Read Yucateco 2 Samuel 14 Bible Online

2 Samuel 14 - Yucateco bible

2 Samuel 14

¹Joab u paal Sarviae', u yojel ajawe', táan u yanyamtic u yilic Absalón,

²le t o'olale', tu túuxtaj ch'a'abil Tecoa jun túul co'olel sen yaan u na'at. Ca tu ya'alaj ti': Beet bey okom a wóole', búuquint u nookil okom óolal; ma' widzic qui'iboc ja' ta wóokol, kabéet u yila'al beyech jun túul x co'olel dzo'oc u sen xáantal okom u yóol tu yo'olal jun túul quimene'.

³Cu dzo'ocole', xeen tu táan ajawe', ca a wa'al jach le ba'ax bíin in wa'al ti' teche'. Cu dzo'ocole', Joabe' tu ya'alaj ti' ba'ax unaj u ya'alic,

⁴le co'olel u taal Tecoao', j bin tu táan ajawe', ca j noclaj j lu'um bey u chíiculal tziiquile', ca tu ya'alaj ti': ¡U beet utz a Tzicbe'enil u yáantiquen!

⁵Ajawe' tu káat chi'itaj ti': ¿Ba'ax cu yúuchul ti' teech? Leti'e' tu núucaj: Tene', x quimen íichamen, in wíichame' j quíimi,

⁶u ca'a túul paalalo'ob u x palitzil a Tzicbe'enila', j ba'atelnajo'ob j káax; ba'ale' bey ma' j yanchaj máax jatzico'obo', jun túule' tu loobiltaj u láako' ca tu quíimsaj.

⁷Bejela'a' túune' in láaktzilo'obe' ma' tu yáantiqueno'ob, u káato'ob ca in kub ti'ob le máax tu quíimsaj u yíidzin u ti'al ca u suto'ob ti' u jeel le quíimilo', chéen ba'ale' beyo' cu tzelico'ob j bej le paal máax ti'alintic u ayikalil u taatao'. Beyo' bíin u tzelo'ob ti' teen máax áantiquen, bíin xan u p'ato'ob in wíicham x ma' ch'i'ibalil way yóokolcaabe'.

⁸Ajaw túune', tu núucaj ti' le co'olelo': Xeen ta wotoch, tene' bin in ca'aj in wa'al ca beeta'ac ti' teech utz.

⁹Le co'olelo' tu núucaj: In dzuulil wa yaan máax bíin cuchic le si'ipilo', dza'abac tin wóokol yéetel tu yóokol u láaktzililo'ob in taata, ba'ale' ma' tu yóokol a Tzicbe'enil yéetel u méektáani'.

¹⁰Ajawe' tu núucaj: Le máax bíin u ya'al u beetic ti' teech loobe', taas tin wicnal, ma' bíin u ca'a chi'ichnaccuntechi'.

¹¹Ba'ale' leti'e' tu ca'a a'alaj: ¡Quin káat óoltic ti' a Tzicbe'enil ca payalchi'inac ti' Ku, tu yo'olal le láaktzil taac u sutic u jeel le quíimilo', ma' u quíimsic u láak in wa'al! Ajawe', tu jach a'alaj: ¡Quin jalach t'antic ti' teech tu kaaba' Yuumtzil ma' bíin lúubuc j lu'um mix jun cúul u tzo'otzel u pool a waali'!

¹²Ba'ale' le co'olelo', xi'ic u bin u ya'alic: U beet utz a Tzicbe'enil u ya'alic chéen jun p'éel t'aan ti' a x palitzila'. Ajawe' tu ya'alaj: t'aanen.

¹³Le co'olel túuno' tu káat chi'itaj: ¿Ba'axten cu tucultic a Tzicbe'enil u beetic bey ti' u caajal Kuo'? Je'el bix dzo'oc u t'aan a tzicbe'enilo', cu chíicpajal yaan u si'ipil tumen ma' tu cha'ic u suut u paal u tojolch'intmajo'.

¹⁴Tu jaajile', tuláacalo'on bíin quíimico'on; beyo'on ja' cu wéequel j lu'um ma' tu páajtal u mo'olole'. Ba'ale' Kue', ma' tu lukesic u cuxtal mix máac, ba'ale' cu beetic ma' u náachtal ti' le máax tojolch'inta'ano'.

¹⁵Ba'ale', wa dzo'oc in taal in wa'al bey ti' a Tzicbe'enilo' in dzuulil, j taalen tumen tu beetaj in sajactal le máaco'obo'. Let o'olal a x palitzila', tu tucultaj u t'aan ta wéetel, ma' xan ca wóolt a beet ba'ax cu káatic ti' techi'.

¹⁶Wa a Tzicbe'enil cu táan óoltiquene', je'el u toquiquen ti' máax u káat u lukeso'on, teen yéetel in paal way tu lu'um Kue'.

