Read Yucateco 2 Samuel 13 Bible Online

2 Samuel 13 - Yucateco bible

2 Samuel 13

¹Absalón u paal Davide', yaan ca'ach jun túul u yíidzin sen qui'ichpam cu kaaba'intic x Tamar. Ba'ale', Amnone' láili' u paal Davide', utzchaj ca'ach tu yich le x Tamaro',

²tu yo'olal lelo' j koja'anchaj ti' u okom óolal, tumen u yíidzine', ma' u nupubáa ca'ach yéetel mix jun túul j xiibe', let o'olal sen talam u beetic wa ba'ax ti'.

³Ba'ale', Amnone' yaan jun túul u yéet óol sen yaan u na'at cu kaaba'intic Jonadab u paal Simea, u sucu'un David.

⁴Jun p'éel kiine', Jonadabe' tu káat chi'itaj ti': ¿Ba'ax cu yúuchul ti' teech u paal ajaw? ¿Ba'axten cu bin a koja'antal sáansamal? ¿Ma' wa bíin a wa'al ti' teen? Amnone' tu núucaj: Utz tin wich x Tamar, u yíidzin in wíidzin Absalón.

⁵Jonadab túune', tu tzol xiquintaj: Chilen ta kaane', ca a beet bey koja'aneche'. Le quéen xi'ic a taata u yileche', káat óolte ti' ca u túuxt a wíidzin x Tamar u ti'al u beet jun p'éel janal u ti'al u dzáa ti' teech, u ti'al ca a wilé yéetel u ti'al ca a jaant ba'ax bíin u dzáa ti' teech.

⁶Amnone' j chilaj tu káane', ca tu beetaj bey koja'ane'. Le ca j bin ilbil tumen ajawe', Amnone', tu ya'alaj ti': ¡Beet ti' teen jun p'éel utz! Taalac in wíidzin x Tamar tin wicnal u ti'al u pakacht ca'a p'éel piimpim waajo'obe', ca u dzáa ti' teen leti' tu kabil.

⁷David túune' tu túuxtaj x Tamar ti' le najo' ca tu ya'alaj ti': Beet utz a bin tu yotoch a sucu'un Amnone', ca a beet ba'al u jaantej.

⁸X Tamare', j bin tu yotoch u sucu'un Amnón, leti'e' chilicbal ca'ach tu kaan. Tu ch'a'aj juuch'e', ca tu ya'achtaj, tu pakachtaj le piimpim waajo', ca tu póocajo'ob;

⁹cu dzo'ocole', tu ch'a'aj le x jáaycab cuumo', ca tu dzaj le waajo'ob ti'o'; ba'ale' Amnone' ma' tu yóoltaj janali', ca tu beetaj u jóokol tuláacal le máaxo'ob yano'ob ichil le najo'.

¹⁰Cu dzo'ocol u láaj jóokesic le máaxo'ob yano'obo', Amnone' tu ya'alaj ti' x Tamar: Taas le janal tin wicnala', ca a dzáa in jaant ta kabil. X Tamare', tu ch'a'aj le piimpim waajo'ob tu beetajo', ca tu bisaj ti' j Amnón u sucu'un te tu'ux chilicbalo',

¹¹ba'ale' le ca j náadz u ti'al u dzáic u janal Amnone', leti'e' tu cháach machtaje', ca tu ya'alaj ti': In wíidzin co'oten j chital tin wéetel.

¹²Ma', in sucu'un, ma' a pajic in subtal, tumen lelo' ma'atech u beeta'al Israel. ¡Ma' a beetic ba'al subtzil!

¹³¿Tu'ux bíin xi'iquen in bal in subtal? Teech xane', bíin a'ala'ac a j ma' na'atil tu caajil Israel. Quin káat óoltic ti' teech ca t'aanaquech yéetel ajaw, leti'e', ma' bíin u ya'al ti' teech ma' a ti'alintiqueni'.

¹⁴Amnone', ma' tu táan óoltaj ba'ax cu ya'aliqui', bey asab mu'uka'an ti' x leti'o', tu t'onquintaje', ca j chilaj tu x yéetel.

¹⁵Ba'ale' cu dzo'ocol u chital tu x yéetele', ca sen lúub kaasil ti', asab nojoch úuchic u lúubul kaasil ti' le u yaabiltmail ca'acho'. Bey túuno' tu ya'alaj ti': Líiken xeen.

¹⁶X Tamare' tu núucaj ti': ¡Ma beyi' in sucu'un, tumen a tojolch'intiquen beyo', asab nojoch a kaasa'anil ti' le loob dzo'oc a beetic ti' teno'! Amnone', ma' tu yóoltaj u táan óolti';

¹⁷ba'ale' tu t'anaj u palitzile', ca tu ya'alaj ti': ¡Jóokes le co'olel waya', ca a kal ma'alob le jool najo'!

¹⁸Le palitzilo', tu jóokesaj ichil le najo', ca tu kalaj le jool najo'. X Tamar túune', u búuquintmaj ca'ach jun p'éel jadzutz x suyem nook je'el bix suuc u búuquintic u sujuy x ch'upul paalal ajawe',

¹⁹tu tosaj ta'anil káak tu pool, tu jataj u nook yéetel tu dzaj u kabo'ob tu yóokol u poole', ca jo'op' u bin u yokol ti' le bejo'.

