Read Yucateco 2 Samuel 18 Bible Online

2 Samuel 18 - Yucateco bible

2 Samuel 18

¹Davide' tu láaj t'aanaj u kaaba'ob u aj ba'atelo'obe', ca tu dzaj u nuuquilo'ob tu táan u múuch'ulo'ob mil aj ba'atelo'ob, bey xan tu táan u múuch'ulo'ob cien aj ba'atelo'ob.

²Cu dzo'ocole', tu jóokesaj óox jaatz ti'e', ca tu túuxtaj jun jaatz tu paach Joabi', jun jaatz tu paach Abisai u yaal x Sarvia u sucu'un Joab, yéetel jun jaatz tu paach Itai le j gatilo'. Cu dzo'ocole', tu ya'alaj ti' tuláacal le aj ba'atelo'obo': Tene' bíin xi'iquen ta wéetele'ex te j ba'atelo'.

³Ba'ale' leti'obe' tu núucajo'ob: Ma' beyi', ma' bíin u beet bey a Tzicbe'enilo', tumen le aj p'eeco', ma' bíin u yaj óolt ca púudzuc wa ca quíimic táancoch ti' to'oni', ba'ale' teche' asab co'ojech ti' diez mil ti' to'on. Let o'olal jach ma'alob ca p'áatac a Tzicbe'enil ichil le caaj u ti'al ca u túuxt to'on u láak u muukil aj ba'atelo'ob.

⁴Ajawe' tu núucaj ti'ob: Bíin in beet le ba'ax ca tucultique'ex ma'alobe', ca'aliquile', táan u dzáicubáa jun tzéelil ti' u jool bejil le caaj u ti'al u jóokol u aj ba'atelo'ob, tu múuch'ilo'ob mil yéetel u múuch'ilo'ob cien aj ba'atelo'ob.

⁵Ajawe', tu ya'alaj xan ti' Joab, ti' Abisai yéetel ti' Itai tu kaaba' leti'e', ca ch'a'abac óotzilil ti' j táanquelem Absalón, tuláacal le aj ba'atelo'ob j u'uy ba'ax tu ya'alaj ajaw ti' u nuuquilo'ob u aj ba'atelo'ob tu yo'olal Absalón.

⁶Bey túuno', u aj ba'atelo'ob Davide', j bino'ob u ba'atelto'ob u aj ba'atelo'ob Israel. Le ba'atelo', ti' j úuch tu káaxilo'ob Efraine',

⁷u aj ba'atelilo'ob Israele', j pa'ab u muuko'ob tumen u aj ba'atelo'ob David. Nojoch quíimsaj yanchaj ti' le kiino', j quíimsa'ab veinte mil j xiibo'ob.

⁸Le ba'atelo', j ki'itpaj ti' tuláacal le lu'umo', tumen ti' le kiino', asab ya'ab j quíimsa'abo'ob tumen le káax ma' bey le j quíimsa'abo'ob tumen le máascabo'.

⁹Absalón u nat'maj ca'ach u tzíimine', tu téec ilaj ti' yaan actáan ti'e', u aj ba'atelo'ob David. U tziimin túune', j ooc tu yáanal jun cúul béeque', ca j t'i'il u pool tu kab jun cúul béec, ca j p'áat ch'uytal, tumen le tzíimino' j bini.

¹⁰Yanchaj máax ilic, ca j bin a'albil ti' Joab: Dzo'oc in wilic leechel Absalón tu kab jun cúul béec.

¹¹Joabe' tu núucaj: Wa ta wilaje', ¿ba'axten ma' ta quíimsaj jun puli'i? Tene' yéetel tuláacal qui'imac óol bíin in dzáa ti' teech ca'ach diez u taakinilo'ob plata yéetel jun p'éel kaxnak.

¹²Ba'ale' le máaco' tu núucaj: Quex ca wa'al a dzáic ti' teen mil taakino'ob plata u ca'ajo'obe', ma' bíin in beet loob ti' u paal ajawi', tumen to'one', t u'uyaj ba'ax tu ya'alaj ajaw ti' teech, ti' Abisai yéetel ti' Itai, tu ya'alaj ca ch'a'abac óotzilil ti' j táanquelem Absalón.

¹³Yéetele', wa ca kuchuquen in beet bey ti'o', mix jun p'éel bo'ol bíin in kame, tumen mix ba'al cu páajtal u ba'alal ti' ajaw, teche' ma' bíin a beet mix ba'al u ti'al ca'ach a wáantiqueni'.

¹⁴Joabe' tu núucaj ti': Chéen cunel in t'aan ta wéetel; tu ch'a'a óox p'éel julubo'obe', ca tu ch'icaj tu pucsi'ikal Absalón, tumen láili' cuxa'an ca'ach chuyucbalil tu kab le béeco'.

¹⁵Cu dzo'oco'ole' bak pachta'ab tumen diez u palitzilo'ob Joabe', ca tu dzooc quíimsajo'ob.

¹⁶Cu dzo'ocole' Joabe' tu beetaj u jóopsa'al le paaxo'obo', ca jáaw u ch'a'apachta'al Israel, tumen Joabe' tu beetaj u jáawal.

¹⁷J ch'a'ab túun u wíinclil Absalone', ca j dzaab ichil jun p'éel jool yaan te j káaxo', cu dzo'ocole' tu niccuntajo'ob sen ya'ab tuunicho'ob tu yóokol. Cu dzo'ocole', tuláacal le j israelitaobo', j púudzo'obe', ca j binla'ajo'ob tu yotocho'ob.

