Read Yucateco 2 Samuel 20 Bible Online

2 Samuel 20 - Yucateco bible

2 Samuel 20

¹Jun túul u j loolob wíiniquil u ch'i'ibalo'ob Benjamín cu kaaba'intic Seba u paal Bicrie', ti' yaan ca'ach Gilgale'. Sebae', tu líikesaj u yóol le caaj u ti'al u ch'a'ob u nu'ucul u ba'atelo'ob, táan u ya'alic: ¡To'one', mix ba'al c náajaltic yanilo'on tu yéetel David u paal Isaí! ¡J Israelitaex suunene'ex ta wotoche'ex!

²Tuláacal Israele', tu xúunp'ajtajo'ob David u ti'al u bino'ob tu paach Seba u paal Bicri. Ba'ale' u j caajnáalilo'ob Judá líikbal Jordán tac Jerusalene', ma' tu kéex óoltajo'ob u ajawo'obi'.

³Le ca j kuch David tu jalach naj yaan Jerusaleno', tu ch'a'aj le diez x keecho'ob u p'atmaj ca'ach canatic le jalach najo' ca tu kalajo'ob ti' jun p'éel naj ch'úuctbilo'ob. Tu canaantajo'ob te'elo'. Ba'ale' ma' j suunaj u x kechinto'obi'. Leti'obe' caajlajo'ob kala'ano'ob beyo'ob x quimen íichamo'ob tac tu kiinil u quíimilo'ob.

⁴Cu dzo'ocole', ajawe' tu ya'alaj ti' Amasa: T'aan le j xiibo'ob u cajnáalilo'ob Judá, co'oten tin táan tu yéetelo'ob ichil óox p'éel kiin.

⁵Amasae' j bin u much'quíinto'ob, ba'ale' ma' tu much'quintajo'ob ichil le óox p'éel kiin je'el bix j a'ala'ab ti'o'.

⁶David túune' tu ya'alaj ti' Abisai: Sebae', asab nojoch loob bíin u beet ti' to'on, ti' le tu beetaj Absalono'. Xeen tu táan in aj ba'atelo'obe' ca a ch'a'apachte, ma' xan ca u nactáant wa jay p'éel tuulumil caajo'ob u ti'al ca púudzuc ti' to'oni'.

⁷U aj ba'atelo'ob Joab, bey xan le j cereteob yéetel le j peleteob u aj canano'ob le jalach naj yéetel u asab ma'alobil le aj ba'atelo'obo', jóoko'ob Jerusalén tu paach Abisai u ch'a'apachto'ob Seba.

⁸Le ca j kucho'ob naadz ti' le nojoch tuunich yaan Gabaono', jóok Amasa nuptáantico'ob. Joabe', u dzaamaj ca'ach u búuquil u ba'atel, u pedzmaj yéetel u kaxnak, tu tzéele', u dzamaj jun p'éel máascab tu piix cu páajtal u jóokesic chéen iquil u jíiltic caabal.

⁹Joabe', ca'aliquil táan u machic j Amasa tu me'ex yéetel u x no'oj kab u ti'al u dzu'udzique', tu káat chi'itaj ti': ¿In láak utz yanilech?

¹⁰Amasae', ma' tu yilaj le máascab u machmaj Joabo'. Tu séeblaquile', Joabe' tu póot lomaj Amasa tu nak, ca láaj chojkaj u jobnel j lu'um. Quíimi, ma' yanchaj u dzooc quíimsa'ali'. Cu dzo'ocole' Joab yéetel u yíidzin Abisaie', áalcabnajo'ob u ch'a'apachto'ob Seba, u paal Bicri.

¹¹Jun túul u aj ba'atelo'ob túun Joabe', j wa'alaj tu tzéel u wíinclil Amasae' ca tu ya'alaj: ¡Le máax yaan tu tzéel Joab yéetel Davide' xi'ic tu paach Joab!

¹²Ba'ale' Amasae', xi'ic u bin u baklicubáa ich u ki'ikel tu chúumuc le bejo'; le ca tu yilaj le aj ba'atel tuláacal le máaco'ob cu wa'atalo', tu dzaj Amasa ti' jun tzéel ti' le bejo' ca tu pixaj yéetel jun p'éel x suyem nook, tumen tu yilaj tuláacal máaxo'ob cu kuchulo'ob tu yicnalo', cu p'áatalo'ob j wa'atal tu yicnal.