²⁰Káat chi'ita'ab túun ti' tumen u sucu'un Absalón: ¿A sucu'un Amnón beet ti' teech beyo'? wa beyo' in wíidzin mac a chi', leti'e' a sucu'un. Ma' u sen tucultic le ba'ala'. Le ca tu yilaj x Tamar xump'ajtane', j p'áat tu yotoch u sucu'un Absalón.

²¹Le ca tu yojéeltaj David le ba'ax úucho', sen p'u'uji; ba'ale' ma' tu keyaj Amnoni', tumen bey u yáax paalo', u sen yaabiltmaj ca'achi.

²²Absalón xane', ma' tu ya'alaj mix ba'al ti' Amnón quex tumen tu sen p'ectaj tu yo'olal ba'ax tu beetaj ti' x tamar u yíidzini'.

²³Cu dzo'ocol u máan ca'a p'éel ja'abo'ob úuchuque', u j meyajo'ob Absalone', táan ca'ach u kos tamano'ob Baal-hazor, naadz ti' u caajil Efraín, Absalone' tu páay óoltaj janal tuláacal u paalal ajaw.

²⁴J bin xan u yila'a le ajawo' ca tu ya'alaj ti': Bey táan u ko'osol in j tamano'ob tumen in j meyajo'obo', quin dzíiboltic ca u láakinten a tzicbe'enil pa'ate' yéetel u nuuquil u aj meyajo'ob tu yicnal a palitzila'.

²⁵Ba'ale' ajawe' tu núucaj ti': Ma' in paal, ma' bíin láaj xi'ico'on ta wicnali', je'el c beetic u sen tojoltic ti' teche'. Quex tumen Absalón tu sen babal a'alaj ti'e', ajawe' ma' tu yóoltaj j bini', ba'ale' tu qui' t'antaj.

²⁶Absalón túune' tu ya'alaj ti': Wa ma' tu páajtal a bine'exe', cha'a' u bin quex in sucu'un Amnón u láakinto'on. Ajawe' tu káachi'itaj ti': ¿ba'axten a káat ca xi'ic u láakintech Amnón?.

²⁷Ba'ale' tu yo'olal tu babal káataj Absalone', ajawe' tu cha'aj u bin Amnón yéetel u láak u paalal ajaw tu yéetel. Absalone', u beetmaj ca'ach jun p'éel janal je'el bix le cu beeta'al u ti'al jun túul ajawe',

²⁸ba'ale', dzo'oquili' u ya'alic ti' u palitzilo'ob beya': P'il a wiche'ex ma'alob u ti'al a wilique'ex le quéen cáalchajac Amnón, le quéen in wa'al ti' te'ex ca quíimse'exe', quíimse'ex, ma' a ch'aique'ex sajaquil, tumen teen a'alic ti' te'ex. Bey túuno', líikic a wóole'ex, xiixib máacchajaque'ex.

²⁹Bey túuno', le palitzilo'obo', tu yu'ubajo'ob u t'aan Absalone', ca tu quíimsajo'ob Amnón. Tuláacal túun u paalalo'ob Ajawe', j líiko'ob u nat' u x tzimino'obe', ca j púudzo'ob.

³⁰Ca'aliquil táan u púudzulo'obe', j kuch u t'aanil ti' David dzo'oc u quíimsa'al tuláacal u paalalo'ob, ma' j p'áat cuxa'an mix jun túuli'.

³¹Ajaw túune', j líike', ca tu jataj u nook u ti'al u chíicultic yaj óole', ca j chilaj lu'um. Tuláacal xan u nuuquil le aj meyajo'ob yaan tu yicnalo', tu jatajo'ob xan u nooko'ob;

³²ba'ale', Jonadab u paal Simea u sucu'un Davide', j t'aanaje', ca tu ya'alaj: Ma' u tucultic a Tzicbe'enil wa dzo'oc u láaj quíimsa'al u paalal. Chéen Amnón j quíimsa'abi, tumen bey u tuculmajil Absalón líikbal le kiin ca tu pa'aj u x sujuyil x Tamar u yíidzin.

³³Let o'olal, ma' u tucultic a tzicbe'enil dzo'oc u láaj quíimsa'al u paalal. Chéen Amnón j quíimsa'abi.

³⁴Ca'aliquil táan u púudzul Absalone', le j xi'ipal canantic le caajo', tu líikesaj u yiche' ca tu yilaj jun p'éel nojoch múuch' máaco'ob cu yéemelo'ob tu jáal le pu'uco'. Le aj canano', j bin u ya'al ti' David yaan máaco'ob cu yéemel Horonaim.

³⁵Jonadabe' tu ya'alaj ti' ajaw: Táan u taal u paalal a Tzicbe'enil je'el bix tu tucultaj a palitzila'.

³⁶Ca'aliquil táan u dzo'ocol u t'aan ca j kuch u paalal ajawe', ca sen ka'am okolnajo'ob. Sen okolnaj xan ajaw yéetel u nuuquil u aj meyajo'ob.

³⁷Absalón xane', j púudze', ca j bin tu yicnal Talmay, u paal Amiud u ajaw Gesur, te'elo' j p'áat óox p'éel ja'abo'obi'. Davide', sáansamal ca'ach u yokoltic úuchic u quíimil Amnón u paal,

³⁹ba'ale', le ca j máan ti' u yajil u quíimil Amnone', tacchaj u yilic Absalón.