Read Yucateco 2 Samuel 23 Bible Online

2 Samuel 23 - Yucateco bible

2 Samuel 23

¹Lelo'oba' u dzooc u t'aano'ob David: David u paal Isaí, le j xiib nojbe'encunsa'ab tumen u Kue', le ajaw j yéeya'ab tumen u Ku Jacobe', u qui'iqui' aj kaay u kaayilo'ob Israele', dzo'oc u ya'alic:

²U pixan Yuumtzile' cu t'aan tin chi'; u t'aane', ti' yaan tin waake'.

³U Ku Israele' dzo'oc u t'aan; u aj canan Israele', dzo'oc u ya'alic ti' teen: Le máax cu méektáantic le j xiibo'ob yéetel tojil, le máax cu méektáan yéetel u quili'ich sajaquilil Ku,

⁴bíin p'áatac bey u jáanpike'enil u taal u sáastale', bey u juul kiin tu ja'atzcabil x ma' múuyalo'obe', cu beetic u nuuctal xíiwo'ob cu dzo'ocol u káaxal ja'e'.

⁵Let o'olal in ch'i'ibale' utz wa'alacbalil ti' Ku, Tumen tu beetaj tin wéetel jun p'éel nup t'aan mina'an xu'ulul ti', jach ma'alob u láaj nu'uctmajil mina'an kexpajal ti'. Leti' beetic u chuca'an béeytal, leti' beetic u béeytal tuláacal in dzíibolajo'ob.

⁶Ba'ale' tuláacal le j loolob máaco'obo', bíin p'áataco'ob beyo'ob p'ecbe'en ki'ixo'ob, mix máac machico'obe'.

⁷u ti'al ca ma'achaco'obe', kabéet jun p'éel fierro wa jun p'éel x lóomte', cu pu'ulul j káak u ti'al ca láaj elec.

⁸Lelo'oba' u kaaba'ob u aj xiixib máaquilo'ob u aj ba'atelo'ob David: Is-Boset hacmonita, u nojochil le óox túul asab j xiixib máaco'ob, jun téene' tu quíimsaj ochocientos máaco'ob yéetel u lóomte'.

⁹Cu dzo'ocole', Eleazar u paal Dodo, ahohita, leti' jun túul ti' le asab j xiixib máaco'obo'. Tu láakintaj David Pasdamim, le kiinac tu much'ajuba'ob le j filisteob j ba'atel ca tu beetajo'ob u yáalcabo'ob le j israelitaobo'.

¹⁰Ba'ale' letie', ma' j péecnaj u yóoli', jo'op' u quíimsic j filisteob cambalnaj u kab ma' páatchaj u jáalkabtic u máascabi'. Le kiinaco' tu ti'alintaj jun p'éel nojoch pa'a muuk. Cu dzo'ocole' le aj ba'atelo'obo', j bino'ob tu paach Eleazar u ti'al u ch'a'ico'ob le ba'ax tu tocajo'ob ti' le aj p'eeco'.

¹¹U yóox túule', Sama, u paal Age, ararita. Le ca j much'laj le j filisteob Lehi u cúuchil tu'ux paka'an lentejaobe', u aj ba'atelo'ob Israele', j púudzlajo'ob tu táano'ob.

¹²Ba'ale' Samae', j wa'alaj tu chúumuc u káaxil tu'ux paka'an le lentejaobo' ca tu tocaj, tu pa'aj u muuk le j filisteobo'. Beyo' tu ti'alintaj jun p'éel nojoch pa'a muuk.

¹³Jun téenac, tu kiinil jooche', óox túul ti' le j xiixib máaco'obo', j bino'ob u nuptáantuba'ob tu yéetel David tu yáactunil Adulam. U aj ba'atelilo'ob le j filisteobo', ti' jelecbalo'ob ca'ach tu táax lu'umil Refaime'.

¹⁴Davide' ti' yaan ca'ach ich tuulume', u aj ba'atelo'ob ca'ach le j filisteobo' ti' yano'ob ca'ach Belene'.

