Read Yucateco 2 Samuel 8 Bible Online

2 Samuel 8 - Yucateco bible

2 Samuel 8

¹Cu dzo'ocole' Davide' tu pa'aj u muuk le j filisteobo', ca tu t'onquintajo'ob tac u jáanpaytic tu kabo'ob le méektáanilo'.

²Tu pa'aj xan u muuk le j moabitaobo', ca tu beetaj u jaytalo'ob j lu'ume', le máaxo'ob yano'ob ichil ca'a p'iisil káane' cu quíimsa'alo'ob: Le je'enquech cu p'áatalo'ob ichil jun p'iisile' ma' tu quíimsa'alo'ob. Beyo' le j moabitaobo' j t'onquinta'abo'ob tumen David, j yanchaj xan u bo'otico'ob patan ti'.

³Davide' tu pa'aj xan u muuk Hadad-ezer, u paal Rejod, u ajawil ca'ach Soba, leti'e' bin u ca'aj ca'ach u ca'a t'onquint u caajnáalilo'ob u tojil u yáalcab ja'il Éufrates.

⁴Ti' leti'obe', Davide' tu ch'a'aj seicientos mil cuxa'an aj ba'atelo'ob cu nat'ico'ob tzíimin yéetel veinte mil xíimbal ooc cu ba'atelo'ob; tu cachláantaj u yooco'ob tuláacal u tzíiminilo'ob u bolanilo'ob ba'atel, chéen tu p'ataj dze'edzec tzíimino'ob u ti'al cien bolano'ob.

⁵J kucho'ob túun le j siriob caja'ano'ob ca'ach Damasco u ti'al áantic Hadad-ezer u ajawil Soba, ba'ale' Davide' tu pa'aj u muuk le j siriobo', ca tu quíimsaj veintidos mil ti'obi'.

⁶Cu dzo'ocole' Davide' tu dzaj aj ba'atelo'ob u ti'al canatic Siria yéetel Damasco, ca tu t'onquintaj le j siriobo', ca tu beetaj u bo'otico'ob patan. Bey túuno' Yuumtzile' cu beetic ca'ach u pa'a muuk David je'el tu'uxac ca'ach cu bine'.

⁷Cu dzo'ocole' Davide' tu ch'a'aj le chimalo'ob oro u ca'ajo'ob cu meyaj ca'ach ti' u nuuquil u aj ba'atelo'ob Hadad-ezero', ca tu bisla'antaj Jerusalén.

⁸Tu ch'a'aj xan ya'ab bronce tu caajilo'ob Beeta yéetel Berotai, u caajalo'ob ca'ach Hadad-ezer.

⁹Le ca tu yojéeltaj Toi, u ajawil Hamat, dzo'oc u pa'abal u muuk tuláacal u aj ba'atelo'ob Hadad-ezere',

¹⁰tu túuxtaj Joram u paal u ti'al u bis ti' David ba'alo'ob oro u ca'ajo'ob yéetel bronce u ca'ajo'ob u ti'al u te'escuntic David tumen tu pa'aj u muuk Hadad-hezer, tumen Toie', yaan xan ca'ach ba'atel ti' tu yéetel.

¹¹Davide' tu jun páaycuntaj tuláacal le ba'alo'ob ti' Yuumtzilo', pa'ate', yéetel le oro yéetel le plata u yáax jun páaycuntmaj u tocmaj ca'ach ti' le lu'umo'ob tu pa'aj u muuko'ob:

¹²Edom, Moab, Amón, j filisteob, yéetel j amalecitaob, bey xan le tu tocaj ti' Hada-ezer u paal Rejob u ajawil Soba.

¹³Davide' noj ba'alchaji. Ca'aliquil táan u suut ca'ach le ca j dzo'oc u pa'ic u muuk le j edomitaobo', tu pa'aj u muuk dieciocho mil edomitaob tu Táax koom lu'umil Ta'ab.

¹⁴Cu dzo'ocole' u múuch'ul aj ba'atelo'ob ti' tuláacal u lu'umil Edom, tuláacal le j edomitaob j p'áato'ob yáanal u páajtalil David, ti' máax dzaab tumen Yuumtzil u páajtalil u dzáanche'etaj je'el tu'uxac ca xi'ique'.

¹⁵Davide' ajawnaj yóokol tuláacal Israel jach tu beel yéetel ti'ibil bejil u ti'al tuláacal le caajo'.

¹⁶U nuuquil u aj ba'atelo'ob ca'ache', Joab u paal x Sarvia, u aj dzíib ca'ach ajawe', Josafat u paal Ahilud.

¹⁷U aj kiino'obe', Sadoc u paal Ahitob, yéetel Ahimelec, u paal Abiatar; u aj dzíibil ba'axo'ob cu yúuchule', Seraías,

¹⁸u noojoch le j sereteob yéetel peleteob le múuch' aj ba'atelo'ob cu canano'obo', Benaía u paal Joyada. U paalal Davide' aj kiino'ob ca'achi.