¹⁷A x palitzila' cu pa'atic u jóomol u yóol yéetel ba'ax bíin a núuque', tumen a Tzicbe'enile', u yojel ba'ax utz yéetel ba'ax kaas bey je'el bix u aj túuchi' Kue'. ¡Ku Yuumtzil bíin p'áatac yéetel a Tzicbe'enil!

¹⁸Ajawe' tu núucaj ti' le co'olelo': Quin káat óoltic ti' teech ma' a muclic mix ba'al ti' le ba'ax bíin in káat ti' techa'. Le co'olelo', tu núucaj: t'aanac a Tzicbe'enil.

¹⁹Ajaw túune' tu káat chi'itaj ti': ¿Ma' wa Joab j oquesech ichil tuláacal le ba'ala'? Le co'olelo', tu núucaj: Quin jalach t'antic ti' a Tzicbe'enil, mina'an u láak ba'ax sen jaaj ti' ba'ax dzo'oc u ya'alic a Tzicbe'enil. Tu jaajile', Joab u j nojoch u aj ba'atelo'ob a Tzicbe'enile', leti' a'al teen ca taalaquen, leti' xan a'al ti' teen ba'ax unaj in wa'alic.

²⁰Ba'ale' tu beetaje', tumen táan u dzíiboltic ca kexpajac tuláacal ba'alo'ob. Ba'ale' a Tzicbe'enile', sen yaan u na'at, yaan u kaj óolalil jun túul u aj túuchi' Ku ti' tuláacal ba'ax cu yúuchul ti' le múuch' caajo'oba'.

²¹Tu yo'olal lelo', ajawe', tu ya'alaj ti' Joab: Ile dzo'oc in tucultic ba'ax unaj u yúuchul. Xeene', ca a beet u suut le j táanquelem Absalóno'.

²²Joab túune' j noclaj lu'um u ti'al u tziquic, ca tu qui' t'antaj ajaw beya': Bejela'e', dzo'oc in wilic quin xooc yéetel u yutzil a Tzicbe'enil, tumen dzo'oc a beetic ba'ax tu ya'alaj a palitzil ca beeta'ac.

²³Tu séeblaquile', j líik Joabe', ca j bin Gesur u ti'al u taas Absalón tu caajil Jerusalén.

²⁴Ba'ale', ajawe', tu ya'alaj ca xi'ic tu yotoch jun puli', ma' j bin tu yicnal; tu yo'olal lelo' Absalone', j bin tu yotoch, ma' tu yilaj ajawi'.

²⁵Ti' tuláacal Israele', mina'an ca'ach u láak máac sen qui'ichquelem je'el bix Absalone', cu sen qui' t'anta'al tu yo'olal lelo'. Líikbal tu pool tac tu yooque', láaj utz ca'ach yanil.

²⁶Le quéen u kos ca'ach u tzo'otzel u pool, suuc u kosic tu jóokbal ja'abe', cu p'isic ca'ach máanja'an ca'a p'éel kilos je'el bix le jalach p'iso'obo'.

²⁷Absalone', yaan ca'ach óox túul u j xibil paalal yéetel jun túul u x ch'upul paal sen qui'ichpam cu kaaba'intic x Tamar.

²⁸Ca'a p'éel ja'abo'ob j yanchaj Absalón Jerusalene', ma' j páatchaj u bin tu táan ajawi'

²⁹léet o'olale' Absalone', tu ya'alaj ti' Joab ca xi'ic u xíimbalt ajaw tu kaaba' leti'; ba'ale' Joabe' ma' tu yóoltaj bini'. Absalone' tu ca'a káat chi'itaj ti' Joab ca xi'ic, ba'ale' ma' tu yóoltaj tu ca'a téeni'.

³⁰Absalón túune' tu ya'alaj ti' u palitzilo'ob: Ile'ex, u káax Joabe' ti' yaan tu tzéel in ti'ale', u pakmaj cebadai'. ¡Xeene'ex a tóoque'ex! U palitzilo'ob Absalone', j bino'obe', ca tu tóocajo'ob u káax Joab,

³¹leti'e' j bin tu séeblaquil tu yotoch Absalone', ca tu káat chi'itaj ti': ¿Ba'axten j tóoca'ab in káax tumen a palitzilo'ob?

³²Absalone' tu núucaj: tin túuxtaj a'albil ti' teech ca taalaquech way u ti'al in túuxtech a wa'al ti' ajaw ma' unaj ca'ach u beetic in lukul Gesuri'; asab ma'alob ca'ach ca p'áataquen te'elo'. Tene', tac in wilic ajaw, wa yaan in si'ipil ti' wa ba'axe', u quíimsen.

³³Joab túune' bin u yil ajawe', ca tu tzicbaltaj ti' ba'ax cu ya'alic Absalón, ajawe' tu túuxtaj ch'a'abil. Le ca j kuch Absalón tu táan ajawe', j noclaj lu'um. Ajawe', tu kamaj Absalón yéetel jun p'éel dzu'udz.