Read Yucateco 1 Reyes 1 Bible Online

1 Reyes 1 - Yucateco bible

1 Reyes 1

¹Ajaw Davide' dzo'oc ca'ach u ch'iijil, dzo'oc ca'ach u sen nojoch máactal. Quex tumen cu ma'alob te'ep'el yéetel ya'ab nooko'obe' ma' tu kíintal ca'achi'.

²Le t óolale' u aj meyajo'obe' tu ya'alajo'ob ti': Unaj u caxta'al u ti'al a tzicbe'enil jun túul x ch'úupal ma' dzoca'an u beel, u ti'al u meyajtech yéetel u canantech, u ti'al ca wenec tu yéetel a tzicbe'enil u ti'al xan ca u kíintech.

³J máan Caxantbil ti' tuláacal u lu'umil Israel jun túul x t'a'aj qui'ichpam x ch'úupal, ca j nup táanta'ab jun túul tu caajil Sunem cu kaaba'intic x Abisag, ca j bisa'ab ti' ajaw David.

⁴Abisague' sen t'a'aj ca'achi' cu canantic yéetel cu meyajtic ca'ach ajaw David, Ba'ale' ajaw Davide' mix jun téen yanji' ba'al u yil yéetel.

⁵Ca'aliquile', Adonías u paal David yéetel x Haguit, j líik ba'atel, ca tu ya'alaj leti' bíin ajawnac. Yanchaj ti'e' u bolanilo'ob ba'atel u aj nat' tzíimino'ob, yanchaj xan cincuenta máaco'ob u ti'al canantic.

⁶Tuláacal u kiinilo'ob u cuxtale' mix jun téen a'ala'ab ma'il ti' tumen u taata, ti' ba'ax cu beetic, mix jun téen xan káat chi'ita'ab ti' ba'axten cu beetic le ba'ax cu beetico'. Adonías máax síij cu dzo'ocol Absalone', sen qui'ichquelem ca'achi'.

⁷U beetmaj ca'ach jun p'éel kax t'aan yéetel Joab u paal x Sarvia, bey xan yéetel aj kiin Abiatar, máaxo'ob áantic ca'achi'.

⁸Ba'ale', mix aj kiin Sadoc, mix Benaía, u paal Joiada, mix aj bóobat Natán, mix Simei, jun túul j xiib jach kub óolta'an ca'ach tumen ajaw, mix u ma'alob aj ba'atelo'ob David tu yáantajo'ob Adonías.

⁹Ti' le kiino'obo' Adoníase' tu nu'ucbesaj jun p'éel nojoch janal tu tzéel u suytuunil Zohelet, le yaan naadz ti' u sayabil Rogel. Tu quíimsaj tamano'ob, wacaxo'ob yéetel u poloctaquil mejen wacaxo'ob, tu páay óoltaj tuláacal u sucu'uno'ob u paalal ajaw, yéetel tuláacal u xiibilo'ob Judá le yano'ob tu meeyjul le ajawo'.

¹⁰Ba'ale' ma' tu páay óoltaj aj bóobat Natán mix Benaía, mix u aj ba'atelo'ob David, mix Salomón u sucu'un.

¹¹Natán túune' j t'aanaj yéetel x Betsabé, u maama Salomón, ca tu ya'alaj ti': ¿Ma' wa a wojel Adoníase', u paal x Haguit, Dzo'oc u ka'ayticubáa u beetubáa ajw, cu dzo'ocole' ma' u yojeltmaj c dzuulil Davidi'?

¹²Co'oten tumen bíin in dzáa ti' teech jun p'éel tzol xiquin u ti'al ma' a quíimil mix u quíimil Salomón a paal.

¹³Xeen tu táan ajaw David ca a wa'al ti': A tzicbe'enile' u jalach t'antmaj ti' teen ca'achi', in paal Salomón bíin ajawnac cu dzo'ocol ti' a tzicbe'enil. ¿Ba'axten túun táan u beeticubáa ajawil Adonías?

¹⁴Ca'aliquil táan a t'aane' tene' quin wocol u ti'al in jéedz t'ant ba'axo'ob ca wa'alic.

¹⁵J bin túun x Betsabé u yil ajaw David tu'ux chilicbal. Ajawe' sen ch'ija'an ca'achi, x Abisag le x sunamitae' táan ca'ach u táan óoltic.

¹⁶x Betsabee' noclaj lu'um tu táan ajaw David, Ajawe' tu káat chi'itaj ti': ¿Ba'ax cu yúuchul ti' teech?

¹⁷Leti'e' tu núucaj: A tzicbe'enile' tu jalacht'aantaj ti' teen tu kaaba' Yuumtzil a Junab Ku, Salomón in waale' yaan u beetic u ajawil cu dzo'ocol ti' a tzicbe'enil, ta wa'alaj bíin culac ta jalach káanche'.

