Read Yucateco 2 Samuel 3 Bible Online

2 Samuel 3 - Yucateco bible

2 Samuel 3

¹Le ba'atel j yanchaj ti' u láaktzililo'ob Saúl yéetel u láaktzililo'ob Davido', j xáanchaji, ba'ale' ca'aliquil táan u mu'uka'anchajal u láatzililo'ob Davide', u láaktzililo'ob Saúle', táan u bin u yóotziltal u muuk.

²U paalal David j síijo'ob ca'aliquil ti' yaan ca'ach Hebrone', lelo'oba': U yáax paale', Amnón u yaal x Ahinoam x jezreelil;

³u ca'a túule', Quileab u yaal x Abigail u yatan ca'ach Nabal j carmelil; u yóox túule', Absalón u yaal x Maaca u x ch'upul paal Talmay u ajawil Gesur;

⁴u can túule', Adonías u yaal x Aguit; u cinco u túulule', Sefatías u yaal x Abital;

⁵u seis u túulule', Itream u yaal x Egla, u láak jun túul u yatan David. Le je'elo'oba', j síijo'ob ca'aliquil ti' yaan ca'ach David Hebrone'.

⁶Ca'aliquil táan u bin u bin u ba'atelo'ob u láaktzililo'ob Saúl yéetel u láaktzililo'ob Davide', Abnere', xi'ic u bin ca'ach u méektáantic u láatzililo'ob Saúl.

⁷Yanchaj ca'ach jun túul u x keech Saúl tu kaaba'intaj x Rispa u x ch'upul paal Ajae', yanchaj ba'ax u yil ca'ach yéetel Abner. Le t o'olal Isbosete', tu keyaj Abnere', ca tu ya'alaj ti': ¿Ba'axten j chilajech yéetel u x keech in taata?

⁸Abnere' sen j p'u'uj úuchic u ke'eyel, ca tu núucaj ti': ¿Chéen wa bey a wiliquen jun túul peek cu meyaj u ti'al Judae'? Tene' tin kubaj in wóol ti' u láaktzililo'ob a taata, ti' u láako'ob bey xan ti' u yéet óolalo'ob, cu dzo'ocole', ma' in kubech tu kab Davidi'. ¿Teche', táan a wa'alic dzo'oc in kebanchajal yéetel jun túul co'olel?

⁹¡Bíin u chich jadzen Yuumtzil wa ma' tin dzo'ocbesic ba'ax u jalach t'anta'an ca'ach Yuumtzil ti' David,

¹⁰u luksa'al le ajawil ti' u ch'i'ibal Saúl u ti'al u culquinta'al David tu jalach káanche' Israel yéetel Judá líikbal Dan tac Beerseba!

¹¹Is-bosete', ma' páatchaj u núuquic mix jun p'éel t'aan ti' Abneri', tumen sen sajacchaj ca'ach ti'.

¹²Abner xane' tu túuchi'itaj aj bisaj t'aano'ob a'alic ti' David: ¿Máax ti'altic le lu'umo'oba'? Co'ox beetic jun p'éel kaax t'aan: Tene', bíin in beet le buca'aj cu páajtal in beetic u ti'al ca máanac Israel ta tzéele'.

¹³Davide' tu núucaj: Tene' je'el in éejemtic le nup t'aan ta wéetele' wa ca a beet ba'ax bíin in káat ti' teech: Ma' a wantal tin táan le quéen taalaquech a wilene', wa ma' ta taasic x Mical u x ch'upul paal Saúl.

¹⁴Cu dzo'ocole', Davide' tu túuchi'itaj xan aj bisaj t'aano'ob u ti'al u ya'alic ti' Is-boset: Kub teen x Mical in watan yéetel máax dzoca'an in beele', ca in kub ti' teech u keexint cien u yoot'el u j xiibil le filisteobo'.

¹⁵Is-boset túune' tu túuchi'itaj j tocbil ti' j Patiel u paal Lais u yíicham ca'ach x Mical;

¹⁶ba'ale' Patiele', j bin tu paach leti'e', tu t'u'ulpachtaj tac Bahurim ca'aliquil táan u sen okol. Te'elo', j a'ala'ab ti' tumen Abner ca suunac, Patiele', j suunaji.

¹⁷Cu dzo'ocole', Abnere', j t'aanaj yéetel u nuuquilo'ob Israele', ca tu ya'alaj ti'ob: Dzo'oc u yúuchtal jo'op'oc a dzíiboltique'ex ca a ajawte'ex David.

¹⁸Bejela'e', dzo'oc u chuquic u kiinil, tumen Yuumtzile', tu dzaa t'antaj ti' David, tu kab leti' bíin u toc Israel u lu'umo'ob tu kab le j filisteob yéetel ti' tuláacal u aj p'eeco'ob.

¹⁹Abnere', j t'aanaj xan yéetel tuláacal u láaktzilo'ob Benjamín, cu dzo'ocole' j bin Hebrón u ya'al ti' David ba'ax u tuucul tuláacal Israel yéetel Benjamín.

²⁰Leti'e', j kuch yéetel veinte j xiibo'ob tu caajil Hebrón tu yicnal David, Davide' tu beetaj jun p'éel noj janal u ti'alo'ob.

