Read Yucateco 2 Samuel 16 Bible Online

2 Samuel 16 - Yucateco bible

2 Samuel 16

¹Chéen p'elac úuchic u ch'actic David u jo'ol le pu'uco', jóok ch'a'abil beel tumen Siba u palitzil Mefiboset. Táan ca'ach u bisic ca'a túul burro'ob u cuchmajo'ob docientos waajo'ob, cien u piimpiim waajil u kulinil uvaob, cien u yicho'ob u paakalilo'ob le kiinaco' yéetel jun chúuj u kéewelil u kab uva.

²Ajawe' tu káat chi'itaj ti': ¿Ba'ax o'olal ca taasic le ba'ala'? Sibae', tu núucaj: Le burro'obo', u ti'al nat'bil tumen u láaktzilo'ob ajaw; le waajo'ob yéetel u yich le che'obo', u ti'al u jaant le aj ba'atelo'obo', u kaab le uvaob u ti'al u yuk le máaxo'ob bíin ca'ananchajco'ob te x tocoy lu'umo'.

³Ajawe' tu káat chi'itaj: ¿tu'ux yaan u yáabil a dzuulil? Sibae', tu núucaj: J p'áat Jerusalén, tumen táan u tucultic bíin su'utuc ti' tumen le j israelitaob u ajawil u noolo'.

⁴Ajawe', tu núucaj: Ma'alob, bejela'e', a ti'al tuláacal le ba'ax u ti'al ca'ach Mefiboseto'. Sibae', j noclaj lu'ume', ca tu ya'alaj: ¡Quexi' ca xoocnaquen mantadz yéetel u yutzil a Tzicbe'enile'!

⁵Le ca j kuch ajaw David Bahurime', jóok jun túul j xiib ti' u láaktzilo'ob Saúl. U paal ca'ach Gera, cu kaaba'intic Simei, táan ca'ach u bin u loolob t'antic

⁶yéetel táan ca'ach ch'i'inch'inic David yéetel u nuuquil u aj meyajo'ob; quex tumen táan u cananta'al ajaw tumen le máaco'ob yéetel u aj canano'obe'.

⁷Simeie', táan ca'ach u bin u poch'ic beya': ¡Tzelabáa waye', j loolob j quíimsaj wíinic!

⁸¡Yuumtzile', dzo'oc u jadziquech tu yo'olal le loobo'ob ta beetaj ti' u láaktzilo'ob Saúl, úuchic a beetic a ajawil tu jalach káanche'! ¡Bejela'e', Yuumtzile', dzo'oc u kubic le ajawil ti' Absalón a paal, bey túuno' táan a mukyajtic le loobo'ob a beetmajo', tumen teche', chéen jun túulech quíimsaj wíinic!

⁹Abisai u paal Sarvia túune', tu ya'alaj ti' ajaw: ¿Ba'ax teen bíin po'och'oc a Tzicbe'enil tumen jun túul j quimen peek? ¡Bin in ca'aj in cúul kupt u caal!

¹⁰Ba'ale', ajawe' tu núucaj: Te'ex u paalale'ex x Sarviae', mix ba'al yaan a wila'ex yéetel lelo'. Wa táan u poch'iquene', míin Yuumtzil j a'al ti' ca u beete. Wa beyo', ¿Máax bíin p'is óoltic yéetel ba'ax cu beetic?

¹¹Cu dzo'ocole', tu t'anaj Abisai yéetel tuláacal u nuuquil u aj meyajo'obe', ca tu ya'alaj ti'ob: Wa tac in paal u káat u quiimsene', ¡ma' wa túun bíin u beet bey jun túul u máaquil u ch'i'ibalo'ob Benjamini! ¡Cha'ex u poch'iquen, Yuumtzil wal j a'al tie'!

¹²Ma' xan wa le quéen u yila'a' Yuumtzil in muukyaje', bíin u túuxt ti' teen utzil t'aano'ob ma' le kaakas t'aano'ob quin wu'uyic bejela'a'.

¹³David yéetel u aj ba'atelo'obe', j bino'ob, Simeie', j bin tu tojilo'ob ca'aliquil táan u pooch'il, táan xan u ch'iin yéetel tuunich bey xan táan u pulic u ma'ay lu'um.

¹⁴Le ca j kuch ajaw yéetel le máaxo'ob láakintmail tu yáalcab ja'il Jordano', je'elo'obi', tumen sen ca'ana'ano'ob ca'achi.

¹⁵Ca'aliquile', Absalone', j ooc Jerusalén láakinta'an tumen tuláacal le j israelitaob yéetel tumen Ahitofel.

¹⁶Husai Arquita u yéet óol Davide', j bin u kam Absalón ca'aliquil táan u yaawtic: ¡Xi'ic utzil ti' ajaw, xi'ic utzil ti' ajaw!

¹⁷Absalón túune' tu káat chi'itaj ti': ¿Bey a we'esic a kub óolal ti' a wéet óolo'? ¿Ba'axten ma' j binech tu paachi'?

¹⁸Husaie', tu núucaj: Ma' tu páajtal in beetic beyo', tumen tene' unaj in p'áatal yéetel máax bíin yéeya'ac tumen Yuumtzil yéetel tumen tuláacal le j israelitaobo'.

¹⁹Yéetel u láak ba'ale', wa unaj in meyajtic wa máaxe', u paal in wéet óol bíin in meyajte. Bey túuno', tene' bíin in meyajt a Tzicbe'enil je'el bix úuchic in meyajtic a taatae'.

²⁰Cu dzo'ocole' Absalone', tu káat chi'itaj ti' Ahitofel: ¿Ba'ax ca nu'uctique'ex ca c beetej?

²¹Ahitofele', tu ya'alaj ti' Absalón: Chilen yéetel u x keecho'ob a taata, le máaxo'ob tu p'ataj canantic le jalach najo'. Beyo' tuláacal Israel bíin u yila'a dzo'oc u lúubul ti' teech kaasil a taata, bíin yanac u yóolo'ob tuláacal le máaxo'ob yaan ta wéetelo'.

²²J dzaab jun p'éel chuybil naj u ti'al Absalón tu yóokol le najo', ca j chilaj Absalón yéetel tuláacal u x keecho'ob u taata tu táan yich tuláacal le j israelitaobo';

²³tumen ti' le kiino'obo', u yúuchul káat chi' ti' Ahitofele', bey je'el bix u yúuchul káat chi' ti' u t'aan Kue'. Ahitofele', jach nojoch ba'al tu táan David yéetel tu táan Absalón.