Read Yucateco 2 Samuel 4 Bible Online

2 Samuel 4 - Yucateco bible

2 Samuel 4

¹Le ca tu yojéeltaj is-boset u paal Saúl dzo'oc u quíimil Abner tu lu'umil Hebrone', jach j lúub u yóol, cu dzo'ocole' tuláacal Israele' tu sen ch'a'aj sajaquil.

²Is-bosete' yaan ca'ach ca'a túul j xiixib máaco'ob ichil u palitzilo'ob, leti'ob ca'ach u nuuquilo'ob jun jaatz j oocolo'ob. Jun túule' cu kaaba'intic ca'ach Baana, u láake' Recab. U paalal ca'ach Rimon j berotil, u ch'i'ibalo'ob ca'ach Benjamín, tumen u chan caajil Berote', cu ya'ala'al ca'ach u caajal Benjamín

³quex tumen le j berotilo'obo' j púudzo'obe', ca j bino'ob Gitaim tu'ux cajacbalo'ob tac bejela'a' beyo'ob j táanxel lu'umilo'obe'.

⁴Ba'ale' Jonatán u paal Saúle', yaan ca'ach jun túul u paal cu kaaba'intic Mefi-boset móoch ti' u ca'a dzíital u yooc. Yaan ca'ach cinco u ja'abilo'ob Mefi-boset, j kuch Jezreel u péectzilil dzo'oc u quíimsa'al Saúl yéetel Jonatán; u x chiiwe' tu ch'a'aj Mefi-bosete', ca j púudz tu yéetel, ba'ale' tu yo'olal sen chich áalcabnajico'obe', le chan paalo' lúube', ca j móochchaji.

⁵Recab yéetel Baana u paalal Rimón j berotile', j bino'ob tu yotoch Is-bosete' ca j kucho'ob dzo'oc u jach chocotal kiin ca'aliquil táan u wenel cu dzo'ocol u janal.

⁶u x canan jool najil le najo'ob táan ca'ach u pictic u qui'is trigo, ba'ale' leti'e' j ooc u wenel, let o'olal Recab yéetel Baanae', ma' ila'ab j ooquico'obi'.

⁷Le ca j oocob ti' le najo', Isbo-sete', chilicbal ca'ach tu kaan tu cúuchil u wenel; ca túun tu quíimsajo'ob, ca tu cúul kupto'ob u caal, ca tu ch'a'ajo'obe', ca j xíimbalnajo'ob buul áakab tu bejil Arabá

⁸u ti'al u bisico'ob u kubo'ob ti' David, máax ti' yaan ca'ach Hebrone'. Tu ya'alajo'ob ti' ajaw: Way c taasic ti' a Tzicbe'enil u pool Is-boset u paal Saúl, u aj p'eec a Tzicbe'enil taac u quíimsiquech ca'achi. Ba'ale' bejela'e', Yuumtzile' cu kubic tu kab a Tzicbe'enil táan u sutic u jeel loob ti' Saúl yéetel u ch'i'ibalo'ob.

⁹Davide' tu núucaj ti'ob: Quin jalach t'antic tu kaaba' Yuumtzil max tocmailen ti' tuláacal yaj óolal,

¹⁰le ca j yanchaj jun túul máac tu tucultaj táan u taasic teen ma'alob péectzilo'ob úuchic u taal u ya'al teen dzo'oc u quíimil Saúle', yanchaj in machic in quíims tu caajil Siglag yo'olal le péectzilo'.

¹¹¡Cux túun kaakas máaco'ob je'el bixe'ex cu quíimsico'ob jun túul j ma' si'ipil máac chilicbal tu yotoch! Bey túuno', ¡Bin in ca'aj in beet a bo'otique'ex le quíimilo'! ¡Bin in ca'aj in tzele'ex way yóokolcaabe'!

¹²Tu séeblaquile', Davide' tu ya'alaj ti' u nuuquil u aj ba'atelo'ob ca quíimsa'aco'ob, leti'obe', tu quíimsajo'ob; j ch'a'ac u kabo'ob yéetel u yoocobe', ca j ch'uyquinta'abo'ob tu tzéel u nu'ucul u dza'abal ja' yaan Hebrono'. Cu dzo'ocole', j ch'a'ab u pool Is-bosete', ca j mu'uc Hebrón tu mucnal Abner.