Read Yucateco 2 Samuel 12 Bible Online

2 Samuel 12 - Yucateco bible

2 Samuel 12

¹Yuumtzile' tu túuxtaj aj bóobat Natán u yila'a David. Le ca j kuch Natán tu yicnal Davide', tu ya'alaj ti': Ti' jun p'éel caaje' yaan ca'ach ca'a túul máaco'ob. Jun túule' ayikal, u láak jun túule', óotzil.

²Le ayikalo', yaan ca'ach ya'ab u x tamano'ob yéetel u x wacaxo'ob,

³ba'ale' le óotzilo', chéen jun túul u chan x taman u manmaj ca'achi. Leti' tu kabil tu tzéentaj, le chan x tamano', j ch'íij tu yicnal yéetel u paalal; múul janal yéetel múul ukul cu beetico'ob ca'ache', ti' cu wenel tu yóokol u tzeeme'. ¡Le máaco' tu sen yaabiltaj bey ca'ach u x ch'upul paale'!

⁴Jun téene', j kuch jun túul j táanxel lu'umil xíimbaltic le ayikalo'; ba'ale' ma' tu yóoltaj u ch'a'a mix jun túul ti' u x tamano'ob wa u x wacaxo'ob u ti'al u máakant u jaant le máax bin xíimbaltico', ba'ale' tu tocaj u x taman le óotzil máaco' ca tu máakantaj u ti'al u dzáa u jaant le máax j bin xíimbaltico'.

⁵Davide' sen j p'u'uj tu yo'olal le máaco', ca tu ya'alaj ti' Natán: ¡Quin jalach t'antic teech tu kaaba' Junab Ku, máax beet le ba'alo' cu najmatic u quíimil!

⁶¡Unaj u bo'otic can jaatz u tojol le chan x tamano', tumen tu beetaj x ma' ch'a'a óotzilil!

⁷Natán túune', tu ya'al ¡Teech le máaco'! Je'el ba'ax cu ya'alic Yuumtzil u Ku Israela': Tene' tin yéeyajech u ti'al a ajawtal Israele', ca tin tocajech tu kab Saúl;

⁸Tin dzaj teech u jalach naj yéetel u yatano'ob a dzuulil, tin kubaj xan teech u lu'umilo'ob Israel yéetel Judá. Cu dzo'ocole', bíin xan in dzáatech ca'ach u láak ba'alo'ob ichil.

⁹¿Ba'axten ta kéex óoltaj in t'aan ca ta beetaj ba'ax in p'eec? Dzo'oc a quíimsic Urías j ititail tu kab j amonitaob, dzo'oc xan a ch'a'ic u yatan.

¹⁰Bey dzo'oc a kéex óoltiquen úuchic a ch'a'ic u yatane', mix bikin bíin jáawac u yantal jáanpay óolal ichil a láaktzililo'ob.

¹¹Teen Yuumtzile' quin wa'alic: Bin in ca'aj in beet u taal le kaas ichil a láaktzililo'obo', tu táan a wich bíin in toc a watan u ti'al in kub ti' jun túul a láaktzilo'ob u ti'al u múul chital tu x yéetel tu píik sáasilil kiin.

¹²Wa teech ta beetaj x muclile', tene' bíin in beet tu táan yich tuláacal Israel tu píik sáasil kiin.

¹³Davide' tu cáantaj tu táan Natán: Dzo'oc in kebanchajtal tu táan Yuumtzil. Natane' tu núucaj ti': Yuumtzile' bíin u jadzech tu yo'olal a keban, ma' bíin u quíimsechi.

¹⁴Ba'ale' bey tumen dzo'oc a sen sublanquintic Ku, a paal táant u síijilo', bíin quíimic.

¹⁵Le ca j suunaj Natán tu yotoche', Yuumtzile', tu beetaj u chakeet koja'antal le chaan pal síijsa'ab ti' David tumen u yatan Uríaso'.

¹⁶David túune' j káat óolnaj ti' Ku tu yo'olal le chaan palo', su'ukinaje', ca tu máansaj áakabo'ob chilicbal j lu'um.

¹⁷U nuuquilo'ob le caaj caajnáalo'ob tu jalach najo', j bino'ob u káat óolto'ob ti' ca líikic, ba'ale' leti'e' ma' tu yóoltaji', cu dzo'ocole', ma' xan tu janal mix tu yukul ca'ach tu yéetelo'ob.

