Read Yucateco 2 Samuel 9 Bible Online

2 Samuel 9 - Yucateco bible

2 Samuel 9

¹Jun p'éel kiine' Davide' tu káat chi'itaj: ¿Yaan wa máax cuxa'an ichil u láaktzilo'ob Saúl u ti'al ca in beet utz ti' tu kaaba' Jonatán?

²Yaan ca'ach jun túul u palitzil u láaktzilo'ob Saúl cu kaaba'intic Sibae', j t'a'an u ti'al ca xi'ic tu yicnal David. Le ca j kuch Sibae', j káat chi'ita'ab ti' tumen le ajawo': ¿Teech wa ca kaaba'intic Siba? Leti'e, tu núucaj: teen u palitzil a Tzicbe'enil.

³Ajaw túune' tu káat chi'itaj ti': ¿Yaan wa máax cuxa'an ichil u láaktzililo'ob Saúl, u ti'al ca in beet utz ti' tu kaaba' Junab Ku? Sibae' tu núucaj: Yaan jun túul u paal Jonatán ma' quíimiqui', móoch tu ca'a dzíital u yooc.

⁴Ajawe' tu káat chi'itaj: ¿Tu'ux yaan? Sibae' tu núucaj: ti' yaan Lodebar, tu yotoch Maquir u paal Amier.

⁵Ajaw David túune' tu ya'alaj ca taasa'ac tu yicnal;

⁶le ca j kuch tu yicnal David Mefi-boset u paal Jonatán u yáabil Saúle', chinlaj tu táan David u ti'al u te'escunte. Davide' tu ka'am a'alaj: ¡Mefi-boset! Mefi-bosete', tu núucaj: ti' yanen tu ni' u yooc a Tzicbe'enile'.

⁷Davide' tu ya'alaj: Ma' a ch'aic sajaquil, tumen bíin in bisinbáa ma'alob ta wéetel tu kaaba' Jonatán a taata. Bíin in beet u láaj su'utul ti' teech u lu'umo'ob a nool Saúl, cu dzo'ocole' sáansamal bíin jaanaquech tin táasche'.

⁸Ba'ale' Mefi-bosete' j chinlaje' ca tu ya'alaj ti': ¿Ba'axten cu yutzul pactic a tzicbe'enil le a palitzil wa chéen beyen jun túul j quimen peeke'?

⁹Ba'ale' le ajawo' tu t'anaj Siba u yúuchben palitzil Saúle', ca tu ya'alaj ti': Dzo'oc in kubic ti' u yáabil a Dzuulil tuláacal ba'ax tu ti'alintaj yéetel ba'axo'ob tu ti'alintaj ca'ach u láaktzilo'ob.

¹⁰Bey túuno', teech yéetel a paalal bey xan a palitzilo'obe', bíin a meyajt le lu'um u ti'alinto' yéetel ca a kal ti' ch'iil u yich u ti'al ca yanac ba'al u jaant u láaktzilo'ob a dzuulil, quex tumen Mefi-boset u yáabile', sáansamal bíin janalnac tin táasche'. Siba máax yaan ca'ach quince u paalal yéetel veinte u palitzilo'obe',

¹¹tu núucaj: Tuláacal ba'ax dzo'oc u ya'alic a tzicbe'enil ti' le palitzila', bíin beetchajac. Mefibosete', janalnaj sáansamal tu táasche' ajaw je'el bix u janal u paalal ajawe'.

¹²Mefibosete', yaan xan ca'ach jun túul u chan paal cu kaaba'intic Micaía, cu dzo'ocole' tuláacal le máaxo'ob yano'ob tu yotoch Sibae', cu meyajtico'ob ca'ach Mefi-boset.

¹³Ba'ale' Mefi-bosete', le móoch tu ca'a dzíital u yoocobe', caajnáal ca'ach Jerusalén tumen ti' cu janal tu táasche' ajawe'.