Read Yucateco 1 Reyes 10 Bible Online

1 Reyes 10 - Yucateco bible

1 Reyes 10

¹U x ajawil Sabáe' tu yu'ubaj u tzicbalil le nucuch ba'alo'ob cu beetic ca'ach Salomón u ti'al u nojbe'enil Yuumtzil, ca j bin Jerusalén u ti'al u yila'a wa jaaj, yéetel u ti'al u beetic káat chi'ob talamtaco'ob. J kuch yéetel nojoch tzicbe'enil, tu bisaj camello'ob u cuchmajo'ob qui'iboc ba'alo'ob, ya'abcach oro yéetel jadzutz tuunicho'ob. Le ca'aj kuch tu táan Salomone' tu káat chi'itaj ti' tuláacal ba'axo'ob tu tucultaj u káat chi'itic ti'e'.

³Salomone' tu núucaj ti' tuláacal u káat chi'ob. Ma' j yanji' mix jun p'éel káat chi' ma' tu núucaji'.

⁴Le ca tu yu'ubaj x ajaw Sabá buca'aj u yojéelaj Salomón, yéetel le ca tu yilaj le jalach naj u beetmajo',

⁵bey u qui'iqui' janalo'ob, le cúuchilo'ob tu'ux cajacbalo'ob u nuuquil u aj meyajo'obe', u ma'alob búuc u palitzilo'ob, u aj dzaa ukulo'ob, yéetel le tóocbil ba'alche'ob cu kubic te j kulnajo', j p'áat jaka'an u yóol,

⁶ca tu ya'alaj ti' ajaw: Le ba'ax tin wu'uyaj u ya'ala'al tin lu'umil tu yo'olal le ba'axo'ob ca beetic, yéetel buca'aj a wojéelaje', jach jaaj;

⁷ba'ale' chéen páatji' in wocsic tin wóol iquil taaliquen bejela'e' yéetel tumen dzo'oc in wilic jach tin wichil. Jach tu jaajile' ma' j tzicbalta'ab ti' teen mix u táancochil a na'at, tumen a kaj óolal yéetel a ayikalile' asab ya'ab ti' le tin wu'uyaj u ya'ala'alo'.

⁸¡Buca'aj qui' utzil yanilo'ob wal a watano'ob, yéetel buca'aj qui'imac óolal wal u yu'ubicuba'ob a j palitzilo'ob, mantadz yano'ob ta tzéel táan u yu'ubico'ob a t'aano'ob yéetel na'at!

⁹¡Qui'iqui' t'anta'ac Yuumtzil a Junab Ku, máax tu yilaj yéetel utz ca tu kubaj ti' teech u ajawil Israel! ¡Tu yo'olal u yaacunaj Yuumtzil ti' Israele' mantadz tu dzajech xan ajawil u ti'al a toj méektáantic yéetel ti'ibil bejil!

¹⁰Cu dzo'ocole' leti'e' tu kubaj ti' ajaw tres mil novecientos sesenta kilos oro, yéetel sen ya'ab qui'iboc ba'alo'ob bey xan jadzutz tuunicho'ob. Mix jun téen kuchuc ca'ach tu lu'umil Israel ya'abcach qui'iboc ba'alo'ob je'el bix le tu síaj u x ajaw Sabá ti' j ajaw Salomón.

¹¹U múuch'ul u cheemilo'ob u coonol Hiram tu taasajo'ob u oroil Ofir, tu taasajo'ob xan ya'abcach u che'il sándalo' yéetel co'ocoj jadzutz tuunicho'ob.

¹²Yéetel le u che'il sándaloo' tu beetaj ajaw Salomón barandaob u ti'al u kulnaj Yuumtzil yéetel u ti'al u jalach naj, tu beetaj xan arpaob yéetel salteriob u ti'al le aj paxo'obo'. Mix jun téen taasa'ac ca'ach, mix ila'ac sen ya'ab u che'il sándalo.

¹³Ajaw Salomone' tu dzaj ti' x ajaw Sabá tuláacal ba'ax tu káataj, pa'ate' yéetel le ba'ax tu yóoltaj u dzáa tu kabile'. Cu dzo'ocole' x ajawe' suunaj tu lu'um láakinta'an tumen u palitzilo'ob.