¹³Cu dzo'ocol u dzáic tu jáal le bejo', j ch'aacatnaj tuláacal le máaxo'ob cu bino'ob tu paach Joab u ch'a'apachto'ob Sebao'.

¹⁴Sebae', j máan ichil tuláacal u ch'i'ibalo'ob Israel tac u kuchbal Abel-bet-maca, tuláacal u ch'i'ibalo'ob Bicri j much'lajo'ob tu yéetele', ca j ooco'ob tu paach ichil le caajo'.

¹⁵Le ca j kuch u aj ba'atelo'ob Joab Abel-bet-macae', tu beetajo'ob jun p'éel níixil tu paach le caaj tu yóokol le tuulumo', u ti'al u ba'ateltico'ob le caajo', cu dzo'ocole', tu láaj much'ajuba'obe', ca tu yóoltajo'ob u jeno'ob le tuulumo'.

¹⁶tu séeblaquile', jun túul co'olel sen yaan u na'ate', j awatnaj tu yóokol u tuulumil le caajo', ca tu ya'alaj ti'ob: ¡Ch'e'en xiquintene'ex! ¡beete'ex utz a ch'e'en xiquintiquene'ex! ¡A'ale'ex ti' Joab ca náadzac tumen tac in t'aan tu yéetel!

¹⁷Le ca tu nadzajubáa Joabe', le co'olelo' tu káat chi'itaj ti': ¿Teech Joab? Leti'e' tu núucaj: Teen Joab. Leti'e' tu ya'alaj: Ch'e'en xiquint u t'aan a x palitzila'. Leti'e' tu núucaj: Quin ch'e'en xiquintiquech.

¹⁸Leti'e' jo'op' u ya'alic: Ca'ach úuche' cu ya'alal: Wa yaan ma'ax kabéet u yóojeltic wa ba'axe', u káat chi'it tu caajil Abel. Bey ca'ach u yutzquinta'al ca'ach le ba'alo'.

¹⁹C caajale', jun p'éel asab jejedzqui chuca'an xan u yóol ti' u chuucáan u caajilo'ob Israel, Leti', u asab nojochil ti' u caajilo'ob Israel, ba'ale' teche' taac a jenic. ¿Ba'axten taac a pa'ic le ba'al u ti'al Yuumtzilo'?

²⁰Joabe' tu núucaj: ¡Lelo' mix u tuculta'al! Mina'an tin wóol in pa'ic mix in p'atic x lab caajil.

²¹Ma' taac in jenic le caaja', ba'ax cu yúuchule', jun túul j xiib ti' u káaxilo'ob Efraine', dzo'oc u líikil u ba'atelt ajaw David. kube'ex ti' teen chéen leti'e', ca in tzelimbáa tu paach le caaja'. Le co'olelo' tu núucaj ti' Joab: Way tu yóokol le tuulum bíin c pul ti' teech u pool.

²²Tu séeblaquile', leti'e' bíin u yoques tu pool u caajnáalilo'ob le caajo', ca j cúul kupta'ab u pool Sebae', ca j pu'ul ti' Joab. Joab túune' tu ya'alaj ca jóopsa'ac u paaxil u lukulo'ob te j caajo', ca j náachchajo'ob ti', tu jujun túulilo'obe', suunajo'ob tu yotocho'ob, ca'aliquil Joabe', suunaj Jerusalén u ti'al j t'aan yéetel ajaw.

²³Joabe', j p'áat tu táan tuláacal u aj ba'atelo'ob David, Benaía u paal Joiadae', tu táan aj canano'ob cereteob yéetel peleteob.

²⁴Adorame', leti' ca'ach ilic u beeta'al meyaj x ma' bo'olil, Josafat u paal Aliude', u aj dzíib ajaw.

²⁵Sevae', leti' ca'ach dzíibtic ba'axo'ob cu yúuchul, Sadoc yéetel Abiatare', aj kiino'ob.

²⁶Ira u caajnáalil Jaire', u aj kiin xan David ca'achi.