¹⁸Tu cuxa'anil ca'ach Absalone', tu túuxtaj beetbil jun p'éel nojoch multuun tu táax lu'umil Ajaw, ca tu dzaj ca'ach u kaaba' ti', tumen mina'an ca'ach mix jun túul u paal u ti'al ma' u tu'ubsa'al u kaaba'. Tac bejela'a' kaj óola'an beya': u multuun Absalón.

¹⁹Cu dzo'ocole' Ahimaas u paal Sadoque', tu ya'alaj ti' Joab: Quin káat óoltic ti' teech ca a cha'a in bin in dzáa u péectzilil ti' ajaw dzo'oc u be'etal p'is óol tumen Yuumtzil u ti'al u to'ocol tu kab u aj p'eeco'ob.

²⁰Ba'ale' Joabe' tu núucaj ti': Bejela'e' ma' teech unaj a bisic le péectzila'a. Tu láak kiine', je'el a bisique', ba'ale' bejela'e' ma' tumen j quíim u paal ajaw.

²¹Ba'ale' Joabe' tu ya'alaj ti' jun túul aj ba'atel j etiope: Teche' xeen, ca a dzáa u péectzilil ti' ajaw ba'ax ta wilaj. Le j etiopeo' tu chíinpooltaj Joabe', ca j bin áalcabil.

²²Ahimaase' tu ca a'alaj ti' Joab: cha'a xan in bin áalcabil tu paach le j etiopeo'. Ba'ale' Joabe' tu núucaj: ¿In paal ba'axten a káat bin, wa ma' bíin a kam mix jun p'éel bo'ol tu yo'olal a bisaj péectzili'?

²³Ahimaase' tu núucaj: Quex beyo' bíin xi'iquen áalcabil. Joabe' tu núucaj: Áalcabnen túun. Ahimaas túune' j bin u yáalcab ti' le táax lu'umo', ca j máan táanil ti' le j etiopeo'.

²⁴Davide' culucbal ca'ach chúumuc ti' ca'a p'éel joolo'ob le caajo', le aj canano' dzo'oc ca'ach u na'acal tu yóokol u jo'olnajil le tuulumo'. Le ca tu líiksaj u yich le aj canano', tu yilaj jun túul máac táan u taal u yáalcab tu juunal,

²⁵ca tu ka'am a'alaj ti' ajaw. Le ajawe' tu ka'am a'alaj: Wa tu juunal cu taale', ma'alob péectzilo'ob cu taasic. Ca'aliquil táan u náadzal le máaco',

²⁶le aj canano' tu yilaj u láak máac cu yáalcab, ca tu yaawtaj ti' u aj cananil le jool bejo': ¡Táan u taal áalcabil u láak jun túul máac! Ajawe' tu núucaj: láili' ma'alob péectzilo'ob cu taasique'.

²⁷Le aj canano' tu ca'a a'alaj: tu yóolal bix u yáalcabe', in tucultique', Ahimaas u paal Sadoc. Ajawe' tu ya'alaj: leti'e' utzul máac in tucultique', ma'alob péectzilo'ob cu taasic.

²⁸Ahimaase', j náadze', ca j noclaj lu'um tu táan ajaw, ca tu te'escuntaj ca tu ya'alaj ti': Qui'it'antbil Yuumtzil u Ku a Tzicbe'enil, tumen dzo'oc u tzelic ichilo'on máaxo'ob j líik u yóolo'ob tu yóokol a Tzicbe'enil.

²⁹Ajawe' tu núucaj: ¿Utz wa u yanil j táanquelem Absalón? Ahimaase' tu núucaj: Tene' tin wilaj jun p'éel x wo'oquin ti' le súutuco' tu túuxtajen Joab, u palitzil a Tzicbe'enil, ba'ale' ma' tin wojéeltaj ba'ax cu yúuchuli'.

³⁰Ajaw túune' tu ya'alaj ti': dzaabaj jun tzéelile', ca p'áataquechi'. Ahimaase' tu beetaj beyo.

³¹Ti' le súutuco', j kuch le j etiopeo', ca tu ya'alaj: U kam le ma'alob péectzilo'ob a Tzicbe'enila': Bejela'e', Yuumtzile' dzo'oc u beetic ba'ax toj tu yéetel a Tzicbe'enil, dzo'oc u toquic tu kab máaxo'ob j líiko'ob tu yóokol a Tzibe'enil.

³²Ajawe' tu káat chi'itaj ti' le j etiopeo': Cux túun j táanquelem Absalón, ¿utz wa yanil? Le j etiopeo', tu núucaj: Quexi' wa tuláacal u aj p'eeco'ob a Tzicbe'enil cu líikil u yóolo'ob tu yóokol a Tzicbe'enil u ti'al u beetico'ob loob ti'e', ca quíimco'ob je'el bix le j xi'ipalo'.

³³Ajawe', j yaachaj tu yóol, j na'ac tu'ux cu wenel yaan tu yóokol le jool bejo', ca j léec u yokol. Ca'aliquil táan u xíimbale', táan ca'ach u ya'alic: ¡Absalón, in paal! ¡Absalón in paal! ¡Quexi'i ca quíimiquen ca'ach ta wo'olale'! ¡In paal, Absalón, in paal!