Read Yucateco 2 Samuel 22 Bible Online

2 Samuel 22 - Yucateco bible

2 Samuel 22

¹Le kiinac j to'oc David tumen Yuumtzil u ti'al ma' u lúubul tu kab Saúl yéetel tu kab tuláacal u aj p'eeco'obe', tu kayaj le kaaya'.

²ca tu ya'alaj beya': Yuumtzil teech in aj canan, teech in aj ta'acbesaj, teech jáalkabtiquen,

³teech in Junab Ku, teech le nojoh tuunich balmaileno', teech in chimal, teech le páajtalil toquiqueno', teech in asab ca'anal ta'acbesajbail, teech in aj tocsajil. ¡ta tocajen ti' in loobilta'al!

⁴Teche' Yuumtzil, ca najmatic a qui'iqui' t'anta'al: chéen p'el in t'aaniqueche', ca toquiquen tu kab in aj p'eeco'ob.

⁵Le Quíimilo', tu cuclajen; tin ch'a'aj sajaquil tu táan u nucuch cuclil le ja' cu quíimsajo'.

⁶Le quíimilo' tu chuchuch kaxajen; ¡j lúuben ichil u léechilo'ob quíimil!

⁷Ichil in yaj óolale', káat óolnajen ti' Yuumtzil, tin káataj u yáantaj, leti'e' tu yu'ubajen ichil u kulnaj; ¡in awat t'aano'obe' j kuch u yu'ube!

⁸Yanchaj túun jun p'éel nojoch quíilbal lu'um: Quíilbanaj tuláacal u chuunpakilo'ob ca'an; j tíita'abo'ob tumen u p'u'ujulil Yuumtzil.

⁹Jóok buudz tu ni', jóok u káakil xu'ulbesaj tu chi'; ¡Cu pulic xan t'aba'an chúuco'ob yéetel u chi'!

¹⁰tu je'aj u káasabil le ca'ano', ca j éemi. ¡Tu yáanal u yooco'obe', yaan ca'ach nucuch múuyalo'ob!

¹¹Tu nat'aj jun túul aj cuxa'an xiknale', ca j bini; cu yila'al ca'ach tu yóokol u yustaj iik.

¹²Tu ch'a'aj le sen éekjoch'e'enil bakpachtmail bey chuybil naje' bey xan le nucuch múuyalo'ob chuuptaco'ob yéetel ja'o'.

¹³Jun p'éel sáasil léenbalnaj jóok tu táan; j káax t'aba'an chúuco'ob.

¹⁴Yuumtzil le sen ca'analo', tu beetaj u yu'uba'al u quíilbal u juum u t'aan te j ca'ano':

¹⁵J ch'iinaj yéetel u x julubo'ob, bey xan yéetel léenbalo'obe', ca tu beetaj u púudzulo'ob in aj p'eeco'ob x ma' tzoolol.

¹⁶Chíicpaj u taamil le ka'anabo'; chíicpaj u chuun pakilo'ob yóokolcaab, Tumen táaj t'aanj Yuumtzil, úuchic u táaj ustaj.

¹⁷Kue' tu tich'aj ti' teen u kab tu ca'anil, yéetel u kab tu jóokesajen ti' u sen nojochil jayacbalil ka'anab.

¹⁸Tu tocajen tu kab aj p'eeco'ob mu'uka'ano'ob quex tumen asab mu'uka'ano'ob ti' teen.

¹⁹Tu pulajuba'ob tin wóokol tu kiinilo'ob in yaj óol, ba'ale' Yuumtzile' tu yáantajen;

²⁰tu dzaj ti' teen jáalkabil; ¡tu tocajen, tumen u yaabiltmajen!

²¹Yuumtzile', dzo'oc u bo'otiquen je'el bix u najmatic in toj cuxtale',

²²tumen tene' j xíimbalnajen tu beel Yuumtzil; ¡Tene' mix jun téen in p'atmaj in wocsaj óolal ti' in Ku!

²³Tene' ma' tin tu'usic mix jun p'éel ti' u ca'anbesajo'ob; ¡mix jun téen in tzelimbáa ti' u ya'almaj t'aano'ob!

²⁴Quin xíimbal yéetel toj cuxtal tu táan; náach quin máan ti' kasa'anil.

²⁵Yuumtzile' dzo'oc u bo'otiquen tu yo'olal in toj cuxtal tu táan.