¹⁸Ba'ale' Adoníase' dzo'oc u ka'ayticubáa ajaw, a tzicbe'enile' ma' u yojeli'.

¹⁹Dzo'oc u quíimsic wacaxo'ob, mejen wacaxo'ob yéetel ya'abcach j tamano'ob, dzo'oc xan u páay óoltic u paalal a tzicbe'enil; bey xan tu páay óoltaj aj kiin Abiatar, yéetel Joab u nojochil le aj ba'atelo'obo', ba'ale' ma' tu páay óoltaj Salomón, u j meeyjul a tzicbe'enili'.

²⁰In dzuulil, bejela'e' tuláacal Israel táan u pa'atic ca a wa'al máax bíin u beet u ajawil cu dzo'ocol ti' a tzicbe'enili'.

²¹Wa ma' beyo', le quéen quíimic a tzicbe'enile', Salomón in paal yéetel tene' yaan c bisa'al quíimsbil.

²²Ca'aliquil leti' táan u t'aan ca'ach yéetel ajaw Davide', j kuch aj bóobat Natán,

²³ca j dzaab u yojéelt ajaw. Le ca j náadz le aj bóobat tu táan ajawe', noclaj lu'um tu táan,

²⁴ca tu káat chi'itaj ti': ¿Dzo'oc wa u ya'alic a tzicbe'enil ti' Adonías ca u beet u ajawil, cu dzo'ocol ti' a tzicbe'enili'?

²⁵Tumen bejela'e' dzo'oc u bin, u quíims wacaxo'ob mejen wacax yéetel ya'abcach j tamano'ob, bey xan tu páay óoltaj u paalal a tzicbe'enil, u nojochilo'ob le aj ba'atelo'obo' yéetel aj kiin Abiatar. Táan u janalo'ob yéetel u yukulo'ob, táan xan u yawtico'ob ¡Xi'ic utzil ti' ajaw Adonías!

²⁶Chéen ba'ale' ma' tu páay óolteni' mix aj kiin Sadoc, mix Benaía, u paal Joiada, mix Salomón u paal a tzicbe'enil.

²⁷¿Dzo'oc wa u ya'alic a Tzicbe'enil ca beeta'ac le ba'ala', teche' ma' a dzaamaj u yojéelt le a palitzila', máax cun j bin j cutal ta jalach káanche' cu dzo'ocol ti' a Tzicbe'enili'?

²⁸Ajaw Davide' tu ya'alaj ca t'aanac x Betsabé. Le ca j kuch x Betsabee' tu táan ajawe', j p'áat wa'alacbal tu táan.

²⁹Le ajaw túuno' tu beetaj le jalach t'aana': Quin jalacht'aantic tu kaaba' Yuumtzil, máax tu tocajen ti' tuláacal yaj óolale',

³⁰le ba'ax ca'ach tin jalach t'antaj ti' teech tu kaaba' Yuumtzil u Ku Israele', ti' le kiina' quin dzo'ocbesic: Salomón a paale' yaan in dzáic ca culac tin wo'olal ti' in jalach káanche', yaan u beetic u ajawil quéen quíimiquen.

³¹Betsabee' j noclaj lu'um tu táan ajawe' ca tu ya'alaj: ¡Xi'ic utzil láaj kiin ti' in dzuulil, ajaw David!

³²Cu dzo'ocole' ajaw Davide' tu ya'alaj ca t'a'anac aj kiin Sadoc, aj bóobat Natán yéetel Benaía u paal Joiada. Le ca j taalo'ob tu táan ajawe',

³³leti'e' tu ya'alaj ti'ob: Bet a láakinta'ale'ex tumen u noj meeyjulo'ob le ajawila', na'acse'ex Salomón in paal tu yóokol in x burra ca a bise'ex Gihón;

³⁴le quéen jun páaycunta'ac u beet u ajawil Israel tumen aj kiin Sadoc yéetel aj bóobat Natane', uste'ex u baac j taman yéetel ca a wawte'ex: ¡Xi'ic utzil ti' ajaw Salomón!.

³⁵Cu dzo'ocole' tzolaba'ex u ti'al a canantique'ex ca taalac j cutal tin jalach káanche', u ti'al ca ajawnac tin wo'olal, tumen dzo'oc in wa'alique' leti' bíin u beetubáa u nojochil Israel yéetel Judá.

³⁶Benaía, u paal Joiadae', tu núucaj: Bey ca béeyac, bey ca u yóolt Yuumtzil, u Ku a tzicbe'enil.

³⁷Je'el bix ti'anchajic Yuumtzil tu yéetel a tzicbe'enile' bey ca yanac tu yéetel Salomón, ca u beet u nojochtal u ajawil asab ti' u ti'al u tzicbe'enil, in dzuulil David.