²¹Cu dzo'ocole' Abnere' tu ya'alaj ti' David: Bejela'e', unaj in bin in much'quíint tuláacal Israel u ti'al ca u beeto'ob jun p'éel nup t'aan yéetel a Tzicbe'enil, u ti'al ca u beet u ajawtal a Tzicbe'enil je'el bix u tucultmaje'. Cu dzo'ocole' Davide' tu ya'alaj ti' Abner ca xi'ic utzil ti', bey binic jejedzquil u yóolo'.

²²Ti' le súutuco', Joab yéetel u aj ba'atelo'ob Davide', táan ca'ach u suuto'ob tu cúuchil ba'atel yéetel le ba'ax tu tocajo'ob ti' le aj p'eeco'. Abnere', dzo'oc ca'ach u lukul Hebrón, tumen dzo'oc ca'ach u bin yéetel jéedzel óolal, cu dzo'ocol u ya'ala'al ti' tumen David ca xi'ic.

²³Le ca j kuch Joab yéetel tuláacal u aj ba'atelo'obe', j tzicbalta'ab ti': Abner u paal Nere', ti'anchaj tu yicnal Davide', j bin cu dzo'ocol u ya'ala'al ti' tumen ajaw ca xi'ic.

²⁴Joab túune' j bin u yila' ajawe', ca tu ya'alaj ti': ¿Ba'ax dzo'oc u beetic a tzicbe'enil? Abnere', j taal u yil a tzicbe'enile', cu dzo'ocole' a tzicbe'enile' tu cha'aj u bin.

²⁵¿Ma' wa u yojel a Tzicbe'enil Abner u paal Nere', chéen j taal u tus a tzicbe'enil u ti'al u ch'úuct ba'ax ca beetic?

²⁶Chéen p'elac jóokic Joab tu yicnal Davide', tu túuchi'itaj aj bisaj t'aano'ob ch'aic Abner quex ma' tu dzaj u yojéelt Davide', tu beetaj u su'utul líikbal tu tojil u ch'e'enil Sira.

²⁷Le ca j kuch Abner Hebrone', Joabe', tu bisaj tu jun tzéel u jool le caaj u ti'al u t'aan tu juunal tu yéetel, ca tu lomaj tu nak u ti'al u sutic u jeel úuchic u quíimsa'al Asael u yíidzin.

²⁸Le ca tu yojéeltaj Davide' tu ya'alaj: Tu táan Yuumtzile', teen yéetel in jalach naje', mix ba'al yaan c ila'a' yéetel úuchic u quíimsa'al Abner u paal Ner.

²⁹¡Lúubuc u si'ipilil tu yóokol Joab yéetel tu yóokol u láaktzililo'ob, ma' bíin jáawac u yantal ichil u yotoch koja'anilo'ob wiix puj, jáawayil wa móochil, bey xan máax cu quíimsa'al, bey xan máax cu mukyajtic wi'ij!

³⁰Joab yéetel Abisaie', tu quíimsajo'ob Abner, tumen Abnere', tu quíimsaj u yíidzino'ob Gabaón ich ba'atel.

³¹Cu dzo'ocole', Davide' tu ya'alaj ti' Joab yéetel ti' tuláacal máaxo'ob láakintmail: Jat a nooke'ex, búuquinte'ex to'och nooko'ob, beete'ex u yaj óolalil úuchic u quíimil Abner. Ajaw Davide', j bin tu paach u kóoch che'il,

³²ca j mu'uc Abner Hebrón. Te'elo', ajawe', jo'op' u sen ka'amcach okol tu yicnal u mucnal Abner, bey okolnajic xan le caajo'.

³³Ajaw túune' tu kaya' le okol kaaya', tu yo'olal Abner: ¿Abner, ba'axten j quíimech quex ma' unaj ca'ach a quíimili',

³⁴ma' wa jáalkab ca'ach a kabo'ob, yéetel a wooco'obi'? ¡J quíimech bey máax cu quíimil tu kab kaakas máaco'obe'! Tuláacal le caaj ca'a okolnaj tu yo'olal

³⁵Cu dzo'ocole', j bin káat óoltbil ti' David ca u jaant wa ba'ax ca'aliquil ma' t'úubuc kiini', ba'ale' Davide' jalach t'aanaj táan u ya'alic: ¡Junab Ku bíin u chich jadzen wa quin túuntic waaj wa quex je'el ba'alac maili' t'úubuc kiine'!

³⁶Tuláacalo'ob tu na'atajo'ob ba'ax tu ya'alaje', ca tu tuculto'ob ma'alobil, tumen tuláacal ba'ax cu beetic ajawe', utz yila'al tumen le caajo'.

³⁷Ti' le kiino' tuláacal le j israelitaob tu táan óoltajo'ob ma' u yanchajal mix ba'al u yil ajaw yéetel quíimsa'abic Abner u paal Neri.

³⁸Cu dzo'ocole' ajawe' tu ya'alaj ti' u nuuquil u aj meyajo'ob: Je'el bix a wojelile'exo', bejela'e', dzo'oc u lúubul tu caajil Israel jun túul nojoch aj ba'atel, jun túul nojoch j xiib.

³⁹Let o'olal tene', quex tumen teen le ajaw tu yéeyaj Yuumtzilo', t'ona'an in wu'uyiquinbáa tu yo'olal le loob tu beetajo'ob u paalal x Sarvia. ¡Yuumtzil ca u dzáa u bo'olil ti' le máax beet le looba'!