Read Yucateco 2 Samuel 24 Bible Online

2 Samuel 24 - Yucateco bible

2 Samuel 24

¹Yuumtzile' j léec u p'u'ujul tu ca'a téen tu yóokol le j israelitaobo', ca tu yocsaj tu pool David ca u xoc jay túul u caajnáalilo'ob Israel yéetel Judá.

²Ajaw túune' tu ya'alaj ti' Joab, u náacomil u aj ba'atelo'ob láakintmajilo': Xíimbalt tuláacal u ch'i'ibalo'ob Israel likbal Dan tac Bersebae', ca xoc jay túul u caajnáalilo'ob u caajilo'obe', ca in wojéelt jay túul u caajnáalilo'ob yaan.

³Ba'ale' Joabe' tu núucaj ti' ajaw: Yuumtzil u Ku a Tzicbe'enil ca u ya'abcunt cien u téenel ti' le buca'aj yaan bejela'a', yéetel ca cuxlac a Tzicbe'enil u yila'e; ba'ale', ¿ba'axten u káat a Tzicbe'enil u xoc jay túulo'ob?

⁴Ba'ale', u t'aan ajawe', tu mix ba'alcuntaj u t'aan Joab yéetel u t'aan u nuuquilo'ob le aj ba'atelo'obo', bey túuno' Joab yéetel u nuuquilo'ob le aj ba'atelo'obo', j luko'ob tu táan ajaw u ti'al u bino'ob u xoco'ob u caajnáalilo'ob u caajilo'ob Israel.

⁵Tu ch'actajo'ob u yáalcab ja'il Jordane', ca tu cáajsajo'ob u xoquico'ob Arroer yéetel ti' le caaj yaan tu chúumuc le táax kóom lu'um, tu tojil Gad yéetel Jazer.

⁶Cu dzo'ocole' j bino'ob Galaad yéetel Cades, tu lu'umilo'ob j hititaob. Cu dzo'ocole' j kucho'ob Dan, Dane' j lóocho'ob tu tojil Sidón.

⁷Cu dzo'ocole' j bino'ob tu tuulumilo'ob Tiro bey xan tuláacal u caajilo'ob j heveob yéetel j cananitaob, tac u jóokbalo'ob tu noojol Judá, tac Beerseba.

⁸Cu dzo'ocol u láaj xíimbaltico'ob tuláacal le lu'umo'ob buul ocho winalo'ob yéetel veinte kiino'obo', j suunajo'ob Jerusalén.

⁹Joabe' tu kubaj ti' ajaw u xooquil tuláacal le caajo'obo', u xooquile', ochocientos mil u j xiibilo'ob Israel nu'uca'ano'ob u ti'al j ba'atel, yéetel quinientos mil u j xiibilo'ob Judá.

¹⁰Ba'ale' Davide' tu yu'ubaj ma' utz u yóol úuchic u xoquic u caajnáalilo'ob Israele', ca tu cáantaj ti' Yuumtzil: Nojoch kebanchajiquen úuchic in beetic le ba'ala'. Ba'ale' in Yuumtzil quin káat óoltic ti' teech ca a sa'atest u keban a palitzila', tumen dzo'oc in beetiquinbáa bey jun túul j ma' na'at wíinique'.

¹¹Tu ja'atzcabil u láak kiin le ca j líik Davide', Yuumtzile' tu ya'alaj ti' aj bóobat Gad, máax ti' cu káat chi' ca'ach David:

¹²Xeen a wila'a Davide' ca a wa'al ti' quin dzáic óox p'éel ba'alo'ob tu táan leti', bíin u yéey ba'ax u káat ca in beete.

¹³Gade' j bin u yila'a Davide' ca tu káat chi'itaj ti': ¿Ba'ax a káati: a káat siete ja'abo'ob wi'ijil te j lumo'oba', wa a káat ca ch'a'apachtaquech óox p'éel winalo'ob tumen a aj p'eeco'ob, wa quex a káat ox p'éel kiin báan quíimil te j lumo'oba'? Tucult jun puli' ba'ax bíin in wa'al ti' máax túuchi'iten.