¹⁵Davide' tu ya'alaj ba'ax u dzíibolal: ¡Quexi'i wa máax ca u dzáaten in wuk u ja'il le ch'e'en yaan tu jool u caajil Beleno'!

¹⁶Le óox túul jach j xiixib máaco'ob túuno', j ooco'ob tu'ux jelecbal le j filisteobo', ca tu jóokeso'ob ti' le ch'e'en yaan tu jool u caajil Beleno', ca tu bisajo'ob ti' David. Ba'ale' leti'e' ma' tu yóoltaj u yuki', ba'ale' tu wecaj u ti'al ti'ibil óolal ti' Yuumtzil,

¹⁷táan ca'ach u ya'alic: ¡Ma' u yóoltic Yuumtzil ca in wuke'! ¡tumen lelo' u tojol u ki'ikel le j xiibo'ob tu nadzajuba'ob tu chi' quíimil u ti'al u taasico'ob ti' teen in wuke! Le ba'ax tu beetajo'ob le óox túul j xiixib máacoba', mix bikin bíin tu'ubsa'ac.

¹⁸Abisai u sucu'un Joab u yaal x Sarvia, le ti' u nojochil le treinta j xiixib máaco'obo'. Jun téenaque', tu ba'ateltaj trecientos j xiibo'ob yéetel u lóomte', ca tu quíimsajo'ob. Bey tu náajaltil u nojoch ba'alil ichil le treinta j xiixib máaco'obo',

¹⁹ca tu kamaj asab ya'ab tziiquil ti' leti'ob, tumen tu beetajubáa u nojochilo'ob. Ba'ale' ma' tu quetaj le yáax óox túulo'obo'.

²⁰Benaía u paal Joiada j cabseelil, jun túul j xiixib máac tu beetaj ya'abcach ba'alo'ob ma' bíin tu'ubesa'aco'obi', leti' quíims u ca'a túul paalal Ariel j moabil. Jun téenac táan u káaxal ye'ebe', j ooc u ta'acbesajubáa tu yáanal jun p'éel sajcabe', ca tu quíimsaj jun túul león.

²¹Tu quíimsaj xan jun túul j egiptoil sen ca'anal u baaquel u machmaj u x lóomte': Benaíae' tu puljubáa tu yóokol yéetel jun p'éel che', ca tu tocaj u x lóomte' tu kabe', ca tu quíimsaj tu yéetel.

²²Le ba'ax tu beetaj Benaía u paal Joiadao', tu beetaj u náajaltic tziiquil ichil le treinta j xiixib máaco'obo';

²³tu kamaj asab ya'ab tziiquil ti' leti'ob, ba'ale' ma' tu quetaj le yáax óox túulo'. Davide' tu dzaj tu táan le aj ba'atelo'ob canantico'.

²⁴Ichil le treinta j xiixib máaco'obo', ti' yano'ob ca'ach: Asael u yíidzin Joab; Elhanán, u paal Dodo j belenil;

²⁵Sama j harodil; Elica j harodil xan;

²⁶Heles paaltitaj; Ira, u paal Iques j tecoai;

²⁷Abiezer, j anatotil; Sibecai j husahil;

²⁸Salmón, ahohita; Maharai j netofail;

²⁹Heled u paal Baana, láili' j netofaile'; Itai u paal Ribai j gabaai, yaan tu lu'umilo'ob Benjamín;

³⁰Benaía j piratonil; Hidai j gasil

³¹Abi-albón arbatita; Azmabet j bajurimil;

³²Eliaba saalbonita; u paalal Jasén, Jonatán;

³³Sama ararita; Ahían, u paal Sarar, láili' araritae';

³⁴Elifelet, u paal Ahasbai u paal le j macaile'; Eliam u paal Ahitofel, j giloil,

³⁵Hezrai j carmelil; Parai arbita;

³⁶Igal u paal Natán j sobail; Bani j gadil;

³⁷Selec j amonitail; Najarai j berotil, u palitzil Joab u yaal x Sarvia;

³⁸Ira jatiril; Gareb láili' jatirile';

³⁹yéetel Urías j hititail. Tuláacalo'obe' treinta yéetel sieteob.