¹⁴Le oro cu kamic ca'ach Salomón amal ja'abo'obo', cu chuquic veintidós mil kilos,

¹⁵ma' ch'a'an u xooquil le páatan cu bo'otico'ob le j coonolo'ob, yéetel le j dzaa taakino'ob je'el bix tuláacal u ajawilo'ob Arabia, bey xan u méektáanilo'ob le lu'umo'.

¹⁶Ajaw Salomone' tu túuxtaj beetbil doscientos nucuch chimalo'ob bokolbil oro u ca'ajo'ob, meyajnaj seis kilos oro ti' u jujun p'éelil.

¹⁷Tu túuxtaj beetbil xan trescientos mejen chimalo'ob, meyajnaj máanja'an jun p'éel kilo ca'a tac táancoch bokbil oro ti' u jujun p'éelil, ca tu dzaj tu jalach naj cu kaaba'intic u Káaxil Líbano.

¹⁸Tu túuxtaj beetbil xan jun p'éel nojoch jalach káanche' marfil u ca'aj ca tu ya'alaj ca bo'onoc yéetel chéen oro.

¹⁹Yaan ca'ach seis u ebtuunilo'ob ti' le jalach káanche'o'; tu náac paache' yaan ca'ach jun p'éel u wóolis yu'ub, yéetel u kabo'ob ti' jujun tzéel u dzaamail tu yicnal ca'ache' yaan ca'a p'éel yoochel leóno'ob wa'alacbalo'ob.

²⁰Yaan xan ca'ach u yoochel doce leóno'ob wa'alacbalo'ob ti' u jujun tzéel le seis ebtuuno'obo', ¡Mix jun téen beeta'ac ti' mix jun p'éel ajawil wa ba'ax beyo'!

²¹Tuláacal xan le u nu'ucul ukul cu meyaj ti' ajawe' beeta'an ca'ach yéetel oro, bey xan tuláacal u nu'uculo'ob janal yaan tu jalach naj tu U káaxil Líbano, mix ba'al beeta'an ca'ach yéetel plata tumen tu kiinilo'ob Salomone' ma' co'oj u tojoli',

²²tumen le u cheemo'ob ajaw yaan ca'ach Tarsise', cu cóojolo'ob chéen jun téen ti' óox p'éel ja'ab, pa'ate' yéetel u cheemo'ob Hirame', cu taasico'ob ca'ach, oro, plata, marfil, j ma'axo'ob yéetel ajaw úulumo'ob.

²³Ajaw Salomone' pitmáanja'an u ayikalil yéetel u kaj óolal ti' u ajawilo'ob yóokolcaab.

²⁴Tuláacal u cajnáalilo'ob yóokolcaabe' u káat ca'ach u yilo'ob yéetel u yu'ubo'ob le ojéejlajil j dzaab ca'ach ti' tumen Junab Kuo',

²⁵cu bisa'al ti' jujun ja'ab jun p'éel siibal: ba'alo'ob beeta'an yéetel plata, oro, suyemo'ob, u nu'uculo'ob ba'atel, qui'iboc ba'alo'ob, tzíimino'ob yéetel x burraob.

²⁶Salomone' tu much'quintaj bolano'ob yéetel j nat' tzíimino'ob. Yaan ca'ach ti'e' mil cuatrocientos bolano'ob yéetel doce mil j nat' tzíimino'ob, lelo'oba' tu dzajo'ob ti' u cúuchililo'ob u bolanilo'ob ba'atel yéetel u ti'al u canantico'ob jalach naj Jerusalén.

²⁷Ajawe' tu beetaj ca yanac Jerusalén ya'abcach plata je'el bix u ya'abil tuunicho'ob; yéetel ca ya'abchajac kuulche' je'el bix ya'abil le x ko'ocho'ob yaan ti' le táax lu'umo'.

²⁸Le tzíimino'ob u ti'al Salomono' cu ch'a'abalo'ob Muzri yéetel Ciliciae' u ti'al j bisbil ti', tumen le máaxo'ob kubenta'an ti'ob tumen ajawe' ti' cu manico'obo'.

²⁹Jun p'éel bolan cu ma'anal Egiptoe' cu tojoltic seiscientos plata taakin, jun túul tzíimine' ciento cincuenta. Tuláacal u ajawilo'ob hititaob yéetel siriob cu manico'ob ti' u aj coonolo'ob Salomón.