaco'ob.

⁶Le j amonitaobo', tu na'atajo'ob dzo'oc u sen lúubulo'ob kaasil ti' Davide', ca tu bo'otajo'ob veinte mil u aj ba'atelilo'ob j siriob u caajnáalilo'ob Bat-rehob yéetel Soba, u ajawil Maaca yéetel mil j xiibo'ob yéetel doce mil u aj ba'atelilo'ob Is-tob u ti'al áantico'ob j ba'atel.

⁷Ba'ale' Davide' tu yojéeltaje', ca tu túuxtaj Joab yéetel tuláacal u aj ba'atelo'ob.

⁸Le j amonitaobo', tu nadzajuba'obe', ca tu nu'ucbesuba'ob j ba'atel tu jool le caajo', ca'aliquil u aj ba'atelilo'ob le j siriob Sobailo'ob yéetel Rehobilo'ob bey xan u aj ba'atelilo'ob Is-tob yéetel Macae', tu tzolajuba'ob te j tu cúuchil le ba'atelo'.

⁹Le ca tu yilaj Joab bin u ca j ba'ateltbil táanil yéetel paachile', tu yéeyaj u mu'uka'anil le aj ba'atelo'obo', ca tu nu'ucbesajubáa u ba'atelt le j siriobo'.

¹⁰Cu dzo'ocole' tu kubaj ti' Abisai u sucu'un u yalab le aj ba'atelo'ob u ti'al j ba'atel yéetel le j amonitaobo',

¹¹Ca tu ya'alaj ti': Wa le j siriob asab mu'uka'ano'ob ti' teno', bíin taalaquech a wáanten, ba'ale' wa le j amonitaob asab mu'uka'ano'ob ti' techo', bíin xi'iquen in wáantech.

¹²Yanac a wóol, ba'atelnaco'on tu yo'olal c lu'umo'ob yéetel tu yo'olal u caajalo'ob c Ku. ¡Yuumtzil bíin u beet le ba'ax cu yilic unaj u beetique'!

¹³Joabe', j náachchaj yéetel u ba'atelo'ob, uti'al u bin tu yóokol le j siriobo', ba'ale', j púudzo'ob tu táan.

¹⁴Le ca tu yilaj le j amonitaob dzo'oc u púudzul le j siriobo', j púudzo'ob xan tu táan Abisaie', ca j ooco'ob ichil le caajo'. Joab túune' jáaw u ba'atel yéetel le j amonitaobo', ca j suunaj Jerusalén.

¹⁵Le ca tu yilaj le j siriob dzo'oc u pa'abal u muuko'ob tumen Israele', tu much'ajuba'ob tu ca'a téen.

¹⁶Hada-ezere', tu túuxtaj le j siriob caajnáalo'ob tu táanxel u áalcab ja'il Efrautese', ca j kucho'ob Helam. Tu táano'ob yaan ca'ach Sobac, u nojochil u aj ba'atelo'ob Hadad-ezer.

¹⁷Ba'ale', j tzicbalta'ab ti' Davide', ca tu péecsaj tuláacal Israel, cu dzo'ocol u ch'actic u yáalcab ja'il Jordane', j kuch Helam. Te'elo', le j siriobo', j ba'atelnajo'ob yéetel David,

¹⁸ba'ale'j púudzo'ob tu táan le j israelitaobo', tumen quíimsa'ab cuarenta mil u aj ba'atelo'ob cu nat'ico'ob tzíimin yéetel setecientos cu ba'atelo'ob ti' bolano'ob; yéetele', Davide' tu loobiltaj Sobac u nojochil u aj ba'atel le j siriobo', ca j quíim te'elo'.

¹⁹Le ca tu yilajo'ob tuláacal le ajawo'ob u yéet ba'atelo'ob Hada-ezer dzo'oc u pa'abal u muukob tumen le j israelitaobo', tu kaax t'antajo'ob jéedzel yéetelo'obe', ca méektáantabo'ob. Líikbal ti' le kiino', le j siriobo', tu ch'a'ajo'ob sajaquil u yáantico'ob le j amonitaobo'.