Read Yucateco 2 Samuel 15 Bible Online

2 Samuel 15 - Yucateco bible

2 Samuel 15

¹Cu dzo'ocol u máan dze'edzec kiino'obe', tu manaj jun p'éel u bolanil ba'atel yéetel u tzíiminilo'ob, bey xan tu much'quintaj cincuenta aj ba'atelo'ob u ti'al canantic.

²Cu líikil ca'ach piknal u sáastale', cu wa'atal ca'ach tu joolbejil le caajo', cu t'aanic tuláacal máax cu taal j tac pool tu yicnal ajaw tu yo'olal wa ba'ax ba'atelil u ti'al u káatic ti' ba'ax caajil u taal. Wa le máac cu ya'alic ti' u taal ti' wa ba'ax u ch'i'ibalo'ob Israele',

³Absalone', cu ya'alic ca'ach ti': Tu jaajile', le ba'ax ca káatico', no'oja'an yéetel ka'anáan u beeta'al, ba'ale' tu yicnal ajawe', mina'an máax áantiquech.

⁴Cu dzo'ocole' cu ya'alic ca'achi: ¡Quexi' wa teen u aj p'is óol le lu'umo'oba', beyo' le quéen taalac u yilen tuláacal máaxo'ob yaan ba'atel ti'obe', je'el in beetic ba'ax no'oja'an tu yéetelo'obe'!

⁵Cu dzo'ocole', wa cu náadzal wa máax te'escuntique', Absalone', cu tich'ic u kab ti', cu méekique', cu dzu'udzic.

⁶Bey u beetic ca'ach yéetel tuláacal j israelita cu bin u yila'a ajaw u ti'al j tacpool, beyo' cu lúubul utzil ca'ach tu pucsi'ikal tuláacal le j israelitaobo'.

⁷Cu dzo'ocol u máan can p'éel ja'abo'obe', Absalone', tu ya'alaj ti' ajaw: Quíin káat óoltic ti' a Tzicbe'enil ca u cha'a in bin Hebrón u ti'al in dzo'ocbes jun p'éel séebchi' tin beetaj ti' Yuumtzil.

⁸Le ca'ach ti' caajnáal u palitzil a Tzicbe'enil Gesur tu lu'umil Siriae', tin séeb chi'itaj in kultic Yuumtzil wa cu yóoltic ca suunaquen Jerusalén tu ca'a téen.

⁹Ajawe' tu núucaj: xeen yéetel jéedzel. Absalón túune', j bin Hebrón.

¹⁰Ba'ale' tu túuxtaj dze'edzec aj bisaj t'aano'ob u ti'al a'alic ti' tuláacal u ch'i'ibalo'ob Israel le quéen u'uyac u juum le jóopsaj paaxo'obe', ca u ka'ayto'ob dzo'oc u dza'abal Absalón ca ajawnac Hebrón

¹¹Tu páay óoltaj xan docientos u cajnáalilo'ob Jerusalene', ca j bino'ob tu paach yéetel tuláacal u yóolo'ob quex ma' u yojelo'ob ca'ach le ba'ax cu yúuchulo'.

¹²Absalón xane' tu túuchi'itaj t'anbil jun túul u aj tzol xiquin David cu kaaba'intic Ahitofel cajacbal ca'ach Gilo u caajal, u ti'al láakintic ca'aliquil táan u kubic quíimsbil siibalo'ob. Bey túuno', le ba'ax cu beetic Absalono', xi'ic u bin u ch'a'ic muuk, jo'op' u bin ya'abtal máaxo'ob tzaypachtic.

¹³Jun túul aj bisaj t'aane', j bin u ya'al ti' David táan u tzaypachta'al Absalón tumen le j israelitaobo'.

¹⁴David túune' tu ya'alaj ti' tuláacal u nuuquil u aj meyajo'ob yano'ob tu yicnal tu caajil Jerusalén: ¡Co'one'ex púudzul bejela'e', tumen wa ma'e', ma' bíin páatac c áalcab ti' Absaloni'! ¡Co'one'ex, séebcunte'ex, ma' xan ca u nactáanto'on u ti'al u beetic to'on loob yéetel u quíimsic yéetel máascab u caajnáalilo'ob le caaja'!

¹⁵Leti'obe' tu núucajo'ob ti' ajaw: To'one', bíin c beet le ba'ax bíin u ya'al a Tzicbe'enile'.

¹⁶Bey túuno' ajawe', jóok láakinta'an tumen tuláacal u caajnáalilo'ob le jalach najo', chéen diez u x keecho'ob tu p'ataj canatic le jalach najo'.

¹⁷Cu dzo'ocol u jóokol ajaw yéetel máaxo'ob láakintique', j wa'alajo'ob tu dzooc u najil le caajo'.

¹⁸Tu tzéel yaan ca'ach tuláacal u nuuquil u aj meyajo'ob ca'aliquil tuláacal le j cereteob yéetel le j peleteob u aj ba'atelilo'ob le jalach naj yéetel le seiscientos geteob láakint líikbal Gato', cu bino'ob ca'ach tu táan.