¹⁸Cu dzo'ocol u máan siete kiino'obe', j quíim le chaan palo', u aj dzíibo'ob Davide', sajaco'ob ca'ach u ya'alo'ob ti', tumen tu tucultajo'ob: Wa le ca'ach cuxa'an le chaan pal ma' tu táan óoltic c t'aane', ¿bejela'e' bix je'el u páajtal c a'alic ti' wa dzo'oc u quíimile'? ¡buca'aj bíin yajchajac tu yóol úuchic u quíimil!

¹⁹Ba'ale' le ca tu yilaj David táan u x mucul t'aano'ob u aj dzíibo'ob tu baatzilo'obe', tu na'ataj dzo'oc u quíimil le chaan palo', ca tu káat chi'itaj ti'ob: ¿Dzo'oc wa u quíimil le chaan palo'? Leti'obe' tu núucajo'ob ti': dzo'oc u quíimil.

²⁰David túune', j líik j lu'um, ichquilnaji, tu qui'iboccuntubáa yéetel tu kexaj u nooke', ca j ooc ich kulnaj u ti'al u qui'iqui' t'ant Yuumtzil. Cu dzo'ocole', j bin tu yotoche', ca tu káataj u janale', ca jaani.

²¹u aj dzíibo'ob túune' tu káat chi'itajo'ob ti': ¿Ba'axten cu beetic bey a Tzicbe'enilo'? Ca'aliquil cuxa'an ca'ach le chaan palo', a Tzicbe'enile', cu su'ukiin yéetel cu yokoltic; Bejela' dzo'oc u quíimile', ¡ca líikil janal!

²²Davide' tu núucaj: Ca'aliquil cuxa'an ca'ach le chaan palo', quin su'ukiin yéetel quin wokol, tumen tin tucultaj je'elajqui u cha'ic teen óotzilil ca'ach Yuumtzil u ti'al ca u p'at u cuxtale'.

²³Ba'ale' bejela'a' dzo'oc u quíimile', ¿ba'ax biilal ca su'ukinaquen wa ma' tu páajtal in beetic u ca'a cuxtal? ¡Teen bíin xi'iquen tu yicnal, ba'ale' leti'e' ma' bíin suunac tin wicnali'!

²⁴Cu dzo'ocole', Davide' tu líiksaj u yóol u yatan. J bin u xíimbalte', ca tu nupubáa x yéetel, letie', x yo'omchaj, ca tu síijsaj u chaan pal máax ti' tu dzaj u kaaba'int Salomón. Yuumtzile' tu yaabiltaj le chaan palo',

²⁵ca tu dzaj u yojéelt David tu chi' Natán. Bey túuno' Davide' tu dzaj u kaaba'int Jedidías[1] tu yo'olal Yuumtzil.

²⁶Ca'aliquile', Joabe' tu ba'ateltaj le j amonitaob tu caajil Rabá, le ca tu yilaj ta'itac u ch'a'ico'ob u jalach caajile',

²⁷tu túuxtaj a'albil ti' David beya': Táan in ba'ateltic Rabá, dzo'oc in ch'aic le caaj tu'ux cu yúuchul canán tumen le aj ba'atelo'obo'.

²⁸Bey túuno', u much'quint a Tzicbe'enil le aj ba'atelo'ob yaan tu yicnalo', ca u ba'atelt le caaj u ti'al u ch'a'ico', tu yo'olal ma' in ch'a'ic teen u ti'al ca dza'abac in kaaba' ti'.

²⁹David túune' tu much'quíintaj tuláacal u aj ba'atelo'obe', ca j bin tu tojil Rabá, tu ba'atelte', ca tu ch'a'aj.

³⁰Cu dzo'ocole' tu lukesaj tu pool u ajaw le péet jo'ol oro u ca'aj yaan u jadzutz tuunichilo'ob treinta yéetel óox p'éel kilos u aalile', ca j dzaab tu pool David. Tu ch'a'aj xan David ti' le caaj ya'ab ba'alo'ob co'oj u tojolo'ob,

³¹le máaco'ob j p'áato'ob ti' le caajo', tu jóokeso'obe', ca tu beetaj u meyajo'ob yéetel x kupche'ob, yéetel u nu'ucul u yúuchul jooch, yéetel báato'ob fierro u caajo'ob, bey xan ti' u chujcabilo'ob pat pak lu'um. Bey tu beeetilac yéetel tuláacal u caajilo'ob le j aminitaobo', cu dzo'ocole', j suunaj Jerusalén yéetel tuláacal u aj ba'atelo'ob.