Read Yucateco 2 Samuel 7 Bible Online

2 Samuel 7 - Yucateco bible

2 Samuel 7

¹Cu dzo'ocol u qui' ma'alob cutal David tu jalach káanchee', dzo'oc u dza'abal ca'ach jéedzel ti' tumen Junab Ku yéetel tuláacal u aj p'eeco'ob yaan tu bakpache',

²tu ya'alaj ti' aj bóobat Natán: Je'el bix a wilico', tene' cajacbalen ti' jun p'éel jalach naj kuulche' u ca'aj, ca'aliquil u ba'asche' Kue' ti' yaan chéen tu yáanal káasab nooko'obe'.

³Natán túune' tu núucaj ti': Beet le ba'ax dzo'oc a tucultico', tumen bíin u yáantech Yuumtzil.

⁴Ba'ale' ti' le áakabo' Yuumtzile' tu t'aana' Natane' ca tu ya'alaj ti':

⁵Xeen j t'aan yéetel in palitzil Davide' ca a wa'al ti' ba'ax quin wa'alic teen, Yuumtzile': Ma' teech bíin beetic jun p'éel kulnaj u ti'al in cajtali'.

⁶Líikbal ti' le kiin le ca tin jóokesaj le j israelitaob Egipto', tac bejela'e', mix jun téen cajlaquen ti' kulnajo'ob, ba'ale' chéen ti' chuybil najo'ob.

⁷Ti' tuláacal le kiino'ob xíimbalnjen tu yéetelo'obo', mix jun téen tin káataj ti' le u nuuquilo'ob, tin dzajo'ob méektáanil ca u beeto'ob teen jun p'éel kulnaj kuulche' u ca'a.

⁸Bey túuno' a'al ti' in palitzil David, teen Yuumtzil máax ti' yaan tuláacal páajtalile', quin wa'alic ti': Tin lukesajech ichil u múuch'ul le j tamano'obo', ca tin beetaj u jáawal a ch'a'apachtico'obe', ca tin dzajech nojochil ichil in caajal Israel;

⁹dzo'oc in láaintique'ech tuláacal tu'ux dzo'oc a máan, dzo'oc in xu'ulsic tuláacal a aj p'eeco'ob j taalo'ob u ba'ateltecho'obo', dzo'oc in dzáic ti' teech xan tziiquil je'el bix le yaan ti' u nucuch máaquilo'ob yóokolcaabo'.

¹⁰Tu yóokol lelo' dzo'oc in nu'uctic cúuchil u ti'al u yantal in caajal Israel, dzo'oc in bisico'ob cajtal ichil ba'al u ti'alo'ob tu yo'olal ma' u chi'ichnaccunta'alo'ob tumen mix máac, mix tumen le máaxo'ob yáax palitziltmailo'ob ca'acho',

¹¹le ca tin dzaj xiixib máaco'ob, u ti'al méektáantic in caajal Israele'. Tene' bíin in beet u jáawal u chi'ichnaccuntiquech a aj p'eeco'ob. Quin dzáic a wojéelt xan bíin yanac a ch'i'ibalo'ob,

¹²le quéen kuchuc u kiinil a quíimile', tene' bíin in jedzcunt jun túul a ch'i'ibal u ti'al ajawtal.

¹³Leti' bíin u beet teen jun p'éel kulnaj, tene' bíin in béeycunt u ajawtal tuláacal ja'abo'ob.

¹⁴Tene' bíin in Taatailtimbáa ti', leti' xane', bíin in paalinte. Le quéen kebanchajaque', bíin in jadz je'el bix u ja'adza'al jun túul paal tumen u taatae',

¹⁵ba'ale' ma' bíin in lukes in yaacunaj ti', je'el bix tin lukesajil ti' Saúl u ti'al in dzáic ti' teche'.

¹⁶A ch'i'ibal yéetel a ajawile', bíin p'áatac jedzecnac yanil yáanal in kab, a ajawil xane', bíin p'áatac u ti'al tuláacal ja'abo'ob.

¹⁷Natane', tu tzicbaltaj ti' David jach je'el bix tu yilajil yéetel tu yu'ubajile'.

¹⁸Ajaw David túune', j ooc t'aan yéetel Yuumtzile' ca tu ya'alaj ti', Yuumtzil ¿máaxen teen yéetel in láako'ob u ti'al ca a beet in kuchul tac te'ela'?

¹⁹¡Teche' Yuumtzil jun p'íit ba'al wa a wilic le utzil ta beetaj ti' teno', dzo'oc tac a wa'alic ti' teen bix bíin a qui' t'ant u ch'i'ibal a palitzil! ¡Yuumtzil mix máac je'el u beetic le ba'ax ca beetico'!

²⁰¿In Yuumtzil ba'ax u láak je'el u páajtal in wa'alic ti' teech bey a kaj óol a palitzila'?

²¹Tuláacal le máactzilo'oba', dzo'oc a beetic je'el bix ta séeb chi'itilac yéetel je'el bix ta tucultajilaque', u ti'al ca in kaj óolte;

²²Bey túuno' in Yuumtzil, ¡buca'aj a nojochil! mina'an u láak Junab Ku je'el bix teche', cu dzo'ocol teche', mina'an xan u jeel ku je'el bix c ojlilo'.

²³Wa tu yo'olal Israel a caajale', ¡mina'an u láak je'el bix leti'e' tumen chéen leti' u múuch' caajil lu'um! Teech, in Yuum Ku ta tocaj u ti'al a caajalte, ta beetaj u tziquilta'al úuchic a beetic nucuch máactzilo'ob tu yo'olal. Teche' ta tojolch'intaj tuláacal le múuch' caajo'ob yéetel u kuob tu táan a caajal le ta jóokesaj Egiptoo',

²⁴tumen teche' ta wa'alaj bíin a caajalt Israel tuláacal ja'abo'ob, cu dzo'ocole' in Yuumtzil teech bíin u Junab Kuinte.

²⁵Bey túuno' Yuumtzil Ku, béeycunt tuláacal ja'abo'ob le jalach t'aan ta beetaj ti' a palitzil yéetel ti' u chi'ibal. dzo'ocbes ba'ax dzo'oc a wa'alic.

²⁶¡Nojbe'encunt a kaaba' tuláacal ja'abo'ob, u ti'al ca a'ala'ac u Ku Israele', u Yuumtzilil tuláacal páajtalil! ¡P'áatac jedzecnac u chi'ibal a palitzil yáanal u kab!

²⁷Teche' u Yuumtzilil tuláacal páajtalil, dzo'oc a dzáic in wojéelt bin a ca'aj a jedzcunt in ch'i'ibal; le t o'olal quex a palitzilene', quin taalbal in beet le káat óolala'.

²⁸Teche' in Yuumtzil, Kuech, láaj jaaj ba'axo'ob ca wa'alic, cu dzo'ocole' ta séeb chi'itaj sen ya'abcach yaacunaj ti' a palitzil;

²⁹qui' t'ant u ch'i'ibal a palitzil u ti'al ca cuxlac yáanal a kab mantadz kiino'ob. Teech Yuumtzil in Ku, a séeb chi'itmaj, cu dzo'ocole' yéetel a qui' t'aane', u ch'i'ibal a palitzile', bíin qui' t'antpajac tuláacal ja'abo'ob.