¹⁹Ti' le súutuco', ajawe', tu ya'alaj ti' Itai le j gatilo': ¿Ba'axten j taalech xan t éetel? Asab ma'alob ca suunaquech j p'áatal yéetel túumben ajaw, teche', jun túul j táanxel lu'umilech tojolch'intanech ta lu'umil.

²⁰Jo'oljeac j kuchech, ¿Bix bíin in káat ti' teech ca taalaquech t éetel wa mix teen in wojel tu'ux quin bini'? Asab ma'alob ca suunaquech u ti'al ca a bis xan a wéet caajalo'ob. ¡Yuumtzil bíin u qui' t'antech yéetel ca u láakintech mantadz!

²¹Itaie', tu núucaj ti' ajaw: Quin jalach t'antic tu kaaba' Yuumtzil tu yo'olal a Tzicbe'enil, le tu'ux bíin yanac a Tzicbe'enil u ti'al cuxtal wa u ti'al quíimile', ti' xan bíin yanac le a palitzila'a.

²²Davide' tu núucaj: Co'oten túun t éetel. Beyo' Itaie', j bin túun tu yéetel David pa'ate', yéetel le aj ba'atelo'ob láakintma'ilo'.

²³tuláacal Israel ka'am okolnajic. Tuláacalo'ob j máano'ob tu chan t'o'ol ja'il Cedrón; cu dzo'ocole', j máan ajaw, tuláacal le máaco'obo', j bino'ob táanil ti' leti' tu bejil x tocoy lu'um.

²⁴Tu yéetelo'ob xan cu bin Sadoc yéetel tuláacal le j levitaob bisic u ba'asche'il u nup t'aan Kuo', tu p'atajo'ob tu yicnal Abiatar tac quéen dzo'ococ u láaj ch'aacat le máaco'ob jóoko'ob te j caajo'.

²⁵Ba'ale' ajawe', tu ya'alaj ti' Sadoc: Sut u ba'asche' Ku te j caajo', wa cu beetic ti' teen utz Yuumtzile', bíin u beet in suut u ti'al ca in wila'a tu'ux cúuchil dza'an.

²⁶Ba'ale' wa cu ya'alic ma' utz in lúubul tu táane'; u beet tin wéetel le ba'ax ma'alob cu tucultique'.

²⁷Tu ya'alaj xan ajaw ti' aj kiin Sadoc: Teech yéetel Abiatare', suunaque'ex yéetel jéedzel pa'ate' yéetel a ca'a túul a paale'ex te j caajo'. Teech yéetel Ahimaas a paal, bey xan Abiatar yéetel Jonatán u paal.

²⁸Ca'aliquil tene', bíin p'áataquen tu táax lu'umilo'ob x tocoy lu'um u ti'al in pa'at u kuchul a péectzile'ex ti' teen.

²⁹Sadoc yéetel Abiatare', tu sutajo'ob u ba'asche' Ku Jerusalene', ca j p'áato'obi'.

³⁰Davide', j na'ac tu ca'anal lu'umil le olivo'obo'; táan ca'ach u bin x ma' xanabil yéetel táan u yokol ca'aliquil u dzaamaj u pixjo'ol u ti'al u chíiculal yaj óolal. Tuláacal le máaxo'ob láakintmajilo', u pixmajo'ob xan u jo'olo'ob yéetel táan u yokolo'ob ca'aliquil táan u na'acalo'ob.

³¹Le ca j tzicbalta'ab ti' David, Ahitofel ti' yaan tu tzéel Absalone', Davide', j káat óolnaj ti' Yuumtzil ca u beet u jóokol kaasil ti' ba'ax cu tucultic Ahitofel.

³²Le ca j kuch David tu jo'ol le pu'uc tu'ux cu kulta'al Kuo', jóok ch'a'abil u beel tumen Husai, ti' sijnal tu ch'i'ibalo'ob j arquitaob, u jatmaj u nook yéetel u pixmaj u pool.

³³Davide' tu ya'alaj ti': Wa ca taal tin wéetele', ca aalcuntic in cuuch;

³⁴ba'ale' wa ca suut Jerusalén u ti'al a wa'al ti' Absalón: Tzicbe'enil, le a palitzila', ti' yaan ta meeyjul je'el bix úuchic u yantal tu meeyjul a taatae', bíin a wáanten u ti'al a tzelic tu pool Ahitofel le ba'ax cu tucultico',

³⁵te'elo' bíin u yáantecho'ob aj kiino'ob Sadoc yéetel Abiatar. Teche', a'al ti'ob ba'ax bíin a wu'uy u ya'ala'al jalach naj.

³⁶U paalal Ahimaas yéetel Jonatán ti' yano'ob xaan te'elo', túuxto'ob u ya'alo'ob ti' teen tuláacal ba'ax bíin a wojéelte'ex.

³⁷Husai u yéet óol Davide', j kuch Jerusalén jach tu súutuquil táan u yocol Absalón te j caajo'.