³⁸Cu dzo'ocole' aj kiin Sadoc, aj bóobat Natán, Benaía, u paal Joiada, le j cereteob yéetel le j peleteobo', tu na'acsajo'ob Salomón yóokol jun túul u x burra ajaw David, ca tu bisajo'ob Gihón.

³⁹Te'elo' aj kiin Sadoque' tu ch'a'aj te j quili'ich najo' le baac tu'ux cu dza'abal le aceiteo' ca tu jun páaycuntaj Salomón bey ajawe'. Cu dzo'ocole' ca tu yustajo'ob u baac j taman, ca tu yawtajo'ob ¡Xi'ic utzil ti' ajaw Salomón!

⁴⁰Cu dzo'ocole' tuláacalo'ob j bino'ob tu paach táan u jóopsico'ob flauta. Sen nojoch u qui'imaquil yóolo'ob, bey táan u jóokol ca'a búuj ti' le lu'um tu yo'olal u yawato'obo'.

⁴¹Adonías yéetel tuláacal u páay óoltaje', táant u dzo'ocol u janalo'ob le ca tu yu'ubajo'ob le juumo'. Le ca tu yu'ubaj Joab u jóopsajil le baaco', tu ya'alaj: ¿Ba'ax o'olal yaan ya'abcach qui'imac olal te j caajo'?

⁴²Ca'aliquil táan u t'aane', j kuch Jonatán, u paal aj kiin Abiatar. Adoníase' ca tu ya'alaj ti': Oquen, tumen teche' jun túul nojoch máaquech, táan wal a taasic ma'alob pectzilo'obe'.

⁴³Jonatane' tu núucaj ti' Adonías: Ma' beyi', David c dzuulil yéetel c ajawe', dzo'oc u ya'alique' Salomóne' ajaw.

⁴⁴tu ya'alaj ti' aj kiin Sadoc, ti' aj bóobat Natán je'el bix ti' Benaía, u paal Joiada, yéetel le j cereteobo' le j peleteobo', ca u láakinto'ob Salomón; leti'ob túune' tu na'acsajo'ob tu yóokol le x burra cu nat'ic ca'ach le ajawo'.

⁴⁵Cu dzo'ocole' aj kiin Sadoc yéetel aj bóobat Natán dzo'oc u jun páaycunsico'ob bey ajaw tu caajil Gihón, dzo'oc xan u sutico'ob te'elo' sen qui'imac yóolo'ob. Let o'olale' ca wu'uyic u juum le caajo' yéetel le awato'ob dzo'oc a wu'uyique'exo'.

⁴⁶bey xan dzo'oc u cutal Salomón tu jalach káanche',

⁴⁷u nucuch meeyjulo'ob ajaw Davide' dzo'oc u bino'ob u dzíibolto'ob qui' óolal ti', yéetel ca ayikalcunsa'ac tumen Ku u ti'al ca nojochajac u ajawil Salomón. Tac ajaw David líik tu kaan u ti'al u kult Yuumtzil

⁴⁸Ca tu ya'alaj: Qui'iqui' t'anta'ac Yuumtzil u Ku Israel, máax tu yóoltaj bejela'e' ca na'acac jun túul in ch'i'ibal te jalach káanche'o', yéetel ca in wilej.

⁴⁹U páay óolo'ob Adonías jo'op u quiquilaanquilo'ob, cu dzo'ocole' j láaj líik tuláacalo'ob, tu jujun túulilo'ob j bino'ob tu'ux tu yóoltajo'ob.

⁵⁰Tu yo'olal u sajaquil Adonías ti' Salomone' j líike' ca j bin quili'ich naj, u ti'al ta'acbessicubáa, ca tu machajubáa ti' u baaco'ob u multuunil kultaj.

⁵¹Yanji' wa máax bin u ya'al ti' Salomón: Adoníase' sajac ti' a tzicbe'enil, dzo'oc u ta'acbesicubáa tu multuunil kultaj. Táan u káatic ti' a tzicbe'enil ca a jalach t'aant bejela'e' ma' bíin a quíimsi'.

⁵²Tu núucaj Salomón: Wa cu bisicubáa bey jun túul utzil máaque', ma' bíin lúubuc j lu'um mix jun cu'ul u tzo'otzel u pooli'; ba'ale' wa cu yojelta'al táan u beetic wa ba'ax loobile' cu quíimil.

⁵³Tu séeblaquile' tu túuxtaj Salomón ca lukesa'ac te tu multuunil kultaj. Cu dzo'ocole' Adonías j bine' ca j chinlaj tu táan ajaw Salomón, leti'e' tu ya'alaj ca xi'ic tu yotoch.