¹⁴Davide' tu núucaj ti' Gad: Sen talam in wanil. Ba'ale' asab ma'alob ca lúubuco'on tu kab Yuumtzil, sen nojoch u yabilaj, ma' c lúubul tu kab wíinico'ob.

¹⁵Yuumtzil túune' tu túuxtaj jun p'éel báan quíimil tu yóokol Israel, chu'unpaj ti' u ja'atzcabil le kiino', tac ti' le kiin a'ala'ano', líikbal Dan tac Bersebae', j quíim setenta mil máaco'ob.

¹⁶Ba'ale' le ca tu chucaj u súutuquil u xu'ulsa'al Jerusalén tumen le aj túuchi'o', Yuumtzile' tu ch'a'a óotzilile', ca tu ya'alaj ti' u aj túuchi' máax loobiltic le caajo': ¡Dzo'oc beyo', p'at a quíimsaj! Ti le súutuca', le aj u túuchi' Yuumtzilo', ti' yaan ca'ach te j cúuchil tu'ux yaan Arauna jebuseo táan u yoxo'omtic trigo'.

¹⁷Le ca tu yilaj David le aj túuchi' táan u loobiltic le caajo', tu ya'alaj ti' Yuumtzil: ¡Teen le máax kebanchajo'! ¡Teen yaan in si'ipil! ¿Ba'ale', ba'ax u beetmaj le máaco'ob mix ba'al u yojelo'oba'? ¡Tene' quin káat óoltic teech ca lúubuc a jaadz tin wóokol yéetel tu yóokol in láaktzilo'ob!

¹⁸Ti' le kiino', Gade' j bin u yil David, ca tu ya'alaj ti' ca u beet jun p'éel u múultunil kultaj u ti'al Yuumtzil te j cúuchil tu'ux cu yoxo'omtic trigo ca'ach Arauna le jebuseo'.

¹⁹David túune' j bin u beet le ba'ax tu ya'alaj Gad je'el bix tu ya'alajil Yuumtzilo'.

²⁰Araunae' táan ca'ach u paacat náach le ca tu yilaj táan u taal ajaw tu yicnal yéetel u palitzilo'ob. Arauna túune' j chinlaj tu táan ajawe' ca tu ya'alaj ti':

²¹¿Ba'ax o'olal cu taal a Tzicbe'enil u xíimbalt a palitzila'? Davide' tu núucaj: In káat in man ti' teech le cúuchil tu'ux ca woxo'omtic le trigo u ti'al in beetic jun p'éel u multuun u ti'al Yuumtzil, tu yo'olal u xu'ulul le báan quíimil ti' le caaja'.

²²Araunae' tu núucaj ti': U ch'a'a a Tzicbe'enil le cu tucultic ma'alobe', ca u kub le ba'axo'ob cu láaj tóocalo'obo'. Waye' yaan wacaxo'ob u ti'al láaj tóocbil, cu dzo'ocole' u nu'ucul le oxo'om yéetel u nu'ucul u meyaj le wacaxo'obo', je'el u meyaj u ti'al sie'.

²³¡Tuláacal lela' quin dzáic ti' a Tzicbe'enil! Araunae', tu ka'am a'alaj xan: ¡Quexi'i ca u qui'imaccunt u yóol Ku a Tzicbe'enile'!

²⁴Bale' ajawe' tu núucaj: Jach ya'ab a wutzil tin wéetel, ba'ale' bíin in láaj man ti' teech, yaan in láaj bo'otic ti'iteech, tumen ma' bíin in táanbes ti' Yuumtzil in Ku tóocbil ba'alo'ob wa ma' u tojoltmaj ti' teni'. Bey tu manilac David le cúuchil yéetel le wacaxo'obo', tu bo'otaj yéetel cincuenta taakino'ob plata u ca'ajo'ob,

²⁵te'elo', tu beetaj jun p'éel u multuunil kultaj u ti'al Yuumtzile', ca tu kubaj le ba'alche'ob cu láaj tóocalo'obo', bey xan u quíimsbil ba'alche'ilo'ob ca'a bisajbáil. Yuumtzil túune' tu yu'ubaj le u káat óolalo'ob le caajobo', ca j xu'ul le báan quíimil tu lu'umil Israel.