²⁶Teche' Yuumtzil chuca'an a wóol yéetel máax chuca'an u yóol ti' teech, toj ba'ax ca beetic yéetel máax toj u cuxtal,

²⁷toj a tuucul yéetel máax toj u tuucul, ba'ale' chich a wóol yéetel le máax keechel u tuucul.

²⁸teche' ca toquic máaxo'ob ma' ca'anal u yicho'obi', ca caabal óolcuntic le aj ca'anal icho'obo'.

²⁹Yuumtzil teech in sáasil; in Ku, teech sáasilcuntic in éekjoche'enil.

³⁰Yéetel a wáantaj bíin in ba'atelt le aj p'eeco', bíin máanaquen xan tu yóokol u tuulumilo'ob u caajalo'ob.

³¹U beelo'ob Yuumtzile' tojtac; u séeb chi' Yuumtzile', unaj u yocsaj óolta'al. ¡Ku canantic tuláacal máaxo'ob ocsaj óoltic!

³²¿Máax Junab Ku, ma' wa chéen Yuumtzil? ¿Ba'ax kuil je'el u páajtal u canatico'one'?

³³Kue' leti' in mu'uka'an ta'acbejsaj, leti' beetic ma' in sipa'anchajal,

³⁴Leti' beetic in péeca'anchajal bey quéeje', leti' beetic ma' in péec ca'anal,

³⁵leti' nu'ucbesiquen u ti'al j ba'atel, leti' dzáic in muuk u ti'al in t'inic in x p'unche' bronce u ca'aj.

³⁶Teech canatiquen, teech toquiquen; a wutzile' dzo'oc u beetic u bin teen ti' utzil.

³⁷Ta lukesaj u talamil in beel, ma' jacchajac in wooco'obi'.

³⁸Tin ch'a'apachtaj in aj p'eeco'obe', ca tin xu'ulsajo'ob, p'is úuchic in láaj xu'ulsico'obe', ca j suunajen.

³⁹¡Tin xu'ulbesajo'ob! ¡tin xiixcuntajo'ob! Ma' j ca'a líiko'obi', ¡j lúubo'ob tu yáanal in wooc!

⁴⁰Teche' ta mu'uka'ancuntajen u ti'al le ba'atelo'; ta beetaj u chíinpooltquen le j ma' u'uyaj t'aano'obo',

⁴¹ta beetaj xan u púudzul tin táan in aj p'eeco'ob. Beyo' j páatchaj in xu'ulsic máaxo'ob p'ectma'ilen ca'achi.

⁴²tu káatajo'ob ca'ach áantaj, ba'ale' mix máac j áanto'ob; tu t'anajo'ob Yuumtzil, ba'ale' ma' núuca'ab u t'aano'obi'.

⁴³¡Tin p'atajo'ob bey u ma'ay lu'ume'! ¡tin dzáandzanche'etajo'ob bey u dzop luukil bejo'obe'!

⁴⁴Ta tocajen ti' u aj ba'atelo'ob in caajal, ta dzajen in beet in nojochil ti' tuláacal u nuuquilo'ob yóokolcaab, quin meyajta'al tumen máaco'ob ma' in kaj óoltmajo'ob ca'achi'.

⁴⁵Chéen p'el u yu'ubico'ob in t'aane', cu dzo'ocbesico'ob; j táanxel lu'umilo'ob utz u t'aano'ob tin wo'olal,

⁴⁶le j táanxel lu'umilo'obo', cu ch'a'ico'ob sajaquil, cu jóokolo'ob tu'ux u ta'acbesmajuba'ob táan u quiquilanquilo'ob.

⁴⁷¡Xi'ic utzil ti' Yuumtzil! ¡qui'iqui' t'anta'ac in Aj canan!

⁴⁸Leti'e' Ku, tu suutaj u jeel loobilta'abiquen, tu beetaj in pa'ic u muuk le caajo'obo'.

⁴⁹Leti' toquiquen tu kab in aj p'eeco'ob, bey xan ti' le ma' u'uyaj t'aano'ob j líiko'ob beeto'ob loob ti' teen. ¡Teche' Yuumtzil ca toquiquen ti' le jáampay óol máaco'obo'!

⁵⁰Le t o'olal quin qui'iqui' t'antiquech ichil tuláacal múuch' caajo'ob yéetel quin kayic kaayo'ob ta kaaba'.

⁵¹Ca dzáic nucuch pa'a muuko'ob ti' le ajaw a yéeymajo'; Tuláacal ja'abo'ob ca ch'a'ic óotzilil ti' David yéetel u ch'i'ibalo'ob.